أنا لم أُخلق لأتزوج ((مستجدات بالرد38)) - الصفحة 2

19-11-2010, 06:16 PM

تعويذة عشق

عضو دائم

تاريخ التسجيل: May 2010

المشاركات: 87

أنا لم أُخلق لأتزوج ((مستجدات بالرد38))

بسم الله الرحمن الرحيم ..

كل عام و انتو بخير .. و انتمنى من الله العلي القدير ان يجعل السنة الجديدة فاتحة خير و سعادة عليكم كلكم ..

اخواني و اخواتي .. تعرفون اني كثير احب منتداكم هذا و اقدره <<< اصلا ما بقى أحد ما يدري هههه

و عشان كذا جاية اطرح عليكم مشكلي و حابة آخذ رايكم فيها ..

أنا أفكر انفصل عن خطيبي _ بملكة _ !!!!

كما يعرف البعض .. انا كمان كنت مخطوبة سابقاً لابن عمي و انفصلنا _ كمان بملكة _ ..

ما احس في مشاكل حقيقية الصراحة .. بس انا كذا احس كبدي حامت منه و مالي خلقه و ما ابيه ..

اعرف كمان انه تصرف طفولي و مو محسوب .. بس كمان ما ادري وش اسوي !!

انا طبيبة و هو كمان طبيب صيدلي ... مافي معرفة سابقة بالرغم من اننا نشتغل بنفس المجال ..

المهم خطوبة تقليدية عادية .. طبعا الكل صاروا يتكلموا و يا بخت فلانة .. تنفصل من واحد كويس عشان تنخطب لواحد افضل منه .. و فلانة حظها قايم و مدري وشو ..

سارت بداية امورنا تمااااام .. مناوشات بسيطة عادية مثل اي اثنين .. لكن الحق الانسان كريم و رومانسي لكن دفش في كلامه فيما اذا ما عجبه شي كمان شكله مو وسيم ابدا ..

المهم مرت الايام .. و صرنا نجهز لزواجنا اللي باقي عليه للحين 3 شهور ..

اللحين حسيت اني مو طايقته .. زاد وزنه و قلت وسامته على اعتبار ان كان عنده نسبة من الوسامة .. كماااان كثيييييييير يخاف على نفسه لا يسوي ريجيم و يجيه شي .. لا يشيل اثقال و يتعور و ...

ينتقدني كثيييييييير .. ما يمدحني الا بشكلي و بجمالي .. و لا الباقي دااااااايم ينتقد ..

لما قلت له انت ليه تنتقدني على طول .. يقول لي انا دايم كذا و طبعي كذا .. تبين تعيشين معي اهلا و سهلا و لا خلك في بيت اهلك ..

انا ما اتحمل اسكت .. اعصصصصصب .. و اقول خلني في بيت اهلي .. من زينك انت عاد <<< و الحق اللي لي ينقلب علي ..

افكاره غريبة .. هو ساكن بره حوالي 5 سنوات .. فاللحين ذبحني .. اللي هنا حوووش .. غنم .. ما يعرفون بالسواقة .. اغبياء .. متخلفين .. تعالي بس نسكن برا و شوفي الناس الصح .. برا الحياة اما هنا الواحد يموت احسن له .. يقهرني .... حتى لو كانوا اللي برا متطورين اكثر من اللي هنا .. يبقى هنا اهلي و اصحابي و ما ارضى عنهم بهالطريقة .. اسلوبه هو المتخلف

يقول عن نفسه رومانسي و يعد في نفسه كثييييير .. و هو بالعيد ما يذكرني بشي .. اصا حتى ما يجي يعايد فيني .. و لما قلت له بعيد الفطر اتدلع عليه .. اقول له ابغى عيدية .. ما بغيت الا روحي .. يقولي لي انتي رزيلة .. كأنك مو شايفة خير و مدري وشو .. بهذا العيد انا سكت و ما تكلمت .. و بالتالي ما ذكرني بشي لا هدية و لا عيدية .. و الله قهررررررررررررر .. خالاتي من الف سنة متزوجات و بالعيد حركااااات مع ازواجهم هدايا و عزايم و مدري وشو .. و احنا نفششششل ..

و لا مرة كنا نطالع فلم عادي .. المهم سألته اتحركش فيه .. افرض مثلا مثلا انت تطالع التلفزيون و طلبت منك تساعدني بغسيل الصحون .. تساعدني ؟ .. و برضو ما بغيت الا نفسي .. انتي كسوووووولة و مهملة .. على غسيل الصحوووون تبيني اساعدك .. شنو هذا .. احنا كلنا اثنين بس .. و انتي تبيني اساعدك .. هذا و ما تعرفين تطبخين بعد ..

و على سالفة الطبخ .. يقول لي سمعت انك تعرفين تطبخين بس مخبية هالمواهب .. قلت له عملت لك عينة و الباقي خليها مفاجآت بعد العرس خخخ .. و كنت مسوية له طبق حلى .. صار يقول لي تتمسخرين علي مسوية حلى و تقولين تعرفين تطبخين .. هذا بنت اختي تسويه .. <<< خييييييير يعني شتبي اسوي لك كبسة و انا مخطوبة لك بس .. اقلب فيسك

يعتبر حركات البنات و الهدايا و المفاجآت .. سخااااافة و جشع .. حتى لما انا اقوم اجيب له الهدايا عشان يشوفني و يتشجع ما يهتم في الهدايا حقتي و يرميها و يقهرني ..

يقول الهدايا هذي ما تعني له شي .. اهم شي اني اعامله كويس <<< ما يشوف روحه هالاملح !!

بس عشان ما يفكر البعض انه بخيل .. الشهادة لله ما يعزمني الا على ارقى المطاعم و الاماكن في منطقتي .. بس يخرب على روحه بجلافته ..

و كمان انا في بيت ابوي مو قاصر عني شي و انا اصلا دكتورة و راتبي يكفيني و يزييييد كثييييير ..

كمان اني لسه انخطب كثير حتى بعد ملكتنا .. و يخطبوني ناس كويسة مو اي كلام .. المهم انه اذا عرف بأي طريقة يعصب و يسوي لي هوشة و قضية .. طيييييب وش دخلني انا اذا انخطب .. تبي تحطني بصندوووق و تسكر علي ..

انا قبل ما اوفق على موضوع الملكة كنت مترددة .. لاني اعرف انه مو وسيم و كنت خايفة ..

و حطيت موضوع هنا بالمنتدى و كانت اغلب الردود ان هالموضوع ثانوي و الرجال اهم شي اخلاقه .. و تشجعت و وافقت لاننا سألنا عنه و مالقينا الا كل خير ..

بس احس اللحين شكله مأثر على نفسيتي من ناحيته كثيييير .. هو يلمسني و رقيق معي و كل شي .. بس من جهته انا ما اطيق اسوي له شي .. هو يحس اني انفر منه و يعصب ..

فاتحت امي بمسألة الانفصال .. امي تضايقت و جلست تصيح بعدين قالت مالي دخل فيج هذي حياتج ..

انا اعرف ان امي ما تبغى تنعاد تجربة الانفصال مرة ثانية .. كانت تجربة صعبة .. و منطقتنا خايسة يجلسون يتكلمون على البنت المنفصلة كأنها مسوية عار ..

انا ما ابي ازعل امي ..

و بنفس الوقت .. كبدي لايعة من خطيبي ..

اقدر اتزوجه .. بس ما اضمن استمر معاه ..

محتاااااااااااااااااااااااااااااارة و ما اعرف وش اسوي ؟؟

اعذروووووني قصيت عليكم قصة حياتي و اللي يصير بيننا .. بس ابيكم تعيشون معي الحدث .. عشان يكون حكمكم من وعي بأبعاد القضية ..

اخواني و اخواتي .. أنا اثق كثيييييييييييييييييييير فيكم .. و اعرف اني ما اخترت المكان الخطأ عشان اعرض مشكلتي ..

اتنى القى منكم تفاعل يحل لي مشكلتي ..

ما ادري انفصل منه ؟؟ و اعيش سنقل طووووول عمري ؟؟

احس ان انا وحدة مالي خلق اتزوج ابد .. كل مرة يقرب الزواج .. تنعفس اخلاقي و اصير ما اطيق الرجال و أتمنى انه يفنقش عشان افتك منه ..

احس اني ما انخلقت عشان اتزوج ..

انا قدري اني اكون وحيدة

في انتظاركم

التعديل الأخير تم بواسطة أم داليا ; 03-12-2010 الساعة 02:02 AM السبب: مستجدات

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي الانتقال إلى العرض المتطور العرض الشجري

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه