السلام عليكم ..
أول ماتخرجت وتوظفت تزوجت على طول .. بس للأسف الزواج الأول كان فاشل لأسباب كثيره منها عدم الحب وعدم التفاهم .. بس مابي افتح موضوع زواجي الأول لأنه من جد ممسوح من ذاكرتي .. بس رزقني الله بمولود من زواجي الأول .. يعني اول مولود لي من طليقتي وعايش بعيد عني

في زواجي الثاني قبل 3 سنوات تقريبا .. تأسس على حب والحمدلله .. وعشنا أجمل اللحظات .. وخصوصا انا .. احبها لدرجة الجنون .. عشنا فترة طويله مرتاحين وبدون أي مشاكل .. بس كنت أفكر بالمولود اللي عايش بعيد عني .. صح اني اشوفه من فتره لفتره (طويله) .. وأحاول اعوض له حنان الأب .. بس المشكله انه بعيد لدرجة اني ما أشوفه بالسنه الا 3 او 4 مرات .. أنا كأب لازم أفكر فيه .. أفكر وشلون عايش .. وشلون ينام .. مع اني والحمدلله مرتاح من ناحية انه مافي أي قاصر من ناحيه ماديه لأني شهريا ارسل مبلغ معين علشان يلبس وياكل ويصير أحسن الأطفال .. زوجتي انا متأكد انها ما تكره طفلي .. بس ماعمرها تلكمت عنه .. وأنا ساكت قلت يمكن الوضع يتحسن بعدين وتراعي ظروفي وتحسسني انها تحبه وتسأل عنه ..

أنا الحين عندي طفل من زوجتي الثانيه .. عمره تقريبا سنه .. وأنا من قبل لايجي الطفل وانا حالي متدهور .. من كثر ما أفكر بطفلي البعيد احس ان حالتي النفسيه تغيرت .. حالتي النفسيه صارت سيئه .. لدرجة اني تغيرت على زوجتي المسكينه .. مع اني أحبها .. صرت عصبي بدرجه فظيعه .. حطمت قلب المسكينه .. اللي كانت بانيه آمال كبيره في زوج يكون بمثابة الأب والزوج والصديق وكل شي .. انا بعد ما أغلط عليها اكتشف اني غلطت واعتذر .. طبعا بعد ما ينهد حيلها .. وهي المسكينه تسامح وأنا أواعدها اني ماراح اكرر الغلطه وماراح اعصب .. تكررت العمليه أكثر من مره لدرجة انها قللت حبها لي .. كل شي ماصار مثل أول ..تغير

حالتي النفسيه وصلت درجه فظيعه .. حتى وبدون مدح لنفسي كنت ذكي ونشيط بشغلي .. الحين أحس ان تفكيري متجمد وصعب علي أفكر في أي مسأله ... حتى مستوياي بالدوام صار زفت .. لدرجة اني صرت اكره الدوام .. بس متحمل وأقول ان شاءالله ربي يفرجها وترجع المياه لمجاريها ..

قبل فتره بسيطه مرينا بظروف خلتنا نبعد لفتره طويله .. تقريبا 3 اسابيع .. ظروف صحيه .. وأنا راعيت الظروف هذي وما سألتها او طلبت منها شي .. لين تحسنت الظروف .. وذاك اليوم كنت أفكر بدرجه جنونيه و تناقشت معاها في الموضوع .... فتغيرت علي وزعلت من اسلوبي .. انا نسيت اني غيرت اسلوبي في المره الثانيه .. فكنت اذا تكلمت معاها ترد علي بكلمه او كلمتين .. قلت انتي ايش اللي زعلك؟ .. قالت اذا انك ماتحس مو لازم أقول لك .. قلت انتي الغلطانه .. ليش تسألين مره ثانيه ... وانت كيف كان ردك؟ .. كان بأسلوب جاف .. ليش ماتصير حنون ؟ .. ليش ماتحس فيني ؟ ليش انت كذا متغير .. وقالت انها تحس بيأس اني اتغير واكون أحسن .. حاولت اعتذر كالعاده بس استمرت بزعلها .. بس المشكله من جد مشكلتي .. وأنا الغلطان .. بس الغلط اذا تكرر ألف مره صعب الثاني يسامح ..

عموما زعلت مني .. وأنا حاولت أراضيها وقالت انها بتتخذ اسلوب ثاني بحياتها .. وانها راح اتطنش .. اللهم تقوم بواجباتها وبس .. لا أكثر ولا أقل .. بس انا حاولت أتاسف وما سامحتني .. صارت تكره كلمة آسف مني من كثر ما غلطت عليها .. كذا مره قلت لها انا تعبان نفسيا .. وأنا لو أعرف طبيب نفسي كان والله أتعالج عنده .. بس مشكلتي ان الأطباء النفسيين يعالجون بالأدويه وهمهم الفلوس .. ما يتعمقون بمشكلة الشخص ويحلونها بجلسات مثل أول

عموما المشكله هذي من يومين .. وانا كتبت لها رساله اني حاس بغلطتي .. ومتندم أشد الندم .. وانا احبها .. وتأسفت على قساوتي معها .. واعترفت اصلا اني قاسي معها .. وحلفت اني ما آكل شي لمدة ثلاث ليالي عقاباً لي .. والليله راح أكمل الليله الثانيه من دون أكل .. وقلت اني علشان أعاقب نفسي .. وهذا كله علشان أحبك .. بس هي مستمره بالزعل .. وتكره حتى اني المسها .. وتكلمني باسلوب جاف .. مع اني قلت لها بالرساله اذا عدّت الثلاث ليالي على خير راح أعوضها وما راح أغلط مره ثانيه .. ولا أقسى عليها .. وأنا استاهل العقاب هذا بس لأجل عيونها .. ولو لا سمح الله مت .. فأنا بندفن بالقبر بس حبي لك ما راح يندفن .. وأنا أقولها وأنا صادق

يا جماعة الخير .. ساعدوني بحل مشاكلي النفسيه .. ساعدوني بأفكار ترجعني لأيام زمان .. أنا والله محتاج أحد .. ادعي ربي كل وقت وأطلب انه يفرجها علينا .. والله انا تعبت وتعبت زوجتي معاي .. ظلمتها والله كثير .. وأنا احبها أشد الحب .. والله لدرجة الجنون .. بس مادري ليش يصير كذا ..

وجزاكم الله ألف خير


الأخ الفاضل :
برجاء البعد عن الوصف الشخصي

المراقبة Reemona