اولا عزيزتي مهما كانت مشاكلك مع زوجك غلط تقولين عنه هالكلام انتي تقولي تبينه يعاملك باحترام فمن باب اولى تحترمينه
الله يقول ولاتنسوا الفضل بينكم
انتي قلتي انو يجي ياخذ بخاطرك لما تزعلين ويرسل لك رسايل عالجوال حلوه فهذا بحد ذاته حلو بس اتوقع ردة فعلك هي اللي تعصبه يعني لما سألتك انبسطتوا من طلعة المطعم بدل ماكنتي تقولي ايوه رس كنت معصب كان الاولى تقولي اكيد انبسطنا واحنا معاك الله يخليك لنا ولايحرمنا منك
بالنسبه للعلاقه اتوقع شي طبيعي اذا صار في مشاكل وتوتر والجو مشحون ع طول مايكون عندو رغبه
ياعزيزتي جداتنا يتداولون حكمه دايما اسمعها تقول لقيت للرجال طبٌ هين --اشباع بطنه والكلام اللين
ودايما يقولوا الكلام اللين يغلب الحق البين
يعني خليك ذكيه واعرفي كيف تكسبي قلبه
وفعلا كلام زوجك صح لما يقول الزين
مو كل شي اهم شي المحبه والاحترام والموده بين الزوجين
انتي هالفتره مركزه اهتمامك على حاجتين وضيعتي اوقاتك الحلوه معه بسببها
الاولى هو زواجه وخلينا صريحين وش تستفيدين لو عرفتي او قالك انه متزوج راح تنقهرين وبس ماتقدرين تتطلقين ولاراح تقدرين تسكتين لذلك لاتبحثين عن شي ممكن يوجع قلبك
الشي الثاني طلعاته اليوميه دام انه طول الوقت معاكم ويروح ع قولك يدخن ويرجع فما اشوفها كارثه تخليك تنكدين على نفسك وعليه عشانها
بالعكس طلعته هذي تخليكم تشتاقون لبعض هو يغير جو وانتي تشوفين اشغالك
تعلمي ياقلبي تعيشين حياتك عادي والوقت اللي يجي فيه استمتعي بوقتك معاه وخلي هالوقت سوالف وضحك مو هواش حاولي تحببيه فيكم وفي جلستكم
ولا تحاولين تشحنين اولاده عليه بالعكس علميهم يحترمونه واعطيهم اعذار له عشان يحترمونك انتي بعد
ونصيحه لاتحاولين تمارسين اي شي هو مانعه في غيابه لان هذا راح يخلي اولادكم يستخدموا هالاسلوب معاكم بعدين ويسووا اشياء ماترضيكم في غيابكم
علميهم يحترمون ابوهم في وجوده وفي غيابه
اخيرا ادخلي ياعسل يوتيوب مقاطع مره حلوه عن الحياه الزوجيه راح تفيدك كثير
''' همسه لك اختي'''
انا من اول ماشفت عنوان موضوعك الاول كنت حاسه انك متاثره بالاغاني والمسلسلات
اذا تسمعين اغاني بطليها واستبدليها بشي ينفعك واصلحي بينك وبين الله يصلح مابينك وبين زوجك
وعليك دايما بالاستغفار فمن لزم الاستغفار جعل الله له من كل هم فرجا ومن كل ضيق مخرجا ورزقه من حيث لايحتسب
الله يصلح شأنك انتي وزوجك