اخوي بو خليفة انا قريت كل مواضيعك و مواضيع زوجتك و أتألم وايد لوضعكم الي يزداد سوء يوم بعد يوم و خاصة الحين بينكم عيال ، في البداية زوجتك غلطت وايد بحقك و قصرت معاك وايد و انت كنت نعم الزوج وقفت معاها في محنتها و اهتميت فيها و حتى لما انجبرت تتزوج عليها لان رجل و محتاج زوجة تعطيك حقوقك ، ما تخليت عنها الاخر لحظة رحت تتطمن عليها و على أدويتها و قلت لها محد بياخذ مكانج و هذا كله بشهادتها هي

زوجتك تتألم وايد تتألم و انت مب حاس فيها مول ، هي مب قاعدة تتألم عشان زواجك الثاني لانها تعرف انها كانت مقصرة في كل حقوقك و اعترفت هي بهشي لانها مرت بظروف صعبة جدا و قوية و النتيجة قصرت معاك بس هي كل ألمها من زواجك الثالث لانها تقول عنده زوجة ثانية و مب مقصرة معاه و تعطيه حقوقه و انا بعد ما يبت عيال احاول اتغير و اعطيه حقوقه و ما اقصر معاه فليش يكسر بخاطري و يتزوج الثالثة و انا معاها في كلامها يا اخوي هي تغيرت عن قبل و عندك منها عيال و تحاول ما تقصر معاك و عندك زوجة ثانية بعد

و بيكون ردك انا مب مقصر عليها بشي كل شي متوفر عندها و انا ما سويت الحرام ، يا اخوي زوجتك ابدا ما يفرق معاها عدم تقصيرك لان هي من انولدت و عايشة في مثل هالمستوى و عن انك ما سويت شي حرام ، اخوي حتى هي طلباتها منك مافيها شي حرام الي اقصد فيها الدراسة و الصديقات و الخروج و هالامور بالعكس هذا يساعدها على الخروج من الدائرة المغلقة الي هي فيها و يحسن نفسيتها و مزاجها و يخليها تحس بالتفاؤل بالحياة ، هي عايشة بملل في نفس الروتين و طلباتها منك الصديقات و الدراسة و هالامور كلها عشان تغير جو و تغير الروتين و تختلط بالناس شوي و تتغير شخصيتها و بتقول هي شخصيتها ضغيفة و تخاف عليها وايد اي احد يلعب عليها

اخوي انت بتخليها تطلع بحدود معينة يعني سجلها جامعة غير مختلطة او معهد غير مختلط او تختلط مع زوجات اصدقاءك و ناس لهم سمعة طيبة ، سجلها بنادي نسائي او حلقات تحفيظ ، هي ام لأطفال الحين و مؤكد شوية من شخصيتها تغيرت بعد ما صارت ام ، و انصحك اطلع انت معاه كل اسبوع مرة غير جو معاها روح معاها الملاهي و المطاعم و البحر و لا تحاسبها وايد في طلعاتها معاك خليها تنبسط قد ما تقدر لان حتى خروجها معاك كان مرات معدودة جدا و كلها فندق و حتى اكثر الاوقات داخل الغرفة في الفندق و نادر ما تطلعون عشان هذا السبب اقولك غير من روتينك معاها...