وعليكم السلام ورحمه الله وبركآته
وصباحك يا اختي سبحان الله يا تناهيد ..!
سبحان اللي مسخرني ادعي لك يا اختي الغالية
انتي الوحيده اللي دمعت عيوني وانا اقرى كل مواضيعك
فيه شي مؤلم .. انثى حقيقيه وضعيفة .. لكن لك رب ما يضيع عبيده وهذا من فضل الله علي وعليك
ويمكن عشاني مثلك محرومة من ضناي ..
بقولك شي سويه بحياتك وبترتاحين
انا في بدايه طلاقي عشت صدمة قويه بسبب أولادي عندي بنت وولد وكانو متعلقين فيني مرة
بشكل محد يتصوره وربي وفجأه ينحرمون من الأم مرة كان صعب علي وأكيد عليهم قبلي
كنت خايفه عليهم يصير لهم شي ولا يتربون ويصيرون عيال شغالات وخايفه من اشياء كثير
لكن ربي هداني ووفقني أني أدعي لهم كل صلاه وأتعود على قيام الليل عشان ادعي لهم وكل صبح
اقرى المعوذات أرقيهم وهم ماهم قدامي صدقيني أخلاقي زانت وصرت أي شي اسويه أقول عشان ربي يحفظهم لي .. عشان ربي يصلحهم ويقر عيني فيهم لا كبرو .. وتعودت على حاجات حلوة صرت اسويها اشتري هدايا لأطفال جيرانا واسوي لهم حفلات نجاح واجمعهم اوزع عليهم حلويات واشياء يحبونها وقبل فتره نزلت السوق شريت جكيتات برد وأهديتهم يعني اشياء ما تتخيلينها كأني اجيب لعيالي وامي دايم تهاوش انتي فلوسك تضيعينها وانتي وانتي وانا ما همني والله لان عندي هدف ابي اوصل له وكل الشي ذا عشان ربي يسخر لهم ناس يعاملونهم مثل ما اعامل الأطفال , لدرجه اني ادعي ربي اتزوج واحد مطلق ولا أرمل معاه عيال عشان اربيهم بحنان واخذ اجرهم تفكيري بس ششلون ما يحسون بفقد الأم
وانا والله الحين مرتاحه نفسيا مو مثل العام .. وكل هذا بفضل ربي ان هداني لشي اسويه وارتاح نفسيا
شفتي كيف ربي رحيم سبحان الله بس وينا احنا بس ..
صدقيني ما كتبت هالشي رياء ومابي يضيع اجري لكن انتي ما تعرفيني وانا ما اعرفك بس حبيت اقولك شلون ارتحت بعدهم وابيك انتي بعد تفكرين وش ممكن اسوي خير بحياتي عشان ولدي ..
اعذريني يا اختي طولت بالكلام لكن عنوان موضوعك لحاله مؤلم ويحزن تذكرت نفسي شلون كنت وحاسه فيك مره مرة
يارب يزيل همك ويفرح شوفك بضناك ويوفقك للخير