لماذا يتصرف هكذا /أخواني رجل الرجال // والبليغ..
السلام ورحمه الله وبركاته ..
أخوانيه من اسبوع وانا كاظمه غيضي ومتضايجه وايد لاني فقدت الثقه في ابوي تصرفاته خلتني ماأثق فيه أبدن
بتركلكم المواقف اللي صادفتني الفتره الماضيه وخلت ثقتي في ابوي تهتزز يوم بعد يوم .. لين ماصار اللي صار
الموقف الأول ..
من سنه ونص ابوي خبرني انه كافل ايتام في الهند عددهم اربع ويوم استلمت رساله واصله في البريد هالظرف فيه صور الايتام مع شهايدهم ورساله شكر وتقدير كل فتره يطرشونهم لابوي تفجات عدد الايتام 6
ويوم خبرت ابويه ليش ماتقولي انهم 6 وقلتلي اربع قالي ياروضه سامحيني ماانتبهت ..
طبعن ابوي كلمه سامحيني سامحني دوم في لسانه مع عياله او البعيد
الموقف الثاني ..
من فتره مايقارب 3 شهور او اقل
ذياب تفجأه يوم خذ البريد لقى فاتورة باسم واحد من العمال ومعاه صورة من تقرير انه المبلغ اندفع للعلاج ومن هناك راح العزبه علشان يسال العامل والعامل قاله انه بابا دفع علاج اخوه وذياب خذ وعطى مع العامل علشان يعرف ابوي ساعد منوه بعد وقاله العامل انه ساعد فلان وفلان وفلان
ذياب سارلهم واحد واحد وعرف الموضوع منهم
ابويه يساعد عماله بشكل مبالغ .. عامل حرمته محتاجه عمليه وابوي يدفع، الثاني بنى بيته وناقصتنه فلوس السقف ابويه دفع، الثالث يجمع فلوس عشان يزوج خواته وابوي ساعده ودفع , الرابع كان كافر وبعد مادفعله ابوي علاج لاخوه اسلم وقال لابوي يسميه وسماه عبدالله واهله قاطعوه تبروا منه بعد ماغير دينه ..
كل هذا ماكنت ادري عنه الا بعد ماسولف لي اخويه ذياب وخبرني باللي قالوه العمال ويوم سالته شو بتسوي
رد عليا ذياب قالي ابويه يفكر بأخرته وخلنا نحن عايشين دنيانا ..
ذياب موقفه سلبي ماحب يكلم او يتدخل بس تكلمت مع ابويه وخبرته ليش ماتقولي وانت طول عمرك ماتخبي شي عنا كلنا ليش هالمره قمت تخبي
قالي ياروضه انا دايما اوصيج من كنتي صغيره واوصي خواتج عمل الخير بينج وبين ربج ..
حطيت هالمواقف في خاطري وايد واحس انه استغلال لطيبه أبويه نفسه ..
الموقف الثالث والطامه الكبرى اعتبرها بالنسبه لي ..
بيتنا القديم الشعبي موب مأجر مسكره بيبانه من اسبوع وصلني خبر من بنت اختي انه عمها اللي هو ولد عمي ساكن البيت له ولحرمته وعياله حلفتني اني مااخبر احد انه الاخبار وصلت من صوبها وقالت اللي سمعت اخوها يخبر امها ويقول عمي سكن بيت يدي القديم بدون مايدفع فلس واحد وامها قالت يزاه الله خير ابويه طول عمره يحب الخير للناس ..
انا يوم خبرتني بنت اختي
ماخبرت ذياب قلتله قوم بنسير بيتنا القديم جان يقولي شو تبين فيه قلت قوم بنطالعه يمكن ناجره احسن من انه يتم جي قالي يالله وسرنا ذياب تفجأ انه البيت فيه احد ويوم دق الباب تلقته حرمه ولد عمي وعقب السلام والتحيه والكرام قالت جزاه الله خير ابوك فج ضيقتنا ذياب سكت وانا سكت حشيمه لابويه
ذياب قال روضه دفعه بلى البيت ماكان حد ساكننه قلتله بناجره قالي كم بتستفيدين من وراه ولاشي
قلتله خلاص لاتدخل انا حسابي مع ابويه قالي لاتعورين قلبه قلته هاييل ناس استغلاليين حتى عزى اخوك ماحضروا كانوا مسافرين ومافكروا يقطعون سفرتهم .. سكت وقالي بكيفج
خليفه كلمني قبل لااكلم ابوي وقالي روضه عشان خاطري اذا تحبيني لاتخبرين ابويه انج دريتي ولاتعصبين عليه قلتله ليش ماتباني اعصب وهم حتى جنازة امك واخوك ماحضروا قالي روضه امي واخوي ماراح يرجعون حتى لو احضروا مابيتغير شي
قلتله ابوك يوم طاح مريض ماطل عليه ولد عمك ويتشكرله بالسلامه حتى حرمته ماطلت وتحمدتله بالسلامه الحين وقت الحاجه تذكروا ..
ابصراحه يوم جفت خليفه متضايق تعهدله اني مااخبر ابوي ولاابينله واسوي نفسي مااعرف بالسالفه عشان خاطر خليفه وبس
وطلبت منه يركز بدراسته ووعدتني وخصوصن انه الحين هو في فتره امتحاناته ربي يوفقه ..
خليفه صورة ثانيه من ابوي عندي في البيت طيبته الزايده بتضيعه ..
لو لا ثقتي في الله وفيكم ماشاركتكم بالخافي ..
اخوانيه رجل الرجل والبليغ شوروا عليا شو اسوي وكيف اتصرف ؟؟ ولد عمي وحرمته ناس استغلاليه والا انا اتخيل ؟؟
ابوي كيف اثق فيه بعد اللي صار ؟؟ صرت احس اني غريبه عنه؟؟ (( كل مره يقولي سامحيني وماراح اخبي عنج مره ثانيه ويرد يخبي عني ))
التعديل الأخير تم بواسطة مارد الجنوب ; 11-06-2013 الساعة 11:30 AM
السبب: تم تعديل العنوان ليتناسب مع ضوابط القسم
10-06-2013, 07:19 PM
ضوابط المشاركة
العرض الشجري