نورة ..

يمكن أخوات زوجي ما يدروا صحيح عن السبب ( في هذه أتفق معاهم ) ..
لإنهم أصلاً ما يدروا عن حركات أمهم و ما ينزلوا غير بالإجازات المدرسية ..
و لا يدروا إيش الحكاية بالضبط .. يحكموا عالظاهر و بس ..

و اللي ظاهر أمامهم ( دموع أمهم ) اللي تطلعها قدامهم و من ورايا و تكذب علي ..
و أي بنت ، طبيعي راح تنحاز لأمها .. لو كانت أمها أكبر مجرمة في الوجود ..

بس لو فيه وحدة عاقلة من بينهم، كانت جات و تكلمت معاي ..
و كانت حكمت بالإنصاف .. مو ينحازوا من غير عدل ..

لإنه هذه حركات أم زوجي ، و كم مرة عملتها مع ( سلفتي ) ..
تغلط على سلفتي ، و تطلع حالها بريئة قدام ولدها و بناتها و سلفتي ( تنضرب ) بالأخير ..

.
.

يمكن أم زوجي ( تعرف السبب ) بس تكابر و ما تقول لهم ؟؟؟

لإنها طبخت و أرسلت لي أكل بعد ولادتي ، و وقت العزا ..
و في العزا جلست معاها و تكلمنا و بست يدها و راسها و حضنتها و بكيت لإني افتكرت أمي ..

بس دحين أتوقع بناتها يعبوا راسها ..
لإنه كل يوم تلفونات بينهم ماشاء الله ، صبح و ليل ماشاء الله يتصلوا على أمهم و توصل لهم كل الأخبار ..

.
.

سيدة الموقف ..

وقت أخواته ينزلوا بالإجازات ، زوجي يتغير شوي ..
بس أنا أطنشششششش .. لإني أعرف ما يقدر يعيش من غيري ..

لو زودها ، خليه يروح لهم و وقتها بيعرف قيمة زوجته ..

و هو يعرف إنه ماحد بيوقف معاه في المواقف الصعبة غيري ..
كم موقف صار له ببداية الزواج ، و كلهم شالوا يدهم و قالوا ( مالنا دخل فيك )
و مرة شرطة المرور مسكوه عشان السرعة و كانت عليه مخالفات سابقة و حجزوه يومين ..
اتصلت على أمه أبكي، أبغى أحد يخرجه و ما قلت لأخواني عشان لا ينزل من نظرهم ..
لإنه مافي في عيلتنا أحد يتحجز حتى لو مرور ..

المهم، أمه قالت لي ( هذا زوجك و مالنا دخل فيه ، تصرفي إنت )
و هو محبوس ليلتين و عنده اختبار نهائي ،، و هما متجمعين كلهم عالغداء ..
و عازمين أقاربهم ..

عشان كذا ، هو يعرف إنهم يحبوه وقت الرخاء ..
بس وقت الشدة ، ما عندهم غير ( كلام ) و بس .. و من غير أفعال ..

و مرة قال لي بمزحة ببداية الزواج ..
( أمي ممكن بأي يوم تبيعني بقرشين و ما هميتها ) ..