مرحبا اخوي سيف البحر ... أول شي مبروك مقدما على الزواج الثاني ... و الله يسعدك و يهنيك
انا بصراحة اتفاجأت من الردود اللي حطوها الاخوان و الاخوات على موضوعك .. سواء من ناحية رفض فكرة تعدد الزوجات .. او (و هذا الأهم) نصيحتهم بانك تختار وحدة ارملة او مطلقة او عانس ؟؟؟!!!!!!!!!!!!!!!! رأي غريب صراحة .. بس لكل انسان طريقة تفكيره اللي لازم نحترمها


بالنسبة لي بقولك رأيي ... عن خبرة ... و بكل صراحة و موضوعية

الزواج الثاني اكيد ماراح يكون مثل الاول .. يعني بتصير شوية مشاكل و غيرة و عوار راس في البداية .. لكن حسن الاختيار ... و الاهم منه اهتمامك بانك توجد نوع من المحبة و الاخوة بين الحرمتين شي بيدك انت و اكيد بينفعك و يريحك ..


انا ما بتكلم عن المشاكل اللي ممكن تصير لان هذا مو موضوعنا ....

بالنسبة لمواصفات العروس الجديدة .. انا انصحك بانك تختار بنفس الطريقة و نفس المواصفات اللي ممكن تختار فيها لو بتتزوج اول مرة ... يعني:

1. ابعد عن المطلقة او الارملة أو العانس ... الا اذا كنت كبير في العمر (يعني ستين سبعين سنه) ساعتها اكيد ما بتناسبك العذرا او الصغيرة ... لكن لو انك شاب و بصحتك اكيد بيكون الاحسن انك تاخذ بنية .. مو مراهقة .. لكن وحدة مناسبة في العمر و تكون انت اول زوج لها .... لانك لو تزوجت ارملة او مطلقة فاعتقد انك بتقلل من قيمتها من البداية لانها بتحط في بالها انك ماخذها (سد خانه) و ما بترتاح ... فاتزوج بنية يكون عمرها مناسب لك و تكون راعية دين و اصل عشان تراعي وضعك كانسان متزوج و ما تحاول انها تبعدك عن زوجتك الاولى و عيالك.


2. لا تتزوج وحدة تكون من معارف زوجتك الاولى ... خاصة لو كانت الاولى كبيرة في العمر و العروس الجديدة صغيرة ... لان التعليقات في هالحالة بتكون وايد جارحة و بتأذي الكل .. خاصة يوم تكون من معارف مشتركين.

3. لا تدور على وحدة تعوض النقص الموجد في زوجتك الاولى .. لان الغيرة بينهم و المقارنة الدايمة بتكون موجودة و طبيعية .. فلا تخلي الاختلاف و التناقض بين الثنتين يكون كبير وايد عشان ما تجرح اي وحدة منهم.


4. اهم شي ... لا تذكر زوجتك الاولى قدام الثانية الا بكل خير .. حتى لو هالشي بيخليها تغار او تضايق شوي ..بس بيكبرك في عينها وايد ... لان لو مالك خير في الاولي مالك خير في الثانية..


باقي اذكرك بواجب العدل بين الزوجتين و العيال ... و اقولك "احفظ الله يحفظك" ...راعي الله فيهم عشان الله يكتبلك الخير و السعادة معاهم ..ولا تظلم اي وحدة منهم .."لان الظلم ظلمات يوم القيامة"

اسمحلي طولت عليك

بنت الحب