اشكرك روح المساء على تفاعلك اني عارفه انه الاحتفال بالاعياد محرم بس على الاقل احنا ما نحتفل بدى العيد لانه بداية زواجه كان يذكرني بدى اليوم بعتبار ان كل يوم معاي هو عيد حب بذاته والرجال اني تنقاشت معاه بدل المره الف وما عصبت بكل هدوء حتى اخر نقاش لنا نيمت الولد وسويت له حلى يحبه ورحت له المجلس اني ابي اكلمه واتنقاش معاه وقلت له انه صعبان علي سنتين ينام على كنب وقلت له انت نام على السرير واني بنام على الكنب قالي لا خليك مع ولدك يمكن يصحى الليل ما يلاقيك وقلت له اذا انا زعلتك او صدر مني شي يظايقك اني من زمان ساكته ومتحمله وكل مره اوجد لك عذر كل يوم انام لوحدي والمخده الي جنبي فاضيه الى متى بنعيش كذا سنتين انا لا متزوجه ولا مطلقه مخليني معلقه لا الك ولا لغيرك اذا كنت ماتحبني ولا ترغب في العيش معاي خلاص خلنا ننفصل لاني تعبت نفسيا تعبت اكابر وتعبت اجامل وفي النهايه المحبه من الله كل واحد يشوف حاله انت بعد يمكن ترتبط في وحده تحبها وتحبك ... طبعا يصغي الى كلامي وساكت ما رد علي فالنهاية طلبت منه ننفصل قال لي على راحتش يعني عادي عنده ننفصل وهو الحين مسافر سفر عمل بعد كم اسبوع طبعا الله الشاهد علي سمعت من اخته التقيت وياها وسالتني كيف بيكون وضعي مع العمل لو سافرت !!!!! اني مستنكره اي سفر قالت لي مو اخوي بيسافر تبع عمله اني انصدمت ماعرفت وش اقول لها مافتحت معاه الموضوع قلت قلت يمكن بعدين يقول لي ولا تكلم اخر شي سالته قال ايه بسافر يمكن سنتين ويمكن اكثر اذا بتروحي بيت اهلش والمصروف بحول لك على حسابك ... واني خلال دي الفتره ابي موضوعي معاه يخلص قبل ما يسافر لاني ماني قادره اوصل الى قرار العشره الي بينا ما تهاون علي وبيني وبينه شي اكبر من العشره بينا ولد من صغره ينشأ بعيد عن امه وأبوه في نفس الوقت ماقدر استمر معاه لانه جرحني جرح واتوقع الكل يتفهم لمن الزوجه زوجها يهجرها وش يكون شعورها خصوصا لمن اطلع واشوف احد ماسك يد زوجته او يلعبون عيالهم مع بعض واني لوحدي مع ولدي الغصه تقتلني الرجال تاركني حتى اكله من المطعم اشتاق له والله قبل ما أغسل ملابسه احضن ملابسه اشم ريحة عطره وهو لا معبرني ... وسؤالك هل هو اختارني بنفسه ... نعم اختارني بنفسه ماحد فرضني عليه لاني ما اقرب له وهو الي قال الى اهله اني ابي البنت الفلانيه واني اتوقع زي ماقلت مصاب بعين لانه كان عكس كذا تماماً من ولدت وهو بدأ يتغير اني ما اتكلم مع امه لانه دائما عندها اعيالها على حق ومدلعتهم تخاف عليهم من نسمة الهوا ابوه يمكن يتفهم اكثر تكلمت معاه والرجال حس بالذنب انه ما ربى ولده عدل ولا وجها عدل لانه اذا صدر من ولده شي يأذي أحد فالخطا منه هو ومحاسب عليه يوم القيامه وارتفع ضغطه فما احب افتح وياه الموضوع مررره ثانيه
29-02-2012, 08:37 AM
ضوابط المشاركة
العرض الشجري