المستجدات بالموضوع

ابوي البارحة حاول يكلم زوجي .. بس زوجي قال له انه مافي مشكلة .. و ان حلاوة تبي تراح ببيت أهلها .. و يا عمي ارجو انك ما تدخل نفسك .. لأننا انا و هي كبار و عاقلين و نقدر نحل أمورنا بنفسنا ..

لكن من منطلق اصراري على ابوي أنه يوقفه عند حده و اني مو طوفة هبيطة .. ابوي اصر انه يقابله ..

فهو قال لأبوي تفضل عندي بالشقة ( شقتنا ) .. <<< احسه قليل ادب بهالحركة بدل ما يجي بنفسه لأبوي يقول له انت تعال .. المهم

راح له أبوي .. و ظلوا يتكلمون و يتكلمون و يتكلمون ..

بعدين رجع ابوي .. و انا كنت نعسانة حدي .. فما سألته وش صار ..

المهم اني قبل ما يوصل ابوي البيت كنت راسلة لزوجي مسج .. بسأله عن ساعتي اذا شافها بالشقة لأني صار لي يومين ادور عليها ببيت ابوي أخاف ضيعتها
قال لي ما ادري .. قلت له شوف طيب .. قال لي خير .. بعد فترة ارسلت له شفتها ؟ و ما رد علي .. و اتصلت عليه و ما رد علي .. و من امس و هو ما يرد علي ..

أحس انه انقلب ازيد من القلبة اللي هو منقلبها .. له علاقة بكلامه مع ابوي اللي مدري للحين وش هو ..

و ابوي للحين ما رجع من الدوام .. و لا ادري وش صار بينهم ..

اذا عرفت راح ارجع اخبركم ..

لكن انا اللي احسه ان زوجي فاااار دمه و عصب زيادة لأن ابوي عرف باللي صار بيننا كله .. لأني قلت لأبوي بالضبط وش كان يقول لي لما نعصب ..

و هو ما كان يبغى أحد يدري .. بس انا خربت أم الدعوة <<< اسلوب انثوي مرة ههههه

المهم اني اتوقع انه عصب زيادة و المشكلة كبرت زيادة ..

المهم ..

حتى ذلك الوقت راح نوافيكم بآخر الأخبار

أحس مرة اكشن <<< طلعي برا ههههه

مع ان مشكلتي عويصة .. بس احس مبسوطة اني انتقم من زوجي .. كان مستحي من اهله و أهلي يعرفون بالسالفة و انا فضحته عندهم عشان ياخذون حقي << احس اني نذلة ههههه

أهم شي يبرد قلبي

الله يسعدكم و يوفقكم

بس بسألك .. اللحين زوجك ما يسب اذا عصب ؟؟

و ترا بقول انه مو أول مرة يسب .. قد من قبل سبني .. و كأن مرتين أو ثلاث و احنا مملكين .. كنت أحاول احتوي الموضوع بيني و بينه .. لأني بجد ما كنت ابي احد يدخل بيننا

لكن مافي فايدة .. اذا عصب يرجع يسب و لا كأننا تكلمنا و قلنا و عدنا و زدنا ..

الين تعبت أنا و فقدت السيطرة ..

و زيادة على الاشياء المتراكمة .. خلاص بلغ السيل الزبى ..

امم تبغين الصراحه ... ولا تزعلين منتي ثقه .. السبب من اول شهر وفضحتي اسرار البيت
يعني صعب زوجك يرجع يثق فيك .. كانك مسويه الشغله حرب بينك وبين زوجك ومين ينتصر
ومين يغلب بالنهايه .. وهذا من شهر بس ... غير انك منتي متقبله شكله .؟
وتقارنين بينه وبين غيره ..؟
مااقولك زوجك مافيه عيوب وانتي كلك غلط .. لكن مشكلتك ماعندك نضج كافي لادارة مشاكل
وامورك بشكل طيب ..
زوجي وسيم الحمد لله لكن هالامر موعندي بالمقام الاول .. اهم شئ عندي اخلاقه وتعامله
اذا هو حلو حلو لنفسه .. وتعاملي بيكون مع ذاته واخلاقه مو مع وسامته ..؟!
هل نفعته وسامة خطيبك الاول معاك ..؟ كانك تبغين زوجك يتفصل على مزاجك تفصيييل
ولا تبغين تتعبي وتتقبلي كما هو او تجاهدي تغيري فيه ..

وسالفة تكلمين شخص ابدااااااااااااااا مو مبرر انك تكلمينه وتقولين هو حدني عليه .؟!
اجل بكره لو زوجك حب له بنت وانتي تاركه له البيت لا تلومين الا نفسك . وهل تعتبرين
خيانته لك لها مبرر.؟؟

اقرا بذا المنتدى وشوفي صبر الاخوات شوفي كيف حفظهم لنفسهم وحفظهم لزواجهم فوق مشاكلهم
اللي ماحدتهم على فعل امور لا تجوز .. لهدرجه نفسك ضعيفه .؟؟

وهذا كله وانتي لسى شهر .؟ كيف بكره تمر سنين وعيال ومشاكل ..؟

ياليت تراجعين نفسك ..وبقولك شغله شهر ورحتي لاهلك وطلبتي ابوك يتدخل دليل فشلك
في اصلاح اللي تعانينه رغم بساطته ..

السلام عليك اخيتي ليس بالعناد والمشاكل تحل المشاكل ,بل بالصبر والاتزان والتفكيرالملي ,الى متى تنتظرين حلا لمشكلتك
ان لم تكن منك المبادرة خذي نفسا عميقة واستغفري ربك ولا تملي منه,والتقي بزوجك وناقشي الموضوع معه بروية
فالشيطان للازواج بالمرصاد ولن يهنئ له بال حتى يفرق بينكما هذه اساليبه واغواءاته ,استغفري وعودي زوجك على الاستغفار وذكريه بقول الرسول اتقوا الله فالنساء,اجعليه يغير الفاظه البذيئة بذكر الله وذكريه بحقوقك عليه وانه مسؤول عنك يوم القيامة فكيف لاب ان يربي ابناءه على الالفاظ البذيئة ولا تسايريه فيما يقول لك من الفاظ واجيبيه بالاستغفار وذكر الله وسوف لن يكررها ابدا , واطلبي له الهداية في وجهه وقولي له الله يهديك في السر والعلن والله لن يخزيك الله فان اراد الله له اصلاحا على يديك فذاك هو الخير لكما ,وان اراد الله لكم الانفصال فذلك هو الخير, والخير فيما اختاره الله, ولا تتهاوني عن ذكر الله

ما شاء الله عليك يا عفراء

من يوم قريت موضوعها وأنا حاسة إنها ( لذة عشق ) أو شئ يشبه هالاسم من الإسلوب ...

حاسة إني مبسوطة على نفسي إني عرفت عضو بمعرف آخر من إسلوبه ..

عزيزتي حلاوة ..

تعوذي من الشيطان .. واسمعي كلام الأعضاء الحكيمين .. هنا ..

__________________
{ اللهم صلي وسلم على محمد وآله وصحبه تسليما كثيرا }

اخت حلاوة باين من اسلوبك انك مو حاسة بالمسؤلية وماخذة الموضوع تحدي خصوصا في اخر المستجدات
يعني احس ان كلام الاعضاء ما اثر فيكي ولاحابة ترجعي..
بداية الزواج كذا وكل وحدة تعاني في بداية الزواج بس الشاطرة اللي تقدر تأثر على زوجها وتخليه اللين يتعلق بيها وما يستغنى عنها وبعدين ...تسوي اللي تبي وطلع قهرها منه اول الايام....
والعيوم اللي ذكرتيها ولله الحمد من السهولة انها تتصلح مع الوقت...وخصوصا انه كريم ويحب يساعد في البيت ويحب يطبخ....يعني عنده مميزات مو موجودة في كثير من الرجال...يعني طالما يحب يطبخ ...ليش ما تخلي من وقت الطبخ وقت رومنسيس بحيث تكوني انتي وياه في المطبخ تطبخوا سوا وتستانسوا سوا حتى في شغل البيت خلي منه متعه
يعني المشكلة فيكي مو في زوجك...وحبه لك باين من مساعدته لك وكمان من انه ماحب يدخل احد عشان لا تكبر المشكة

يتبع

وانتي هداك الله عشان كنتي تعرفي قبله رجل وفترة ثلاث سنين كثير .....
المهم فأي رجل يعرف بنت ماهي زوجته ولا حلاله يكون اعظم رجل وتتمناه كل بنت
يعني هذا المحترم والوقور واللي محترمك طول هالسنين امكن يكون لسانه بذييء جدا بس من وين راح تعرفي ....
ولو كان محترمك ليه ماراح هو اتزوجك....طالما انه محترم ومحب ورومانسي وقدرك..
كان اكبر قدر لك واكبر احترام يسويه لك كان اتزوجك بدل هذي الثلاث السنين اللي صرف على نفسه فواتير...(فيس معصب منك)
هي هذي مشكلتك الغي ماضيكي عشان تقبلي بحاضرك وواقعكي وارجعي لزوجك من دون ما يرجعك
لان اللي انتي سويتيه لحد الان كافي....
والدليل على انك تبي ترجعي انك تتلككي معاه وترسليله وين ساعتي وترجعي تتأكدي ودقي طيب ليه هذا كله ارجعي ومشي امورك وتحملي وحاولي تفهمي وتغيريه بس باسلوب لان اللي انتي قاعدة تسويه مو لصالحك..
لا اذا تطلقتي لصالحك ولا اذا رجعتي لصالحك لانه راح يحقد عليكي وحيكون صعب عليكي تنسيه اللي صار وتغيريه انتي بكذا راح تخليه اذا رجعتي انه يهينك بعد ماكان عازك؟؟؟والالفاظ مو مشكلة تقدري مع الوقت تغيريه وكثير من الرجال كذا وتغيروا



نصيحة ارجعي بيتك بدون زيادة تدخل ولمي الموضوع بدل مايوقع على راسك ويصير بدل ماتوقفبه عند حده انتي راح توقفي عند حدك....
والمفروض كمان ان ابوكي ما يكون في صفك ابدا ويوقفك عند حدك ..وفي نفس الوقت طالما اتدخل كان كلم زوجك بالحسنى وفهمه كيف يعاملك لانه الظاهر ان معاملتك صعبه طالما انك تقارني ومحد عاجبك

حلاوه يا سكر زيااادة ....~


بسالج اسئلة وجاااوبني ...!

في مرة سب والدينج ؟؟
في مرة تعرض لشررفج او باين انه على وشك ..!
هل يمتدح جمـــــــآلج ..!
تحسين انه منتبه لوجودج كزوووجــــــــــــــــــــــــــــــــــــــــــــ ــــــــــه...!
هل لســــآنه فاااارط على اهله سابقا,,يعني عالاقربين منه ...!



جاوبي عالاسئلة ولااااا تحاااتين الامووور طيبه ,,,


اتصدددقين احس بحرقتج ... انتظررج

مشكلتك يا اخت حلاوه تنقسم أربعة أقسام وهي :

الأول : انك مو متقبله زوجك لأنه مو وسيم وجسمه مو حلو .

الثاني : انك تقارنيه بخطيبك السابق .

الثالث : انك خنتي زوجك وهذي جريمه بحقه .

الرابع : انك تطلعي اسرار بيتك وتدخلي اهلك يحلو مشاكلكم .

بالنسبه للقسم الأول :
زوجك انتي ما تقبلتيه لأنك ماحبيتيه أو بالاصح ماقدرتي تتقبليه لسوء معاملته ولعشرته السيئة وبإمكانك وبذكائك تقلبي الموازين لصالحك 180 درجة بس يبغالها صبر ويبغالها ذكاء وإستخدام الأسلحه الأنثوية وبمشيئة الله راح تتعدل أمورة معاك بمعنى :
- قدمي له الهدايا ( ساعه , قلم , نظارة ولو أوضاعك المادية تسمح خذي له جوال على موضته , عطر ) .
- حاولي انك ما تناقشيه وهو معصب وتتركيه حتى يهداء .
- عقلية زوجك متفتحه بحكم انه درس وعاش بالخارج فحاولي انك تقربي وجهات النظر بين تفكيرك وتفكيره .
- أحسست بأن زوجك طيب جداً ( ماقد شفت زوج يكنس الصاله ) وهذا يدل على حبه لكِ .

القسم الثاني :
الله خلق كل شخص بطبائع وسمات واخلاق وتكوينه يختلف حتى عن أخوه بن أمه وابوه .
وأنتي تقارني زوجك بشخص آخر وشخص يعتبر ماضي بالنسبه لك وانتهى بطلاقك منه فلا تقعدي تتعبي نفسك وتتعبي تفكيريك بالمقارنه لانه ماحد راح يعاني الأ أنتي .
فكري في زوجك وفكري في مستقبلك معه فهوه شخص طيب وحنون وكريم وفيه صفات حسنه كثير وهذا حسب وصفك له .

القسم الثالث :
خيانتك لزوجك لو كانت بالكلام فقط هذي جريمه في حقه تخيلي يا اختي الكريمه زوجك عرف انك تخونيه عارفه ايش ممكن يصير لك ؟
- راح ترجعي لاهلك مطلقه خائنه ومحد راح يسامحك لا أهلك ولا مجتمعك .
- راح يجر ابوك العار بسببك ويلحق كل افراد العائله .
- اذا ربنا ستر عليك في الثلاث سنوات اللي راحت فأحمدي ربك وتوبي اليه توبه نصوح لأنه وضعك الآن اختلف فأنتي متزوجه وأنتي مؤتمنه على شرف زوجك مهما كان ومهما فعل بكِ فعليك بالصبر والدعاء له بالهدايه .
- أنتي تعانين من فراغ عاطفي كبير وهذا الفراغ لابد ان يملئه زوجك ولكن للأسف فهوه خالي مشاعر وعليك أنتي المبادرة حتى يتعلم منكِ كما تقدم .

القسم الرابع :
قال الله تعالى : (فَالصَّالِحَاتُ قَانِتَاتٌ حَافِظَاتٌ لِلْغَيْبِ) .
ويقول الرسول الكريم :
(ان من اشر الناس عند الله منزله يوم القيامه الرجل يفضي الى امراته وتفضي اليه،ثم ينشر احدهما سر صاحبه ..)
إفشاء أسرار الزوجية يزعزع استقرارها إن إفشاء ما يجري بين الزوجين والذي اعتبره المولى تعالى 'غيبًا' لا يليق بمكارم الأخلاق ولا يتفق مع ذوق المسلم في الآية يمدح الله تعالى الصالحات القانتات بأنهن حافظات للغيب أي يحفظن أنفسهن عن الفاحشة وأموال أزواجهن عن التبذير والإسراف، ويحفظن ما بينهن وبين أزواجهن من أسرار وخصوصيات .
إن نقل أسرار العلاقة الزوجية - أسرار البيت - خارج نطاق الأسرة الزوجية يعني ازدياد اشتعال نارها، وإضرام نار العداوة والبغضاء بين الزوجين إضراماً يذهب بما بقي من أواصر المحبة بينهما، وكتمان الزوجين سر بيتهما يعقبه السلامة، وإفشاؤه يعقبه الندامة، وصبرهما على كتمان السر أيسر من الندامة على إفشائه .

وأخيراً يا أختي الفاضله
أصبري على زوجك وحاولي تتقبليه وأسال الله العلي العظيم ان يسخر قلبه لحبك ويسكنك كل خلية في جسمه وعليك بالرضى بنصيبك وأحمدي الله عليه وطبيعي جداً تكثر المشاكل في أول ايام الزواج وهنا يأتي دور العقل والحكمه في وزن الأمور وحل المشاكل بدون تدخلات خارجية
موفقه أختي الكريمه

__________________