سبحان الله في أمور كثيرة غريبة تصير مؤخراً
يمكن انا تجاوزت مرحلة الصراعات النفسية الشديدة
و حاليا بمرحلة تفكر في نفسي

كل يوم تمر علي آلام و يدخل علي ابليس من هالمدخل
و يقول ارجعي له راح ترتاحين ؟

أتذكر فقط انه هالالم كان سابقا سبب في كسر توبتي
و رجوعي قبل كذا

هذا الموقف ، هذي الإنسانة دفعتني دفع
هذي الفكرة

أمور كثيرة جالسة اعالجها في نفسي
عشان اتجاوز مسالة اني ارجع لأي سبب من الأسباب

في شي انا ابغى أقوله /
انا كنت متعلقة اكثر بمسألة الارتباط و العفاف مع شخص محترم
اكثر من تعلقي بالشخص نفسه

و يمكن هذا اكثر شي يدوخني بحياتي عموما
تعلقي و تمحوري حول الفكرة العامة فقط

مثلا بالسابق تأخرت بقطع العلاقة جذريا
رغم توبتي
يعني كنت أتوب و مع كذا أوضح له انه لسه في مشاعر تجاهه
و السبب اني ما أتقبل الخسارة ابدا

اللي أخرني 4 سنوات اكتب في هالمنتدى قصتي
رغم اني مسجلة من فترة طووووووويلة بمعرف آخر
و متواجدة
عدم رغبتي بأني أصير عظة و عبرة لغيري
هالشي جداً يوجعني
اني أصير بالنهاية قصة مكررة قديمة تنحكى عن ساذجة عرفت ذئب

رغم اني كنت أئن من الألم النفسي
و كنت متأكدة من حاجتي الماسة للإستشارة

عموما المشكلة ليست في تمحوري حول الأفكار العامة
المشكلة فقط ان ها لأفكار مرات تكون غير منطقية او بلهاء
و مع كذا اسير حياتي عليها

في شي هاليومين افكر فيه بعنف
قبل سنة تقدم لي شخص بمواصفات ممتاااااااااازة
و كنت موافقة و مبسوطة
يوم جا تحديد يوم العقد
فكرت و قلت انا للحين متعلقة بهذاك الشخص
بشكل جنوني
بظلم الرجال كليا لو وافقت عليه
استخرت الله و كنت احس ب ضيقققق
مدري هالضيق شي عاطفي او لا
بعد كذا رفضته
لاني كنت عارفة نفسي و حابة أعطي نفسي مساحة
ادخل فيها ب زواج مع انسان محترم
و اقدر اعطيه عيوني

كنت بهذيك الفترة مهشمة و مالي قدرة على العطاء ابدا
و متعلقة كلللليا

بس الحين اتفكر أقول ليش كذا ؛ (
طيب انا الحين مستعدة

يمكن اللي فجر هالشي فيني
و أفكاري عن هالموضوع
كلام ابوي لي قبل امس
سألني : فلان تزوج ؟
قلت ماعرف عنه ( سألني لانه جاني من طرف صديقتي )
قال تدرين انه انسان كويس و حتى سالت عنه
و كلن يمدح فيه

حسيت بحسرررررة
بالذات انه اللي تقدموا لي بعده اقل منه
ما جتني الفرصة الممتازة اللي تخليني أنسى ..
يلا الحمدلله على كل حال

.
شي اخير
يمكن تظن من تكرار ذكري لتفاصيل علاقتي القديمة
شدة تعلقي للآن
لكن الحقيقة ان الشخص ما يطري على بالي ابدا
الا لحظة ما افتح مربع رد و أرد عليك
يمكن لاني احس بعض الأمور محتاجة توضيح فقط
لكن بالنسبة للتعلق و العواطف
بدأت أهدم هالجانب من سنتين
قاطعت الشعر قراءة و كتابة رغم اني شاعرة
لانه يهيج مشاعري ناحيته
قاطعت الروايات و الأغاني و المسلسلات و الأفلام
ما أبغى امارس او اسمح لأي فكرة تدخل عقلي
و تشوشني و تعيشني جو العاشقة الولهانة
بالذات و انا حقيقة أتعذب من مسالة تقصيري في حقوق الله عز و جل
هذي السنة من بدايتها بدأت كثير من العواطف تموت و تذبل
ً الحمدلله هذي نعمة من الله

يبقى الان مجرد وساوس شيطانية
و صراعات نفسية مع واقعي الخارجي و نفسي
ولازم أتعامل مع هالامور بشكل صحيح
و ما أتهرب منها لطريق الحرام
و الله يعينني