السلام عليكم
في البداية أحب أتكلم عن نفسي بشكل مختصر حتى إذا دخلت في مشكلتي ،اللي بيعطيني رأيه يفهم مقصدي
انا انسانة لطيفة في التعامل ، مع الكل وما أفرق بين رجل و امرأة لأنه طبع فيني وكلمات الشكر والاحترام شي متأصل فيني : مثلا : شكرا / جزاك الله خير لو كان الشي بسيط ومايستاهل الشكر عند بعض الناس .. ولو طلبت من أحد شيء ضروري عندي أستخدم هذه العبارات : لو سمحت / اذا ممكن / لو تقدر وغيرها من العبارات اللي تستخدم بين البشر بشكل طبيعي وعادي .
مشكلتي مع بعض الرجال ، خصوصا لو كان لي احتكاك دائم به، يعتقد بتعاملي هذا أنا أستلطفه أو إني قاعدة أعامله معاملة خاصة و هو مايدري إنه هذا أسلوبي مع الكل !
وماتتوقف المشكلة لهذا الحد، سبق وكانت لي مواقف كثيرة متعلقة بهذا الموضوع وبعضها كانت راح تتحول لمشكلة حقيقة لكن الحمدلله بمساعدة العضو أخي في الله اللي أحترمه جدا و انا ممتنة لكل وقفاته معي ، تجاوزتها كلها ، لكن كل ما أمر بموقف مشابه أحتار كيف أتصرف؟ وما أعرف هل المشكلة فيني وفي طريقة تعاملي مع الرجال ؟ أم المشكلة فيهم وفي قلوبهم المريضة؟!
ولو كانت المشكلة فيني كيف أحلها ؟! هل أغير أسلوبي وطبعي وأصير مثل بعض البنات لما تتكلم مع سائقها ترفع صوتها عليه وبس تخاصمه وماتحترمه؟! ولا أستمر على ما أنا عليه وأطنش لأني صح؟!
وحتى تفهموا قصدي كويس بذكر لكم آخر موقف حصل معي، عندنا سائق يوصلني الدوام مع أمي، يوم تكون أمي موجودة ساكت ومايتكلم الا في حدود و يوم تغيب أمي من الدوام أحسه يستغل الموضوع ويفتح مواضيع معي ويسأل وكأنه يبى يسولف، انا طبعا مرات أرد بكلمة ومرات أطنش .
مثلا سألني اليوم: اليوم أربعاء ولا خميس!!!
وسألني عن رقم شحن بطاقة سوا!!!
وقاعد يتكلم عن عياله و مدارسهم وكلها سواليف أنا ما سألته عن أي شي منها!!!
وقبل فترة كان يقولي ليش ما اقدم شغل في المكان الفلاني رواتبهم حلوة !!!! ويقول فيه وحدة كان يوصلها تشتغل في هذا المكان وراتبها كذا وكذا !!
مابقي إلا يسألني كم راتبي الحالي وهل انا مرتاحة في عملي أو لا !
هذا موقف واحد من ضمن مواقف، ومو بس مع سائق يصير حتى مع عضو في منتدى أو دكتور ،، يعني انا مو من نوعية البنات اللي هي بنفسها تبي تسولف ومطيحة الميانة ، بالعكس انا حاطة حدود وحواجز وما أتكلم إلا في حدود اللي بيننا سواء كان عمل أو معاملة أو خدمة أو استشارة لو كان دكتور مثلا، فما أدري ليش يصير لي كذا؟؟؟
بصراحة انا منزعجة جدا،، بعض الرجال ما أدري ايش يحسو فيه مهما حطيت حدود وحواجز، يتجاوزوها .. ما أدري أيش الحل معهم؟!
هل الحل أصير قليلة أدب وأرفع صوتي وأخاصم عشان يلزموا حدودهم؟!


أعطوني آرائكم و جزيتم خيرا