مساء الخير على الجميع


تخيلو وبعد تقريبا 8ايام من ارسالي للرساله
وطبعا قراها ولا رد

ارسل اليوم
وعليكم السلام ياأم فلان
الله يكتب اللي فيه الخير لنا إن شاءالله

وارسل بعدها على طول
اني ابي امر فلان اللي هو ولدي

الحين انا مدري وش مقصده من رسالته
اولا ونعم بالله وهو اللي بيده سبحانه كل شي
بس الواحد المفروض يسعى صح والا لا؟!!!
مو يحط رجل على رجل ويقول الله يكتب اللي فيه الخير
وهو حتى ماسعى ولا سوى اي شي

يعني الغلط وجاني منه
والطلاق وهو اللي طلق
والرجعه وانا اللي بادرت فيها
وش افهم من رده؟!!

ماادري يا انه يبي يخليني على امل
لان عارف وواثق بحبه بقلبي
ولا يبيني اتزوج عشان اربي ولدي

او يبي يشوف وضعه اذا نفع
واذا مانفع قال فيه اللي جالسه تنتظر خليني ارجعها

انا ماادري وش المقصد من رده
والله لو مارد عندي افضل الحين احس احترت
هو يبيني صدق والا يتلاعب فيني

ومره اقول يمكن رد
عشان خايف اني امنعه من ولده
مع اني مستحيل اسويها

انا ماادري ليش مايقولها بصريح العباره افقديً الامل مني

دايم فعقلي احط له اعذار
ممكن اللي فيه سحر
ممكن منجرح من ردة فعلي
ممكن و ممكن
جد والله تعبت
قهرني قهر مايعلم فيه الا الله
وفوق هذا كله جالسه احاول اتناسى فعلته او بالأصح
افعاله القبيحه عشان نرجع لبعض
واجيب لولدي اخوان عالاقل يكونون من نفس الاب
حتى لو كان ردي
لأن اساسا بزماننا هذا وعلى اللي اشوفه
اغلب الرجال مامنهم فود اسم زوج وشكل اب قدام عياله

بس يظل وجود الاب للأولاد استقرار داخلي لهم
حتى لو مامنه فايده
ولاحد يجي ويقولي غير هالكلام
انا شايفه هالشي بعيني على ولدي الله يحفظه لي
مافي شي بالدنيا الا ووفرته له ماشاءالله
ولكن يظل 24ساعه يسأل عن ابوه
وليه وليه وليه هذا وهو طفل
اجل كيف اذا كبر
ومعروف الولد كل مايكبر يحتاج لرجل

واخوان الام مهما كانو كويسين بس بيظلون مشغولين بدنياهم
محد فاضي لأحد بهالزمن

الحين وش افهم من رده
تتوقعون يبيني؟
بس لو فعلا يبيني وش راده مايجي يكلم اخواني

واذا مايبيني
ليش يرد ويخليني على امل
حسبي الله ونعم الوكيل على كل انسان
يتلاعب بمشاعر انسانه طاهره ونظيفه ومااخذ منها الا كل خير

__________________
أم لأجمل طفل 👦🏻
ماشاءالله لاحول ولاقوة إلا بالله
اللهم متعني ببره في حياتي