رد: طفلي ومايعانيه
ملكة الله يكون في عونك ويعظم أجرك ..اذا كانت تربية اطفال طبيعين جهاد فكيف
بطفل له احتياجات خاصة
لكن يا حبيبتي ليه تتكلمين وكأنك جازمه ان اللي فيه توحد؟
ترى كل الاعراض اللي قلتيها وأكثر منها فيه من الاطباء (الفاهمين) يعتبرونها عااادية في الاطفال
تشخيص التوحد عندنا لا زال فيه اختلاف كبير.. هذا التشخيص أما العلاج يوصل للتجريب الله المستعان..
اصلا كثير ما يعرفون ان تحت مسمى التوحد عدة أمراض أو متلازمات بينها اختلاف دقيق
في التشخيص وبالتالي في طرق العلاج والتعامل مع المصابين فيها يمكن 4 أو 5
متلازمات.. فيه جهل كبير ويطلق عليها كلها توحد !
اذا كنتي سويتي له فحصوات في مكان موثوق انصحك ارسلي صور للتقارير لأي مركز
متخصص في الخارج في امريكا أو الاردن.. ترى الاردن محد وصل للي وصلت له في علاج
التوحد على مستوى الدول العربية كلها..
احد المعارف مدخل ولده من اكثر من 15 سنه في مركز في الاردن ووقتها ما كنا نعرف ان
فيه شيئ اسمه توحد لولا انه لاحظ ان ولده مو طبيعي بعد ما وصل عمره 7ـ8 سنين
وتشخصت حالته في امريكا ونصحوه بهذا المركز في الاردن..
زمان كان عندنا جيران عندهم ولد يمكن عمره 3 سنين على الاقل ماكان يتكلم ابدا ولا
يلعب مع الصغار ولا فيه أي تفاعل طفل غريب الاطوار .. كنت وقتها طفله عمري يمكن
عشر سنين لكن ملاحظة غرابة هذا الولد
عمري ما سمعت له صوت أو حتى يبكي أو يلعب مع اخوانه او يطلب أكل ..
كانوا اهله شاكين ان عنده اعاقة أو بالاحرى يتعاملون معاه كأنه اصم وابكم .. لما امه
تشتغل في البيت تحطه في الشباك يطل علينا واحنا نلعب في الحوش وبدون أي ردة فعل
لا ضحك ولا بكاء ولا ينزل لحد ما تنزله امه لو يجلس طول النهار كنت انقهرعليه ومستغربة
منه واجلس اناديه باسمه واحاول اغريه بالالعاب اللي نلعبها وكأني أكلم
الجدار ،، مرة اخوه صاح فيني قال لا تتعبين نفسك هذا معووق ما يسمع !
والله العظيم اني كنت اتخيل ان الجدار بيطيح والولد بيظل معلق في الهوا بدون ردة فعل
..لكن ما يئست دايم اكلمه على امل يرد ولا يبتسم على الاقل... سنتين وانا على هذا
الحال.. وفي مرة سافروا في العيد ولما رجعوا اليوم الثاني جاتنا امه وهي بتطير من
الفرحة بس سلمت وتقول ولدي تكلم ولدي يسمع ويتكلم 
تقول انهم بعد ما وصلوا عند أهلهم كالعادة حطت الولد في الشباك وهم جالسين
يسولفون وبعد وقت طويل ..فجأة الولد ينادي بأعلى صوت سحااابة تقول صرت ابكي من
الفرحة واللي حولي يسالون مين سحابة؟ ههههه
المهم الولد طلع مافيه الا العافية وصار يتكلم عادي جدا وصار يلعب معانا بعد اربع سنين
تقريبا وهو ع الصاامت وأهله يعاملونه انه متخلف عقليا مو بس اصم وابكم..
الحمد لله عندك من الوعي والحرص اللي يبشر ان ولدك بإذن الله بيكون بخير.. بس كله
يعتمد على تشخيصه السليم والدقيق اللي بيريحك انتِ كمان في طريقة التعامل معاه
بدل ما تشتت جهودك في تجريب طرق العلاج..
وان شاء الله مافيه خوف عليه.. وقدامه العافيه.. الله يطمن قلبك عليه ويكتب أجرك
على تعبك معاه..
__________________
ما يكتبه الله لنا ألطف مما نُحب ..وأعظم مما نطلب ..وألطف مما نشاء ..
[IMG]http://im67.***********/mg87DX.gif[/IMG]
15-01-2016, 04:21 AM
ضوابط المشاركة
العرض الشجري