المشاركة الأصلية كتبت بواسطة مروج 3

شف يا اخ ... ليوناردو

الا خطبت و عزمت و كلش قل لنسيبك ابشوف منيره كان اسمها منيرة والا ابشوف حصة كان اسمها حصة والا ابشوف نورة كان اسمها نورة المهم ما نطول السالفه .........

من جد قل لهم ودي اشوف البنت و تشوفني .... و اهم شئ قبل الشوفة انك ماترسم في راسك صوره لملكة جمال و تخيل انك بتروح تشوف لك حوريه من حور الجنة ، و الاحسن انك ماترسم اي صوره او ترسم صوره عاديه عشان ان جت احسن تنبسط و ان جت عاديه ما تنصدم و تهون ...
و ياليت قبل ماتنزل من باب السيارة لا تنسى تناظر وجهك عشان ما تحسب انك ملك جمال ههههه ،، بس ،، انتبه و انت داخل لا تكون المعزبه تطل مع الدريشة و انت ما تدري ...

و اذا دخلت دور لك محل استرتيجي في المجلس و يفضل انه يكون بعيد عن الباب عشان يمديك تتهيأ و تشوفها وهي مقبله و مقفيه (( اهم شي ))

ثم اذا جلست حط عيونك فيها و ناظرها زين و لا تستحي تراك ما جيت تسولف مع اهلها و لا جيت تقهوى جاي تشوف و الاهم انك تشوفها زين مهوب الا قامت قلت و الله ما ادري ما شفت نادوها ثانيه ترى ذا الحركه مالها داعي !!! و بنات الناس مهمب لعبه عندك ،،،
و انتي بعد الا دخلتي فاجلسي شوي الين يمديه يملا عيونه منك ماهوب ما يمديك تجلسين الا و انتي ناقزه ،، و خلي راسك مرفوع عشان يشوفك مهوب تطمنينه لان هذا من مصلحتك و من مصلحته و كانك تقولين استحي فارفعي راسك و نزلي عيونك ، و ناظريه بعد ترى الشوفه لكم كلكم ، و ترى حياك مهوب سارك الا وافقتي عليه و انتي ما شفتيه زين و صار ((( اشهب الهب )))

و انت يا اخو البنت الا جاء احد يشوف اختك لا تصير قلق و تناظره خله ياخذ راحته و سو نفسك منتب يمه ...

و اذا ناظرتها و راحت عاد تفرغ لشرب العصير و السواليف 00 و انتبه لا تشرب عصيرك كله اترك فيه شوي لا يقولون وش هالمشفوح و لا رحت لهلك اشرب عصير على كيفك ... و سلامتكم

(معليش الكلام طلع بالعاميه)