راتبي وزوجي! - منتدى عالم الأسرة والمجتمع

02-01-2017, 02:29 PM

HHL

عضو دائم

تاريخ التسجيل: Aug 2016

المشاركات: 83

راتبي وزوجي!

السلام عليكم
اول سنة من زواجي ماكنت موظفة وبعد الولادة بمنتصف النفاس توظفت , واللحين امشي بالسنة الثالثه متوظفة

مشكلتي ,,,,
الفلوس والراتب
انا احس اني اصرف على البيت ويخلص الراتب
وبالاخير مااحس اني اشتري شي واضحه معالمه
اتفشل اني اطلب منه فلوس ’ دايم اذا رحت للسوق مقاضي بنتي ونفسي علي , مطاعم خرابيط كلها علي , حتى الهداايا , هدايا زواج لناس من طرفي , هدية بيت جديد لناس من طرفي , هدايا ولادات لناس كلها علي , اللهم عشان مااظلمه , اذا كان هو معنا يعني رحنا للسوق سوى هو يحاسب وهكذا , لكن غالبا يحطني بالسوق ويروح , حتى مايقول لي تبين فلوس. تبين حاجه؟ مايعطيني الا اذا طلبت منه واذا طلبت مبلغ قوي يجلس يدقق وليه وليه واحيانا ماايعطيني المبلغ كامل , مع انه قادر ماديا ومارح يغير من وضعه شي .. انا تعبت بصراحه لاني ابي اجمع من راتبي مو طبيعي اني متوظفه سنتين وماجمعت ابدا مبلغ!!!!!!!
وانا مقتنعه بالشراكة , لكن احس اني هالفترة هو متكل تماما ومايعطيني ولاشي والله راتبي يروح واذا شفت وين يروح!!! مالقى شي !!!
يعني شاشات البيت ومجلس كامل واغراض الضيافه كلها انا شاريتها السفر كل سفراتنا النص بيني وبينه وعادي دافعتها وانا مقتنعه , اقلها دفعتها بشي واضح اشوفه واحب اني اساهم بامور البيت , بس انا متضايقه من المصاريف اليومية .. اللي تاكل من الفلوس اكل واللي احس انه من واجب الزوج مو واجبي انا بس
يعني ادخل السوبر ماركت لحالي واتقضى وحسابي 700 او 1000 واحيانا زياده وادفع , خرابيط خرابيط خرابيط , وياليتها مره لا تتكرر كل شوي .. مو بس بالأشياء الكبيرة , حتى الصغيره , عادي نوقف عند بقاله ويلتفت علي ويقول مامعي عطيني عشره خمسه ميه ميتين .. احس اني مكينه صراف مو زوجة
مشكلة زوجي بااااااااارد ومتكل يعني لما احتاج شي للبيت يجلس يطلع روحي لين اطفش واروح انا اشتريه , اصير محتاجته وهو انسان بارد يطفشني كل شوي يطلع اعذار لما اطلب منه اننا نروح نشتري .. مالي خلق ماينفع ومعنا البنت بنتبهذل .. تاخر الوقت , مواعد احد .. ولسته اعذار طويلة .. وصبر ماعندي صبر انا حاره وابي الزين .. بس اني اللحين بديت اتعب وحاسه انه مو مقدر هالشي , مره بحديث ضحك بيني وبينه جرحني وعرفت منه انه مايقدر كل هالاشياء ويحس انه هو اللي ماسك البيت واللي اسويه مايجي في عيونه , ويحس اني الطماعه اللي تطلب وتبي ومو شايف اني انا كثير اشتري واساهم .. وما راددته ولا ناقشته ,, بس انصدمت وسكتت وحزنت بخاطري .. بس قلت لازم هنا اتصرف لاني مو ماشيه بطريق صح .. انا اسوي هالامور عشاننا وبالاخير بنظرك انا كذا .. فكرت اني اكف يدي نهائيا عشان يحس بالفرق , بس ماقدرت ولا طاوعني قلبي ... بس اقلها يعني ليته قدر واقول فدوه بس حرتني كلمته ومن عقبها انا جيتكم وقلت لازم اشوف حل , بعد كل هالاشياء كذا يشوفني؟؟؟!
اول حل ( فكرت بسالفه مصروف شهري ) يكون مصروف لي ولبنتي شهريا يعطيني وانا اتصرف فيه واذا بغيت حاجه زياده انا ادفعها من فلوسي ماعندي مشكله ..
حاولت اني اطرح الفكرة لكن تجاهل وماتحمس ..
انا مو حاسه ان معي زوج يصرف علي محتاره مره ماابي اطلع بمنظار البخيله ولا بمنظار اللي تكب كب ..
ايش التصرف الصحيح ومابي اصير اكب عليه كب , كل من قلت له قال لي ليه انتي كذا لاتعودينه , ولاادري اخاف , وش تنصحوني لاني لسى ببداية زواجي بكرة يجيني اطفال ويكبرون وتكبر المسوؤلية ويصير هو فاك وانا اللي ماكلتها , وماينفع اني كل شوي اقول له هات هات لانه من النوع اللي يحاسب ويدقق , هل تشوفون فكرة المصروف تنفع؟؟ او اني انا افك يدي شوي؟ مع اني مااقدر وانا اقولكم ليه .. مثلا اغراض الضيافه , ماعندي سفره ماعندي طقم بيالات كاسات زمازم خرابيط الضيافه كلها مو عندي ودايم اطلبه خل نروح نشتري عشان نعزم اهلك واهلي خل خل.... وهو كل شوي يصرف لين انا طفشت ورحت وشريت وكلفتني كل الاغراض مع زيادة لتكميلات المجلس حوالي الخمس الالاف وهكذا حنا عايشين ابغى الشي مايرفض ولا يقفل لين اطفش وارووح انا اشتريه! مااني عارفه ايش الحل ...
لان بكرة انا بيثقل علي الوضع اذا كبرنا وكثرنا وبيصير متعود على هالوضع ومااقدر اتغير عليه فجأة فا ايش التصرف برايكم , خصوصا الرجال وش تشوفون الصح ان الزوجة تسوي..؟ مهما كان احس الرجال يحب يحس انه رجل البيت وانه يصرف على بيته مادري ليه زوجي منبسط على الوضع

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه