السلام عليكم ورحمه الله وبركاته

اتمنى انكم بصحه وعافيه جميعا انتم ومن تحبون

خواتي ابي رايكم اعتبرو نفسكم مكاني الله يسعدكم

عندي ولدي عمره ثلاث سنوات وسبع شهور تقريبا عنيييييييد وممكن ياخذ المركز الاول في العناد والمكابره والتحدي

اللي عنده احد اعند منه تواجهني<< تعبت نفسيتي من شخصيته

وللاسف اني عصبيه ونظاميه وحريصه وشديده معاه وحامل والنفسيه صايره زفت بزود عليه


وهو متعلق فيني بشكل كبير وماعنده ثقه فيني يحس اني راح اتخلى عنه في اي لحظه

خواف صياح زنان بس انه مايأذي احد غيري انا واخوه الصغير يعني ولله الحمد ماهو عدواني او يضرب او يكسر او قذر نظيف ومرتب ولايحب يوصخ نفسه ومهتم جداا بلبسه وشكله


طبعا انا عجزت الاقي حل لعناده لاني لازم احل مشكله عصبيتي اول وذي مالقيت لها حل

قررت << هنا مربط الفرس

اني ادخله روضه هالترم قبل مااولد عشان انا ارتاح نفسيا وهو يتغير شوي وتخف عصبيته ويتهذب سلوكه قبل النونو الجديد وتكون بدايه عشان السنه الجايه يكمل وهو هاضم الفكره ومتقبل الدراسه

انا ساكنه شرق الرياض ابي روضه قريبه عشان المواصلات يعني مااتاخر ع البيت لاني بروح اوصله واجيبه كل يوم عشان مايروح مع السواق لوحده

لقيت روضه عند بيتي اخر الشارع لسه جديده ورحت لهم

برنامجهم ترفيهي ع الغالب عشان عمره قالو مانعلمه كثير المدرسه كلها 21 طالب وطالبه من مختلف الاعمار ودامجينهم سوى والمدرسات وحده اردنيه وصوتها جهوري جدااا ولهجتها اردنيه وتخصصها مو رياض اطفال خبره فقط

وجايبين مدرسه ثانيه يدربونها تعليمها متوسطه وبارده ولااهتمت لولدي مركزه انها تثبت وجودها للاداره

المدرسه مافيها الا فراشه عامله نظافه ولو فيه احد يبغى الحمام ممكن توديه قالو لي كذا
والمديره والمدرسه فقط

الرسوم الترم 3600 ريال

طبعا ماقلت اردنيه من باب العنصريه بس ولدي يقول مادري وش تقول

طبعا داومت ولا فكرو انهم يشغلون الولد عني

قلت لهم الاحد بجي ادفع الرسوم

متردده كثير مااقتنعت وبنفس الوقت اقول اخليه يروح ويفك عن طاقته بغض النظر واخاف يتعقد اكثر لان المدرسه مو ذاك الزود واقول حرام ادفع هالمبلغ ع الفاضي واخاف يطفش وهم مايسترجعو الرسوم والدفع مقدم 2000 ريال

انا سمعت اراء كثير
احد يقول بدري عليه وحرام نص ترم ماررح يستفيد
واحد يقول لو درس في مكان كويس راح يتغير وانتي لو غاب عن عينك وفرغ طاقته بشكل سليم راح تكونين هاديه معاه واللي ماتقبله منك راح يتقبله من معلمته وعن طريق تهذيب المدرسه

والغالبيع قالو لاتدخليه هالروه حتى لو قريبه منك لان مافيها مقومات تبشر بالخير

محتاجه رايكم مره وابي اسامي روضات شرق الرياض مخرج 9 10 11 12 انا بحي الروضه ابي شي حولي مو بعيد وكم رسومهم وطريقه الدفع

بس للامانه تكون عن تجربه شخصيه لاني لو بسجله لازم يكون خلال هالاسبوع او بعد كذا ماعاد اقدر عشان لو سجلته اقدر اداوم هالاسبوع بعدين راح ارتبط بظروف تمنعني اروح اداوم كم يوم معاه وهو يستحيل يداوم بلحاله

بنات انتظركم بفارغ الصبر الله يخلي لكم اولادكم

تقبلو هالص دعائي وامنياتي لكم بالتوفيق والسداد