زوجي يستغلني ماديا واجتماعيا ..
السلام عليكم ورحمة الله
بداية انا اكتب لكم من جوال وبالظلمه ونعسانه يعني سوري مقدما ع الاسلوب
مشكلتي الرئيسية واللي منغصه علي حياتي احساسي ان زوجي مستغلني ماديا واجتماعيا
زوجي مطلق قبلي مرتين ولديه ولد وبنت وانا ايضا مطلقه بسبب عقم طليقي ..
عندما تقدم لي زوجي اشترطت عليه مالي دخل بأولاده وﻻ يسكنهم عندي .. امه ماشاء الله امرأه في الاربعينات وتقدر تتكفل بأطفاله غير ان امهم موجوده .. وافق وتم الزواج وﻻحظت بشهر العسل كذا مرا يستغل اي فرصه ويتكلم عن بنته وانها مطيعه وخجوله وزي العجين يقدر الواحد يشكلها على كيفه .. مشت الايام وقربت الدوامات وبحكم ان وظيفيتي بمدينه بعيد ان اهلي وعنه شخصيا اقترح علي يجيب اوﻻده عندي بس الين ما انقل لمدينته حتى ﻻ اشعر بالخوف ، وافقت بشرط اول ما انقل له يرجعهم لامهم عاشو عندي سنه هم وخدامتهم اكتشفت خلالها ان البنت عنيده لسانها طويل تنقل الحكي فضحتني بالمدرسه حيث انها كانت تدرس بنفس المدرسه اللي انا ادرس فيها ، غير كذا الشغاله غثيثه وماتسمع الكلام وتتصرف من راسها يعني مرت علي هالسنه ماحسيت باستقرار وراحه ابد ، وعزائي الوحيد اول ما انقل برتاح من هذا كله ..
بعد مانقلت رفض يرجعهم ﻻمه بحجة انها ماتقدر عليهم وانه مايرتاح وهم بعاد عنه ..
نجي لمشكلة الماده ..من اول ماتزوجت ﻻحظت زوجي يده ثقيله شوي من ناحية المصاريف قلت انا ليه احرم نفسي دام الله مغنيني ، صرت اصرف احيانن على نفسي الين صرت اصرف كليا على نفسي
الرجال شال يده من المصروف ..
غير انه لما نزل القرض العقاري طلب اخذ له قرض عشان يشري اﻻرض ووعدني هو اللي يسدد القسط شهريا
بداية رفضت بس لما شفته متأزم وحاب يبني خذيته له صار يسدد اول كذا شهر بعدها لما بدى بالعمار سحب
الحين وبعد ثلاث سنوات زواج لقيت نفسي اسدد قرض ماكل نص راتبي والنص الثاني اصرف فيه ع البيت وعلى عيالي وعياله
واذا وفرت لي اي مبلغ مايرتاح الين ياخذه ...
مني حاسه براحه واستقرار ببيتي خصوصا مع مشاكل بنته اللي كل ماتكبر تزيد
هو انسان غير مضمون خايفه بعد كل هالاستنزاف يرميني زي مارمى غيري ومستحيل اتزوج بياخذ مني عيالي
من اﻻخير احس خذيت اكبر مقلب بزواجي منه
ع فكره انا حبيته وهو حبني بس للاسف مشاعر الرجال غير مستقره وغير مضمونه ، وحتى لو استمر حبه لي انا غير سعيده معاه نهائيا
انصحوني خففو عني هل انا محمله الموضوع اكبر من حجمه او انا فعلا ملعوب علي
وكيف اتصرف ...
التعديل الأخير تم بواسطة داماس ; 07-05-2014 الساعة 08:20 AM
السبب: تعديل العنوان ﻹيضاح المشكلة
07-05-2014, 01:32 AM
ضوابط المشاركة
العرض الشجري