في الجنــــة سنلتقي .. حكايتي مع بدايه ألمــي ونهايه سعادتــي
بسم الله الرحمن الرحيم ..
الدنيا مشبّعة بظلمة وسكون تلفحه نسمات باردة
صوت الموج الهادي يضيّج لوحة الصمت الواسعة
بعد ان قرات بزواياكم حكايه كل عضو مع المه .. قررت ان أشاركم حكايتي مع بنهايه سعادتي .. احترت من اين ابتدي
فقررت كتابه ماحدث لي وغير مجرى حياتي .. اعذروني اذا انخرطت بالعاميه في كتابتي لعدم تمكني من الفصحى ..
الهويه ..
اسمي روضه من ابوظبي فتاه عشرينيه عزباء تركت وظيفتي من بعد ماحدث لي
والدتي ( رحمها الله ) أجنبيه ...
شقيقاتي جميعهن متزوجات الا انا كنت رافضه الزواج .. وليس لدي الا ثلاث اشقاء .. اصغر مني سناُ
منذ ثلاث سنين انتقلنا لمنزلنا الجديد في داخل ابوظبي وأجرنا منزل الحكومه القديم اللي في ضواحي
بوظبي ..
المرحوم اسمه بطي .. قد اسمته جدتي رحمها الله لانها اتى بعد البنات وجاء متاخراُ .. فأسميناه بطي
اسم اماراتي قديم جداُ متادول بيننا حتى لاتستغربون الاسم احبب ان اوضح لكم ..
الحدث..
اخي( رحمه الله) شاب انهى دراسته الثانويه بامتياز
....وكانت والدتي 0( رحمهآ الله .). تردد على اخي طوال العام قبل نهايته سوف اقيم لك حفلا يستمر ثلاث ايام .. المهم تبقى على نسبتك العاليه .. والدي ( حفظه الله) اشترى لاخي سياره نسيان فتك اللي كان خاطره فيها هديه نجاحه ..
واخوي من فرحته قال بوديكم فيها العمره مانبا نسير العمره بالطياره بنسير هالمره بالسياره ..
وكلنا مستانسين عليه وعلى فرحته ..
الفاجعه
تلقى اخي اتصال من مكتب رئيس الدوله ( حفظه الله ذخرا لنا ) بحكم نسبته المتميزة يحق له اختيار اي جامعه خارج الدوله لاكمال دراسته على حساب الحكومه
الا انا اخي كان يخطط ان يصبح طيار حربي يعشق مهنة الجيش والطيران يريد ان يقود طائرته الحربيه في يوم ما .. لذالك رفض البعثه وفضل الدراسه بالدوله في تحقيق حلمه ولامانع من ارساله بعد ذالك في بعثه في الجيش المهم ان يبقى يحقق حلمه الذي كان يردده لنا .. ساحلق يومن ما بهذه الطائره امام والدي ووالدتي وامام رئيس الدوله كي يفخرون بي ..
قال لي اخي ولأمي ولشقيقي الصغير .. اليوم عازمنكم على مطعم وعلى سينما وبالمره وموب اول مرة نطلع يعني اخوي متعود يطلع امي دايمن المطاعم والسينما وستار بوكس ويتمشون روتين في حياتنا
انا تعودت اطلع مع زميلاتي في الدوام نادر مااطلع مع اخواني وامي ..
المهم بيوم الحادث .. مالي خاطر اطلع واخوي الصغير كان في بيت ربيعه فطلع المرحوم وامي وبس ..
22/8/2010 ... تلقيت اتصال هاتفي من شقيقيتي تقول لي .. روحي مسشفى خليفه الحين قسم طواري بسرعه بتلقاج هناك ..
انا قلتلها شو السالفه تكلمي قالت امايه وبطي مسوين حادث بس ان شالله بخير يقولون سليمه ..
قلتلها منوه يقولج قالت برايج سيري مناك واختي مع زوجها يبالهم ساعه ونص شان يوصلون لانهم في منطقه العين ..
وقالت لاتخبرين باقي خواتي لين مانطمن عليهم ..
انا على طول سرت المستشفى . وجفت عالم اللي مكسر واللي مكسح اول مرة ادش قسم طواري ..
وطول الطريج يلست ادعي يكونون بخير ..
لاني اعرف سياسه الشرطه تقولك اهلك بخير عشان ماتسرع بالطريق وتسوي حادث ..
يوم وصلت اجوف ولد اختيه بما انه في الشرطه وتلقى من ربيعه اتصال في الموضوع وسبقنا و يقولي خالتيه يلسي اهني وصبري قلتله ابا اجوفهم من بعيد وخر وكانت الساعه 12
في الليل .. والوالد الله يحفظه وقته كان بايت بالمزرعه ومحد خبراه ...
لقيت اخويه .. وجفته بس موب اخويه اللي اعرفه .. ماجفت اي اجهزة شغاله جفتها مسكره كلها ..
وقتها .. ماقدرت اتكلم .. احس لساني مشلول ... وريولي ماتشلني ..
وانا جفته بس ماقدرت اصدق اللي اجوف .. قعدت عنده ساعه كامله بروحي اطالعه .. وماتكلمت بولا كلمه ساعه اطالعه واصيح ابا اصارخ موب قآآدره احس حد ماسكني .. ساعه اناظره بروحي بالحجره .. واحاول اشغل الاجهزة او اسوي اي شي المهم احاول اساعده انا موب دكتورة انا ماطلعت دكتورة تمنيت اكون طبيبه تداويه ولاتتركه ممدود
احسه كان يناديني يقولي ساعديني سوي شي لاتتركيني جي .. هذي موب النهايه ..
ساعه وانا اصيح والممرضه تقولي كلام مااذكره وانا ماهمست بكلمه وحده .. دزيت الممرضه بقو .. وفجاه اختي تدخل مع ريلها وتصارخ وزوجها يهديها
ولقيت حرمه كبيره في السن مااعرفها لقيتها اطبطب عليا وتقولي كلام مااذكره لاني اجوف اخويه جدامي ومااقدر اساعده ويابوا امي عند اخوي امي ماكان فيها ولا قطره دم بس كان جسمها منتفخ لانه نزيف داخلي والقفص الصدري متكسر
اخويه حبيبي اخويه صارله نزيف بالمخ .. وماقدروا يسيطرون عليه ومات بعد امي ..
اختي والاهل تجمعوا وانا احس نفسي دايخه وموب قادره اتكلم اجوف اخوي عمره 11 سنه وقتها كان يحبي من الصدمه وماد ايده يبا يوصل لاهلي بس رجوله خانوه من اللي صار ابا اقوم امسكه بس احس نفسي دايخه ابا هالكابوس ينتهي
وامي قررت تروح معاه ..
... ولد اختيه.. وزوج اختي اتصل بكل الجماعه هناك ووكلهم تجمعوا في المسشفى الا ابوي
قرر ولد اختيه يتصل بعمي اخوي ابوي وهو يخبره بطريقته عشان مايستويله شي .. كلهم سلموا على اخوي وامي واستسمحوا كل اللي كان موجودين من الاهل ..
انا بست المرحوم وانا يلست معاه ساعه كامله بروحنا وماتكلمت .. وعقب طلعت كلمه بالغصب مني وقلتله
الطيار بطي سامحني يااخوي قلت
جي بس كنت اقول بداخلي هاي موب النهايه
بعده صغير ياناس افهموني
مافرحنا فيه ...
وبست امي وحضنتها واستسمحت منها ..
اخوي الصغير كان يدز امي ويقولها قومي انروح البيت قومي امااه يالله قومي بنروح البيت ..
امااآآآ ه يالله
حراام قومي ويروح عند بطي يقوله بطي قووم بسمع كلامك والله بسمع كلامك ومابا اعآندك بس قوم ادري انت تتمصخر انا ادري انت تبا تعلمني ان الموت حق بس خلاص قوم انتهينا .. بصلي والله خلاآآص ويلس يصارخ ويصيح
من الجماعه يبون يشلون اخوي الصغير بس ريل اختي طلعهم من الحجره وطلع معاهم
وسكر الباب
أختي حضنت اخوي الصغير وقآلتله خلاص حبيبي خلاص الدنيا هاي جي ماترحم صغير ولا كبير خلاص لاتصيح انا مابا اخليك يلس يقول اماااه حراااام قومي انا خليفه امااااه خلينا نروح البيت
اتصلت بابويه حسيت اني اباااه مااعرف ليش ابااه .. رد عليا عمي وانا ماانتبهت للصوت يلست اقوله ابويه تعال الحين الله يخليك .. اباااك الحين ابويه وعمي قالي الحين في الطريج يابنتي ولايهمج وسكرت
عمومتي اثنين كانوا مع ابويه واخوي الثالث كان يدرس بالعسكريه من اول ثانوي وعقب رخصووه ينزل
وماشهد معانا الاحداث بس حضر الدفان ..
تخيلوا موقف ابويه ..
كبير بالسن يوم جاف ا امي واخوي ممدوين مسك قلبه ويته جلطه خفيفه تلاحقوا عليه الدكاتره
والحمدلله الحمدلله فضل من ربي تلاحقوا عليه الدكاتره فضل من ربي ..
واخروا الدفان عشان ابوي يقوم بالسلامه .. ماكمل اسبوع ودفنوهم مع اكرام الميت دفنه .. بس طبعن ابوي وقتها مارخصوه الدكاتره الا على مسؤوليه عمومتي يحضر الدفان ويرجع للمستشفى ... وطبعن ابوي حضر الدفان بس حضر على كرسي متحرك مايبون يجهودنه بالمشي .. وهو ماكمل علاجه ..
تدرون شو موقف ابوي يوم سار قسم الموتى .. جفت مشهد للحين مرسوم في بالي حضن اخوي ويلس يقول ياربيه انا عبدك وابن عبدك راض بقضاءك ..وكان يصيح مثل طفل صغير اسمع صوته واجوفه خليته يعبر ماوقفناه انا وخواتي واخواني الاثنين .. وباس راس امي ويلس يستسمح منها
من الحفل الى العزاء .. 3 أيام
تحول منزلنا الى العزاء حيث البكاء والألم ومراره الفراق وتجمع الاحباب والاصحاب ..
تحولت الذبائح الفرحه بالنجاح الى ولائم عزاء للحاضرين
تحولت هدايا النجاح الى صدقات عن المحروم
تحولت دموع الفرح الى دموع الام والحسره
تحول الثوب االبيض الكندوره الى كفن يطوي فرحه اخي بنجاحه
تحول قبره الى مقر للطائره الى عالم اخر ..
واستمرت الايام وانتزعت الفرحه من القلوب قبل الوجوه
اصبحنا جثث تمشي في المنزل بلا ارواح
اصبح الكل مشغول البال وبعيد عن الاخر
هذه النهايه المقدره لاسرتي
انا اتردد على المقابر وازور الاهل وماتركتهم .. خواتي تركوهم ابوي موب ابوي اللي اعرفه .. قليل مايدخل البيت وكل حياته سفر وعايش بعيد عنا ...
اخويه مسؤوليتي اللي صارت صعبه الحين اكثر من الاول تركت وظيفتي لاني داومت فتره وماقدرت استمر لقيت نفسي اقعد على البحر واصيح بروحي واسمع تلاوة السديس وقررت اترك وظيفتي لاني قمت اجوف نظرة الشفقه من زملاء عملي وانا ماباهم يشفقون عليا لاني خسرت ام واخو بوقت واحد ..وبعدين كرهت كل شي ابا اهتم في اخوي وبس
أخوي بطــــ ي
أخوي شلونك؟؟
مشتاقة لك يا أخوي..
مشتاقة لمبسمك وعيونك..
فراغ الكون بعدك..
يا هو كئيب البيت من دونك..
يا هو مشتاق لجنونك..
لا تسألنا عن الحال..
حالنا يا بعد عمري والله حال..
تبي تسمع أخبار؟؟ تبي تدري ش اللي صار..؟؟
أنا بعدك كرهت بوظبــــــــــــ ي ومافيها.
حتى شوارعها ومبانيها
أمي حبيبتي ..
أيـــــــــه مشتاقه .. للغلاك والغلا .. قلبـــ ي عطــآآك .. أيــــــــــه يما من سواك .. ولا أبد غيرك يموت ..
يمــآآ نبع الحنان يا عطر روح المكان الغلا باقي زمان وانتي اغلا من العيون ايه مشتاق لغلاك والغلا قلبي عطاك
ولا ابد غيرك يمون شوفتك تسوى كثير والله اني لك اسير حبك بقلبي كبير وانتي لج قلب حنون ضمتج تشفي عناي ..آآه يا بلسم شفاي ياحبك للجنون يما جم ابيج وراحتي بوسه يديج وقلبي صادق يبيج وانتي اغلى من العيون ...
اثق اننا سنجتمع يوما في مكان لا الم فيه ولا حزن ولا بكاء ..
الجنــــة .. اسال الله لي ولكم ان يرزقنا الجنه واسمحولي على الاطاله
..
التعديل الأخير تم بواسطة روضة بوظبي ; 16-03-2012 الساعة 02:55 PM
16-03-2012, 02:38 PM
ضوابط المشاركة
العرض الشجري