رد : فرفشات ..!!
الله يسعدك اخي الفاضل المتفائل على الموضوع الطيب صراحة انا تذكرت موقف لأحد اولادي مرة كنا مسافرين لديرة اللي فيها اهلنا وجلسنا برى بحوش البيت انا وزوجي وكان محور كلامنا عن الخدمات اللي ما اكتملت في منطقتنا واللي بعضها متعثرة وكانوا الأولاد جالسين يلعبون عندنا قلت انا لزوجي شوف اغلب المشاريع هنا متعثرة ومو مكتمله واحس الشغل فيها بطئ جدا والولد كان جالس جنبنا قال ايوه والله يا امي انك صادقة حتى ناظري فوق بسم الله الرحمن وش اناظر قال شوفي القمر هنا عندهم مو مكتمل شكله ناقص هناك بالمنطقة اللي احنا فيها قمرنا مكتمل اطالع فيه مدري وش اسوي فيه من شدة القهر وابوه مات عليه ضحك رجعت سألته ليش تقول كذا الحين إحنا بآخر الشهر وطبيعي يكون القمر شكله كذا وبعدين هو قمر واحد ربنا خلقه لكل اهل الكرة الأرضية
طلع الولد فاكر مرة طلعناهم للبر في اليل يتمشون وكان وقتها القمر مكتمل بدر والولد كان وقتها مركز على القمر ذاك اليوم وكان يتأمل فيه وبعدها ماعاد اهتم او تابع تغيرات القمر خصوصا ان في المدينة من ارتفاع المباني والإضاءة ماتقدر تركز زين وتناظر وكمان البيوت متلاصقة ببعضها البعض ماتقدر تشوف اللي فوق بشكل واضح لاكن الديرة والمنطقة اللي نسكنها ريفيه والبيوت عليها احواش كبيرة وفيها مزارع والولد لا حظ وانتبه للفرق وحب يشاركنا انا وابوه في الحديث وجاب العيد المشكلة ماصدق راح يسأل جده وجدته وعماته ويقول لهم بالله انكم تقولون لي الصدق ان القمر اللي عندكم هو نفس القمر اللي عندنا في منطقتنا.
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 09-07-2012 الساعة 08:40 AM