لا اشعر بالفرحة أبداً ( رجل الرجال)
السلام عليك ورحمة الله وبركاته
كيف حالك ؟؟
مو عارفه كيف ابدا .. وهذي اول مشاكلي متردده ومو واثقه باي شي اسويه ادرسه ملييييون مره وبعد
ماسويه ما ارتاح اظل قلقه .. واحيانا اندم اني سويته واستحقر نفسي مع انه احيانا يصير شي تافه بس انا
احب كل شي كامل وكل شي يصير تماام يمكن هذا السبب هو اللي يخليني اندم .. وقلت لك قبل اني
ماعندي طلاقه بالكلام يعني راح تشوف جمل مكركبه ..
انا دااائما حزينه ومحبطه واشعر بالضيق وفاقدة الثقة من الكل واذا كان الحزن شديييد اصير بحالة يأس
فظيعه الى درجة اكره نفسي واحس ان وجودي ماله قيمه ابدا بالحياة واني اوهم نفسي اذا قلت اني ناجحه
بحياتي او ان حياتي راح تكون افضل .. وانه عادي ومااستغرب اذا صار لي شي مو حلو , يعني اتوقعه
باي لحظه واتوقعه باي حجم راح يكون ..
الحمد لله من رمضان والى الان رايح عني هذا الحزن ولو انه يزورني ببعض الاوقات بس احاول اني اتجاهله بقدر الامكان ..
انا ما احس باي فرحه مثلا نجاح او مناسبات مااعرف كيف افرح مثلا انا الحمد لله انجح واعتبر من
المتفوقات في الجامعه وحتى يوم كنت بالثانوي وخاصه اخر سنه لاني اجتهدت فيها جبت فيها معدل عااالي
واذكر انه بنات خالتي لما باركوا لي حسسوني اني سويت شي كبير بس انا من داخلي احس انهم يبالغون
وما استاهل كل هذا , حتى الحين لما اهلي يتكلمون عن معدلي احس انهم يبالغون ولا احس بفرح احس انه
شي عادي .. واتمنى انهم يسكتون ..!
ومادري ليش اذا حسيت بفرح احس انه فيه شي منغص علي احس انه بيصير لي شي احس بخوف ..
ولازم اذا صرت مبسوطه بشي لازم بعده تجيني حالة حزززن يعني شي مثل الواجب فرح بعده حززن ..
واذا صرت بالاجتماعات وانا بينهم ومبسوطه احس انه فيه شي بداخلي ينغص علي احس انه فيه شي
ناقص احس انه كانه احد يقولي لاتفرحين ولا تتطمئنين هذا وقت ويروح ..
واحس اني ودي اجلس بعيده عنهم ولحالي , احيانا احتاج اني انفرد بنفسي ومايصير معي احد بس شوي
وارجع وفعلا اقوم ادور شوي اروح لغرفه مافيها احد اروح لدورة المياه الله يكرمك اروح اي مكان اصير
فيه وحدي بعدين ارجع لهم حتى احيانا اتأخر لدرجة انهم يفقدونن ويدورون علي ..!
وفيه شي محيرني انا ماحب احد يتقرب لي انفر منه واكرهه .. اذا حسيت ان اي انسان يحبني او مشتاقلي
او حسيتها تتقرب انفر منها واكرههااا ودي اضربها ودي اقولها وش تبغيييين ؟ وش عليه تحبينن ولا وش
عليه مشتاقتلي ؟!!
حتى اني ماحب اتواصل مع صديقاتي باستمرار ماحب احد يسأل او يتصل احس انه هذا الشي طبيعي فيني
لاني ماحتاج لأحد بس لما اشوف قريباتي وتواصلهم مع صديقاتهم استغرب من نفسي واستغرب منهم !
مادري ايهم اللي مو طبيعي .؟!
واذا اتصلت علي حداهن احيانا ما ارد واتمنى انها ماتصلت او اذا ارسلت اتمنى انها ماارسلت وما ارد
عليها الا بعد يوم اسوي نفسي ماشفتها بس اذا ارسلت لها اعتذر منها على التاخير يعني ادري انه غلط بس
اسويه ماتوب اعجز اجبر نفسي ..
وفيه شي ثاني ماحب احد يعرف عني شي حتى لو كانت اشياء بسيطه يعني مثلا قبل ايام قالتلي بنت
عمتي انه انتي كتومه جدا وانك ماتفضفضين ابد الاشياء اللي تدور بنفسك تخلينها بينك وبين نفسك ,
وهذي الاشياء صحح عليها وقلت لها انها صح وانه لدي اسبابي , بس تدري وش صار عقبها !
تحسسسسسفت اني قلتلها ونددددمت انه انفتح هذا الموضوع معها و ودي اروح لها واقولها ترا مو صدق
اللي قلتي ودي اني ماتكلمت معها اساسا .. وضاق صدري مررررره احس انها كشفتني لاني ادري انها
راح تقول لاختها وامها وهذي البنت اصغر مني وانا ماكد تكلمت معها قليييل مره بس ماادري وش اللي
فتح هالموضوع ..
انا ماحب احد يسوي نفسه انه فاهمني وعرفني ,
وبعد هذا الكلام شفتها وبسسس تناظرن هي واختها يااالله والله طول الوقت وانا ساكته ودي اقولهم وش
تبغون تناظروني وانه لاتحسبون انكم عرفتوا شي عني ! < صدق والله هذا اللي افكر فيه ..
انا دااائما اخاف ولا احس بالامان حتى بابسط الاشياء مثلا لو احد قالي تعالي شوي ابقولك اخاااف
لو احد يقولي ابقولك شي وهو جاد يعني ومايبغى احد يسمع اخاااف لو وحده تقولي وحنا باستراحه او حتى
بالجامعه اي مكان تقولي خلينا نروح نتمشى يعني انا وياها اخاااااف احيانا اتعذر باي شي واحيانا اجبر
نفسي بس اظل مو مرتاحه , واصير اغلب الوقت ساكته .. واخاااااااف لما احد يناظرني كثييير ..
واخاف من ناس ماسوو لي شي حتى اخاف من ناس ماكد تكلمت معهم .. حتى اني ماشفتهم اصلا يعني
مثلا بالنت فيه اعضاء معينين اخااف منهم احس انهم يمكن باي لحظه بيسوون لي شي
احس انهم بيؤذوني .. < بس مو على هذا الموقع هذا الموقع سبحان الله أحس برآحه فيه ,
انا مشرفه باحدى المنتديات الضخمه , مع اني مشرفه ( يعني لي سلطه ) الا اني اخاف من بعض
الاعضاء اللي اشوف انهم متمردين او جريئين حتى فيه بالمنتدى مستشار اجتماعي معتمد واخاااف منه مع
اني ماكد تكلمت معه بس مره , يمكن لاني احس انه جريء ..
وشي ثاني انا كلللل شي افكر فيه كل شي , لازم يصير بمخي ملايين الاسئله لاي شي اشوفه جماد انسان
حيوان اي شي وهذا متعب , وخواتي واللي حولي غييير يستغربون لما اقولهم .!
ووبس
ادري تكلمت كثييييير بس معليش تحملني .. والله يعينك علي ..
ومازال عندي بس هذي الاشياء اللي طلعت معي الان ..
ودمت بخير وعآفيه ..
__________________
إنـي ابتليت بـأربع مـا سُلِّطوا --- إلا لـشـدّة شقـوتـي وعنـائي
ابليـس والدنيا ونفسي والـهوى --- كيـف الخلاص وكلهم أعـدائـي
بمـعية الرحمن ونـهج حبيبـه --- أبــلغ بـإذن الله رجـــائـي
15-09-2011, 03:56 AM
ضوابط المشاركة
العرض الشجري