الخوف حرمني النوم اريد حل
بسم الله الرحمن الرحيم
السلام عليكم و رحمة الله و بركاته
هذي المشكلة ارقتني صارت لها سنين مو من اليوم و البارحة و استخدمت اكثر من حل و ما نفعني غير واحد و هو انه احد ينام عندي بالبيت
المشكله متشعبة والله حتى انا عييت احتويها
مشكلتي اخاف اجلس ف البيت لحالي للعلم عندي بيت و عيال و شغالة و سيارة و الحمد لله
بس زوجي دوامه بعيد و يرجع نهاية الاسبوع و الادهى و الامر انه عنده مهمة ما بيرجع الا بعد شهور
كان المفروض نكون معاه بس علشان مدارس العيال و النقل صعب و حاول مسكين مع ادارة المدرسة الجديدة بس مافي امل الا بداية العام الدراسي
المشكلة الاولى:
انام مع عيالي لحالنا ف البيت و دوم تجيني كوابيس و افزع من النوم كثيييييييييييييييير
و تجيني نفضه و رجفة ف جسمي و اقرا قران لحد ما انام و بمجرد استغرق ف النوم افزع مرة ثانية و هكذا الين يطلع الصبح
اهلي انتقلو مسكن جديد و قريب مني ف قررت اروح انام عندهم يوم او يومين ف الاسبوع ع الاقل اعوض
و مافي مكان غير المجلس و كنب المجلس غير مريح للنوم
و كانت في غرفه فاضية و قعدت فيها و امي فديتها حاسة فيني
تقول بنخليها للمتزوجين يقعدون فيها ف غياب ازواجهم او ف النفاس
بس البقية رافضين و اخواتي يتجادلون ع الغرفة و انا اقول لهم خلوها لي بس رفضو و قعدت فيها وحدة من خواتي الله يصلحها
طيب بتقولون اقعدي معاها
انا عيالي صغار و يلعبون باغراض خواتي و خواتي يزعلون و يصرخون ع عيالي و طول ما انا جالسه ف بيت اهلي و هم تعالي شوفي عيالك تعالي شوفي عيالك تعالي شوفي عيالك لدرجة مرة قمت و جبت خيزران و ضربت عيالي ضرب بجنون و فشيت غلي كله عليهم
و امي تهاوشني من صوب و ابوي يحلف عليي ما اضربهم
بس انا طفرت
اكلم العيال بالطيب و المداراه بس مافي فايدة هم اطفال و فيهم طاقة و يحبون يجربون كل شي
كريمات ادوية مستحضرات حلويات ادوات صحية مكتبية و كل الموجود بالغرفة حتى الاثاث ما سلم منهم
احيانا اخواتي يقفلون غرفهم خوفا من اطفالي و انا ما الومهم بس ودي اجلس ف بيت ابوي شوي
اللحين المشكلة لو جلست هناك مثلا من العصر للمغرب طول الوقت شوفي عيالك ايش سوو شوفي عيالك شوفي عيالك ف مرة طفشت من كثرة حركتهم و ازعاجهم فاخذت عيالي و مشيت و هم يبكون خلاص اخر مرة
امي تقول خليهم هذولا اطفال
قلت لها ابد والله يرجعون البيت يتأدبون ثم اجيبهم و جلسنا 3 ايام تقريبا ما زرناهم و هم يترجوني خلاص ماما اخر مرة و امي فديتها حاسة فيني و تتصل تعالي خواتك ما يقصدون و هذولا عيال
انا ما زعلت لانهم يصارخون على عيالي
انا تضايقت
انه عيالي مزعجين بشكل و محد مستحملهم 
ف صار موقف و حز بخاطري كثيير لليوم يمكن من شهر
اشتقت لامي و رحت ازورها ف ما لقيتها كلمتها قالت انا جاية ف الطريق ف جلست انتظرها ف الصالة
احد عيالي احتاج الحمام و انتو بكرامه
و طبعا جميع الغرف مقفولة مافي غير حمام المجلس و المجلس له باب خارجي
اقول لهم لو مخلين هالغرفة لي كان راحت الحمام بدل المشوار هذا
و جلست انتظر امي حتى رجعت و فتحت غرفتها و راحت الحمام
جلست مع امي شوي و مشيت و فيني غصه
رجعت البيت للكوابيس و السهر و سهرت لين الفجر افز من النوم
و الصبح مالي خلق لاني سهرانه و مو شبعانه نوم
فبالتالي مالي خلق لاي شي طول اليوم
عطوني حلول
اولا : مشكلة النوم و الفزع ف النوم خاصة انه زوجي ف مهمة ما بيرجع الا بعد شهور.
ثانيا : مشكلة زيارة بيت اهلي والله اني اشتاق لهم و لجلساتهم و انبه عيالي قبل نروح اجلسو بادب و لعبو بادب بس هم اطفال و تصرفات الاطفال العفوية انا امهم اشوفها براءة بس غيري يشوفها مشاغبة و ازعاج .
عرضت على اخواتي يباتون عندي بس الى متى يباتون و اللحين يقولون ما نستحمل ازعاج الاطفال و هم من حقهم وش اللي جابرهم يجلسون مع الاطفال و ازعاجهم.
شكرا على حسن متابعتكم
__________________
احتاج افضفض بس ماهو عـلى الناس
الناس لا ترحم ولا تحفظ اسرار... ماقدروا ضيقة ولا شرهة إحساس
الله خلقهم بس .. نقالة اخبار
04-03-2015, 10:13 AM
ضوابط المشاركة
العرض الشجري