تعبت نحب بعض وما نقدر نستغنى عن بعض ... - منتدى عالم الأسرة والمجتمع

06-11-2004, 02:09 AM

#33

ابوثنيان

شيف مع مرتبة الشرف

تاريخ التسجيل: Aug 2004

المشاركات: 978

اقتباس:

المشاركة الأصلية كتبت بواسطة هند ام احمد

والله تعبت ... ادعولي
صحيح نحب بعض ومانقدر نستغنا عن بعض .. وفي نفس الوقت مانقدر نحل مشاكلنا ...

فعلا تعبت
احيانا اقول انا مااصلح للزواج
تخيلو تقريبا يوميا مشاكل حتى في رمضان لا بل زادت في رمضان
قبل كم يوم كتبت موضوعي .. جهزي عمرك علشان تروحي بيت اهلك ..

وانتهت المشكله على مايرام ولله الحمد لكن في الحقيقه لم تحل هذه المشكله
يعني بصراحه على خبرك في المراه كلمه بسيطه تنسيها جبال هم تحملها بقلبها
وبعدها بكم يوم رجعنا نتكلم في نفس المشكله
فوصل ماوصل بيننا من جدال اليوم فجرا

وفجأه اجده يقوم من السرير ويلبس ثوبه ذاهبا بيت اهله
جن جنوني .. تتركني لوحدي وتذهب
خرج بالصاله وجلس ..

ذهبت انا ولبست عبايتي وقلتله ودني بيت اهلى
لان وراك عمل وما تقدر تنام وانا في الغرفه
صرخ في وجهي هل فعلا جن جنونك ..؟؟

والله ماني داريه وش اسوي واحس المشاكل الي اواجهها اكبر مني
وماني قادر اتحمل اكثر صرت لا شعوري ولاول مره في عمري
ادعي على نفسي بالموت وبعدها استغفر ربي واقول حرام هلي اقوله

قالو المشاكل ملح الحياة وانا مليت ملح ..

اختي ام احمد

الله لايمسيكي الابالخير

وش هاالحكي جعلك تحين

اسمحيلي اقولك ماعندك سالفه

اول شي موضوع اختلفتوا فيه وحليتوا المشكله كيفما شاء واتفق

وش هوله تفتحون الموضوع ثاني مره

ماتعرفين ان الحكي في الفايت نقصان العقل

يعني يعقل كل مشكله تقومين وتشدين بشتك وعلى بيت اهلك اعتقد انه ماهو بمنطق

ولاهي بعيشه

بعدين الرجال طلع ينام في الصاله خليه ينام في الصاله، وخير ياطير

احتمال ان رجلك كان يبي يوخر عنك في حالة الزعل والشد العصبي بقصد ان الامور ماتتطور

انتي تقولين كل يوم مشاكل ، اللى انا اسمعه من الناس اللى يدخنون يكونون شوي عصبين وقت الصيام ، المفروض انتي تجمديه لاتردي عليه اعطيه اشكل

واذا كان القضيه انه مافي عيال ياام احمد يااختنا الكبري ، تصدقين انا والله العلي العظيم بعد اكبر عيالى جلست سبع سنين بدون عيال من الله لاحبوب ولاموانع ولا اي شي

من الله انا سليم وزوجتي سليمه مافي مكان في العالم يخطر على بالك الاووديت زوجتي له
لدرجه انا كشفت على نفسي كل التحاليل قالت انتوا سليمين ، بمعني ان مسئلة الخلفه

بيد الله عزوجل ، بس مايمنع انكم تاخذو بالاسباب

ام احمد خليكي حليمه شوي ولا تحاولين انك تفتحين مواضيع مال امها داعي عشان لاتجيبين لنفسك المشاكل ونقعد احنا في المنتدى كل يوم والثاني نصلح بينك وبين رجلك

ام احمد الحياة يبيله صبر واهم من الصبر تطنيش

على العموم سكري الكمبيوتر وروحي لرجلك وسولفي معه وان شاء الله اموركم طيبه

والعيال بحول الله جاين في الطريق ، وان شاء الله خير ،هاالسنه بتشوفين الخير

بعدين وش هاالسولف اللى سمعته عنك انك جالسه تدعين على نفسك هذا انتي الكبيره والعاقله واللى ينشد فيكي الظهر تسوين كذه اجل وش خليتي للبزارين ، الله يهديكي

اتمني لكي حياة سعيده
اصغر اخوانك ابوثنيان
مكه المكرمه
فجر 23/9/1425

__________________

التعديل الأخير تم بواسطة ابوثنيان ; 06-11-2004 الساعة 02:28 AM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه