رد: لماذا كثرة المشاكل بين الأزواج
الفراغ .. الواحد من الفضاوة اللي عنده يدور أي شي يتمشكل عليه
الرجل والمرأه لما يكونون مشغولين وعندهم أمور أهم يسوونها تكون خلافاتهم أقل
الإقبال على الدنيا .. كل هم الزوجه تطلع كل يوم وتسافر ويمشي لها مصروف وقدره ويكون عندها خدامة وسواق وتشتري أحسن الماركات والزوج يبغى زوجة كااااااملة مافيها عيب واحد وطول الوقت يقارن بين زوجته والأخريات والطممممع حتى لو مرتاح ومقتنع بزوجته بس يقولك هل من مزيد يايعدد يايلعب بذيلة
المجتمع الجميل .. مجالس الحريم ومجالس الرجال فيها تخبيب غير طبيعي حتى لو كان بشكل غير مباشر محد ينصح بالخير والصبر والعطاء واللجوء الى الله من النصايح اللي تسمعها تحس أنك داخل حرب مو زواج
قلة الثقافة والوعي .. المقبلين ع الزواج أكبر همهم بالذات الرجال ليلة الدخله والبنات تبي من البداية تمشيه على كيفها
المفروض الأهل يجلسون مع عيالهم وينصحونهم ويعلمونهم ويثقفونهم وإذا مستحين يشترون كتب ويعطونهم اياها كهدية زواج
مافيه صراحة و وضوح بالعلاقة .. أحيان كثيرة تلقى مشاكل الزوجين أنها فهمته غلط أو الزوج مو عارف كيف يفسر تصرفاتها والواحد من البداية لو فيه شي مضايقه مايتكلم لييين يكبر الموضوع وبعضهم يتخذ الهجر وسيلة تأديب والمساومة على العلاقة الحميمية
تربية الأولاد .. كثييييير أزواج كل تفكيرهم بالطرف الثاني ناااادرا تحصل أحد معطي أولاده الأولوية كيف يربية كيف يطلع قدامه بأحسن صورة كيف يكون أب جيد أو أم ممتازة كيف مايخلون عيالهم يحسون بالمشاكل اللي بينهم عشان ماتتعب نفسياتهم والبعض للأسف مخلي عياله ورقة يلعب فيها بالوقت المناسب أو وسيلة ضغط
بالمختصر ركز على نفسك كيف تطورها وتحسنها وأقرا كثيييير عن تطوير الذات وعن العلاقة الزوجية أدخل دورات حتى لو لك سنين متزوج أعطي أولادك الأولوية وأفصل علاقتك فيهم عن علاقتك بأمهم خل كل همك بالدنيا رضى ربي عليك قوي الوازع الديني عند عيالك وزوجتك أمور البيت ماتطلع لأحد ولازم الأطفال يتعلمون هالشي من الصغر مشاكلكم لحد يحس فيها حتى عيالكم مارسوا هوايات تعلموا شي جديد أشغلوا أنفسكم بأشياء مهمة تعلموا القناعة والعطاء وخليكم دايم صريحين مع بعض والمشاكل حلوها بوقتها ولو أيش مايصير ومهما كبرت الخلافات لاتطلع زوجتك من البيت
والله يعين