السلام عليكم ورحمة الله وبركاته

مشكلتي هالمره تختلف عن مشاكلي السابقه
ومن فتره حسيت بها لكن ما حطيت لها اهتمام
قلت يمكن فتره وتعدي بس اشوف الموضوع طول الحين
وانا اخاف هالشي يأثر علي طول حياتي او يتطور اكثر

مشكلتي باختصار .. اني صرت لما احاول اتكلم بسالفه او جمله طويله او اعبر عن اللي بداخلي مثلا
ساعات اتأتأ وسط الجمله او اشيّر ما اعرف اكمل الجمله تظل عندي هالحاله ثواني وتروح
هي صحيح ما تتكرر كثير لكن اخاف تتطور

مثال .. لما اجي اناقش استاذتي بالجامعه عن بحثي او درجاتي مثلا
اناقش بقوة بس بنص الكلام اتوقف واحس ماعرف اكمل الجمله
وساعات اكملها بس احس ابتدي اخربط بالكلام وماعرف اوصل المعلومه صح
حتى الكل صار يلاحظ ارتباكي بالكلام
خصوصا لما اكون داخله جو مع السالفه
وهالشي يفسرونه بقلة ثقتي بنفسي او اني ماعرف اوصل اللي ابي اقوله بالضبط
او ان حجتي ضعيفه او مثلا في حالة مناقشاتي في الجامعه هذا يعطيهم فكرة اني ماقدر اقنعهم بشغلي
وذا الشي يأثر على ثقتي بنفسي وعلاقتي باللي حولي يخليني ما اتكلم كثير
واذا بسولف افضل اني اكتب بالمسن او الوتس اب على اني اتكلم عادي مع اني انسانه اجتماعيه جدا

بقول شغله مدري اذا لها دخل بالموضوع او لا
لاحظت على نفسي اذا احط شي في بالي يصير لي حتى لو ما كانت نيتي اني اتشمت او اعاير احد
مثلا .. من فتره تعرفت على انسانه صادفتها بالعمره وهي كبيره يعني تقريبا 45 او اكبر
كانت عندها نفس المشكله تأتأه بسيطه في كلامها وتوقف بسيط وسط الجمله
بس ابدا ما تكلمت عليها ولا تطنزت .. كل الموضوع ان هالشغله ظلت في بالي لما اتكلم معها واركز عليها لان الشغله كانت جدا واضحه وحتى هي تحس بالشي وكانت تنحرج لما يصير لها هالموقف
خصوصا ان مشكلتها صارت مع احدى قريباتي بنفس العمر
والظاهر الله ابتلاني بنفس مشكلتها مع اني ما تشمت فيها ولا شي مدري ليش

مثال ثاني .. شخصيه قريبه مني لما يصير لها موقف وتقوله لي اعلق عليه او ساعات امزح معها عليه
بعد فتره بسيطه يصير لي نفس موقفها .. مثلا هواش مع صديقتها .. موقف مع اهلها او اخوانها
يصير لي تقريبا مثل الموقف

اخر مثال عشان توضح الصوره .. انا علاقتي مع اخواني حلوه ولله الحمد
وهم بسن مراهقه فطبيعي تصير عليهم تغيرات
واحد من اخواني صار له حب شباب بوجهه .. فكنا نتكلم معه ونمزح بخصوص هالسالفه
وانا بعد بيني وبين نفسي من داخلي افكر فيها وساعات اقول انا الحمدلله مافيني ووو
شوي ويطلع لي حبوب بوجهي انا بعد !!!!

يعني سبحان الله كل شي افكر فيه او يصير لغيري وافكر فيه حتى لو ماتكلمت يصير لي
مدري له دخل او لا .. ولا تقولون توسوسين لان هالشي جد صاير

هدف كتابتي للموضوع .. اشوف حل لطريقتي بالكلام
ملاحظة .. انا مو صغيره عمري 21 وقريب بدخل 22 اذا كان لنا بالعمر بقية
ويمكن بتلاحظون مشكلتي من خلال طريقتي بالكتابه هنا .. دايم تكون افكاري مو مرتبه وماقدر اشرح اللي ببالي بالضبط
وهل الاشياء اللي ذكرتها لها علاقه ؟؟
أبي حل تكفون والله يجزيييكم خير

__________________
اللهم اكفني بحلالك عن حرامك واغنني بفضلك عمن سواك
اللهم استرني فوق الأرض وتحت الأرض ويوم العرض عليك يا أرحم الراحمين