رد : أفكر في الانفصال
غاليتي سيدة الموقف أسأل الله العظيم رب العرش العظيم أن يجعل لك من كل ضيق مخرج ومن كل هم فرج وأن يصلح لك زوجك ويجعله لك كما تحبين وان يصرف عنه كل شر ومكروه وكل رفقاء السوء
وان يعلق قلبه بالله اولا ثم بك وأولادك ثانيا
غاليتي سيدة اعتذر منك لأنه بعد كلام الإخوة والأخوات هنا مابقى شئ ينقال وارجو منك إعادة قراءة مشاركات الأخت الغالية بيتا والأخ الفاضل حمد البي بو ولا هانوا الباقين كلامهم كله درر نسأل الله لهم التوفيق والسداد والأجر من رب العباد
غاليتي سيدة الموضوع لا يستحق الإنفصال هدي نفسك وريحي بالك فكل مشاكلك لها حلول بعون الله وانتي إمرأة عاقلة وحكيمة كما عهدناك وشخصيتك قوية بعون الله ولاخوف على اي زوجة تتحلى بما تتحلين به من فطنه وحنكه فارجوك فلا تنهارين ولا تستسلمين واعتبري ان ماتمرين به سحابة صيف وتعدي إن شاء الله تعالى
وبالنسبة لزوجك كما يظهر لي إنه هناك رفقة سلبية يماشيها ويحب انه يتصرف كما هم يتصرفون مايدريك انه حتى بخيانته الهاتفية هو يجاريهم ويقلدهم حتى مايصير هو اقل منهم احيان الصحبة تأثر على الإنسان وهناك صحبة ليسوا من الإنس بل شياطين على هيئة بشر والعياذ بالله يزينوون كل فعل او قول سيئ في نفس من يصادقهم ويخالطهم واتوقع ان اصحابه مأثرين عليه من هالناحية كثير وساحبينه لجوهم بشكل كبير
وهنا دورك ياسيدة اعتبري نفسك في مهمه ومعركة لإسترداد زوجك وابو اولادك من بين هائولاء اللي يحيطون به فأنت على حق وربنا راح يعينك ويسهل لك كل شئ عسير بإذنه تعالى استعيني بالله وبقدراتك وحكمتك وحنكتك وفطنتك لجذب زوجك لك ولأطفالك سيدة الموقف لا أخفيك يااختي إني من احد المعجبات بك وبتفكيرك وبقوة شخصيتك ودائما كل حلولك ومساعدتك لإخوانك واخواتك هنا صائبة وناجحه وكلامك وتوجيهاتك لهم نافعه ومفيدة انتي هنا بمثابة الطبيب الذي يعالج مرضاه فكيف بطبيب يعجز عن علاج نفسه انتي الآن تمرين بتحدي كبير في حياتك وعليك ان تقفي شامخه وراسخه كالجبال ولا تجعلين الرياح والعواصف تهزك وتأثر على نفسيتك فأنتي انسانه ناجحة وطموحة وفيك خير كثير نحسبك كذالك والله حسيبك وتأكدي إنه التغيير اللي يمر فيه زوجك الحين ماهو إلا كبوة جواد وراح ترجع امور حياتكم اجمل واحلى من كذا بس تحتاجين قليلا من الصبر والهدوء والتفكير
واتجهي الى الله فليس لنا احد سواه نبث له شكوانا وهمومنا هو الواحد القادر اللي يغير من حال الى حال وانتي انسانه مؤمنه وصابرة ومحتسبة بإذن الله تعالى
وفكري معي قليلا يا سيدة فكري بسؤالي لك هذا وابحثي له عن إجابات في داخلك
سيدة لو زوجك مايحبك ولا يحب اطفاله ولا يهتم لأمركم ايش اللي يجبره يعيش معاكم وعنده بديل وعنده حرية مطلقة في حياته ويستطيع ان يتخلص منك ومن اطفالك في اي لحظة واي وقت خصوصا انه غير مبالي بأمورك انتي والأطفال
فااشوف انه زوجك يحبك ويحب اسرته ومستحيل يتخلى عنكم او يبتعد عنكم ولاكن هناك تغيير حدث في حياته وهناك امر سحبه منكم وخلاه يبتعد عنكم كثير وإذا بغيتي ترتاحين وتريحين اعصابك اكثر اجلسي معاه جلسة هادئة لو حدكم وناقشيه بهدوء وعقلانية وبوحي له بكل شئ يضايقك منه ذكريه بما مضى من حياتكم ايقضي في داخله ماضيكم وذكراكم الجميلة اللي عشتوها مع بعض قولي له كلمات بليغة وموجزة في نفس الوقت ومؤثرة حتى يصحى من غفلته وينتبه للي يصير في حياته
ويمكن انه خوفك على ابو عيالك من الإنزلاق والضياع في طريق مظلمه هو اللي مخوفك كذا اكثر من اهماله وعدم اهتمامه بالبيت واولاده وشئ طبيعي انك تخاف على اللي تحبه اكثر من خوفك على نفسك لأنك مخلصة ومتفانية في محبته وخدمته لاتريدين ان يحدث له اي سوء او انه يتصرف تصرفات تضر بنفسه وتؤذي سمعته وسمعت أسرته واللي يخيفك اكثر هي دعوات الناس عليه لاكن حاولي إنك تعرفين سبب دعاء الناس عليه يمكن يكون يدعون عليه وهو مظلوم يعني يؤدي واجبه في عمله او شغله وهم يرسلون له دعوات من ضيقهم وحنقهم عليه ممكن ان عمله اداري بحت او مكلفينه بمسؤليه في وظيفته واللي عنده يبغون يصيرون فوق النظام والقانون مثلا زوجي انا في مكتب عمله ممنوع الخروج من عنده للموظفين إلا بتصاريح من وحداتهم موقعه ومختومه يجي الواحد بدون هالتصريح ويبغى يطلع يمر من عنده ولأنه مستحيل وحدات هالموظفين تعطيهم تصاريح خروج يوميا قبل الدوام يجون لزوجي بالمكتب ويبتدون يحلفون ويحطون لهم اعذار يبغون يطلعون من عنده بدون تصريح إذن وهاذي مسؤلية عليه لو سمح لهم بالخروج بدون تصريح لأنه لو استفقدهم مدير وحدتهم انهم طالعين من عملهم بدون إذن او الواحد طالع ومسوي له مشكلة برى خارج العمل بيتحاسب زوجي على خروج هالشخص بدون تصريح خروج من عنده ولما زوجي يرفض ومايرضى انه يطلعهم من عنده يقومون يسبون ويلعنون ويدعون عليه وعلينا كلنا وان الله يبليه بمرض السرطان والفشل الكلوي اجارنا الله واياكم منها ولا بمصيبة ومايخلون ولادعوه إلاويدعونها عليه وعلى عياله واهل بيته وانه الله يبلاه بحادث سيارة والله لايوفقه في حياته ويلاحقونه بالرسائل والإتصالات ويعلم الله انه حتى سيارتنا بالشارع ماسلمت من مضايقتهم لنا لاكن زوجي يقول انا متوكل علىىالله وهذا عملي وربي يعلم بأني ما احب اظلم احد ولا اتبلى على احد خليهم يدعون الين تنشق حلوقهم انا على حق وهم على باطل إ نشاء الله ومايهتم لدعواتهم ولا لرسايلهم واتصالاتهم ويشهد الله اكثر من مرة يدق جواله ويرد على المتصل ويحطه سبيكر وانا جنبه ويقول له انت فلان الفلاني يقول له ايوه يرد عليه الله لايوفقك والله يحرق قلبك باللي تحبه من اهلك زوجي يسأله من انت مابيرد يجلس يدعي ويدعي ويتركه زوجي ويقفل عنه الخط ومايعطيه اي اهتمام بس انا والله اجلس خايفة من دعواتهم عليه زوجي يقول مادام انا جالس اطبق النظام حتى لو على ابني راح اطبقه ماعلي فيهم ولا في دعاويهم فتوقعي انه يمكن زوجك مظلوم من هالناحية بالنسبة لسيارات اللي يغيرهاكل شهر يمكن ان زوجك يمارس التجارة بالسيارات البيع والشراء ترى زوجي كان قبل كذا يمارس هالشغله بس خسر وتركها
والتمس لأخوك المسلم العذر فما بالك بزوجك ابو اولادك ياسيدة حاولي انك تدخلين لعالمه وتفهمينه او انك تريحين نفسك وراسك وتشترين راحة بالك وعيشي حياتك مع اطفالك وتأقلمي مع الجو مثل السابق واطلعي مع صاحباتك وعند جاراتك واخلقي لك جو ينسيك اللي تمرين فيه احيان لما تتفرغ لشخص في حياتك تركز على كل شئ خاص فيه وتبقى بالك وفكرك مشغول ومركز على كلى تصرفاته فأنصحك انك تغيرين هالنمط وتبدئين بنمط مغاير اهتمي ببيتك واولادك ونفسك وهو اتركيه ما تخلينه كل اهتمامك احيان هناك اشخاص في حياتنا لو ابتعدنا عنهم هم يجرو ورانا ولو اقتربنا منهم ولزقنا فيهم واعطيناهم كل اهتمامنا يملون منا ويبتعدون عنا لاكن خليك متوازنه بتعاملك معاه واخلقي لنفسك مساحة وجو خاص فيك حتى هو يفتقدك ويبتدي بالبحث عنك لأنه يفتقدك في حياته
سيدة انتي مازلتي صغيرة في العمر فلاتخلين المرض والتعب النفسي يتمكن منك اولادك في حاجتك وفي حاجة اهتمامك ورعايتك وانتي لا تخليين اليأس والإحباط والتفكير ياخذك منهم ويتعبك نفسيا وجسديا وبإذن الله تعالى انا واثقة انك راح تجتازين هالمحنة وهذا الظرف وان امورك راح تنصلح وتتعدل واللي مثلك ماشاء الله تبارك الله ماعليها خوف بإذن الله تعالى هي قادرة ان تقلب كل شئ لصالحها بحكمتها وتفكيرها النير وتعاملها الراقي ونحن هنا في انتظار البشائر بإذن الله تعالى
وعندي سؤال خارج الموضوع لايكون اللي صاير معاك فوبيا خبر مفرح قادم ان شاء الله في مثل هالأخبار تنعكس كل هرمونات الزوجات يعني بشكل ادق تأكدي انه مافيه شئ هناك ماندري عنه كبداية وحم او حمل ترى النفسية لها دور في مثل هالأوقات وربنا يوفقك ويصلح لك حال زوجك ويسعدك في الدنيا والآخرة يارب ويصلح لك اولادك وذريتك ويسمعنا عنك الأخبار الجميلة
ولك دعوة بإذن الله تعالى بظهرىالغيب وانا مسافرة يوم الأربعاء ان شاء الله تعالى وراح ادعي لك في ظهر الغيب بإذن الله تعالى دعوة مسافر ودعوة اخت محبة لأختها في الله
واستودعكم الله الذي لاتضيع ودائعه .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 10-03-2013 الساعة 06:52 AM
10-03-2013, 06:44 AM
ضوابط المشاركة
العرض الشجري