بسم الله الرحمن الرحيم


ماادري من وين ابتدي كل اللي افكر فيه الحين اقول كل اللي في خاطري أبا ارمس يمكن هم التفكير يروح من تفكيري ..
ابوي مع اخوانه الثلاث واختهم الوحيده ربوا في عايله محترمه تعرف الله مابعمرهم ضروا احد او اسفهوا المخلوق( وفوق هذا مكتوب عليهم الشقى )
بنات عمتي مانعرفهم الا بالاسم عمتي انجوفها في المناسبات ماتقصر توصل عيال اخوانها الثلاث بالرغم من كثرتهم ربي يحفظهم وفوق هذا هي اصغر من ابوي بس اللي يجوفها يعطيها اكبر من ابويه

من ايام وصلني خبر انه بنت عمتي توفت الله يرحمها عمرها 35 وتحتها 7 عيال .. توفت بعد صراع بالكانسر والعياذ بالله الله يعافيكم ..
انصدمت وتفجأت بنت عمتي كان فيها السرطان وانا ماعندي خبر اكيد ماراح يكون عندي خبر لانه عايلتنا ماتتشارك الا الافراح والاتراح وبقيه الايام تعيشها نسيا منسية بينا وبين البعض مانعرف اخبار بعض

حتى مع بنات عمي نحن مانتشارك الا وقت المناسبات في الاعراس نلتقي وفي العزاء نلتقي بس الايام العاديه كل واحد في حاله ربينا وكبرنا على هالشي ..

بنت عمتي راحت من الدنيا انا بنت عمتي تموت ودمعتي جافه ماصحت بس تفجات وانصدمت وحسيت في شي يهز فيني من داخلي ماادري كيف اوصف رعشه هزتني وظلت في تفكيري طول الوقت اتخيل انها كانت تصارع المرض ونحن بنات خوالها وعيالهم كلن لاهي في حياته

كيف ؟ وليش ؟؟ ومتى ؟؟ ماعندي اي جواب في نفسي

سرت اعزي مع اختي الصغيره المعرسه و وثلاث من بنات عمي منصور سرنا في سياره بنت عمي الكبيره كلنا رباعه طبعن لانه المكان شوي بعيد ظهرت من بوظبي الصبح لين العين وهناك تلاقينا كلهن ساكنات العين وسرنا رباعه وصلنا طبعن من وصلنا مكان العزى قاموا فتشونا قبل لاندخل لانه وضع عمتي وعيالها مايسمح احد يدخل عليهم قبل التفتيش حتى لو كان عزى المهم

سلمن علينا بنات عمتي وبنت عمتي الكبيره حافظه اشكالنا لانه دايما تحضر المناسبات اللي تجمعنا مع امها اللي هي عمتي ربي يحفظها فيلست تقول لخواتها هاي ريم وروضه بنات خالي محمد وهاي اليازي وفطيم وخلود بنات خالي منصور طبعن بنات عمتي اصغر وحده فيهن في عمر 33 يعني اخر العنقود عند عمتي .
ماسلموا علينا وبس الا خذونا في الاحضان ماتوقعت راح نحصل هالترحيب منهم
لاني ماجفتهم في عزى امي واخوي الله يرحمه الا ثنتين من بنات عمتي وعمتي وبس
المهم انا وثنيتن من بنات عمي وحده فيهم حامل في شهورها الاخيره حليلها يلسنا في طرف بس اختي الصغيره وبنت عمي الكبيره يلسن عند عمتي يواسنها ويقربن لدرجه اختي يوم غسلت الرطب عشان تقربه لعمتي لانه عمتي على لحم بطنها من امس قامت المطيرزيه مسكت اختي قالتها غسلتيه قالت هي غسلته تفجات اختي من الحركه قالت قلنا مطيرزيه ومرافقين بس نحن بنات اخوها موب مابنضرها
المهم وانا قاعده مع فطيم واليازي في طرف قعدن ثنتين من بنات عمتي يطالعنا ومبتسمات جفنا الفرحه في عيونهم والجو عزى فجان بنت عمي فطيم تقول طالعوا بنت عمتي اطالعنا مع وحده وتبتسم قالت منوه هاي اللي عدالها فجان نقول انا واليازي والله ماادري.. قمنا نسلم عليها على اسا اس انها اطالعنا وفضيحه مانقوم تخيلوا طلعت بنت عمتي (حصة )قلنالها سامحينا ماعرفناج قالت والله اعرف انكن ماعرفتنيا لاني اذكر يتيكم وانتن كلكن صغار لانه ابويه كان عايش في الكويت ويوم رجعنا لامارات سكنا في بيت عمي قامت (حصه )تقولاليازي أذكر مرة وحده يتكم وكنتي تلعبين وعمرج في حول 8 سنين وروضه عمرها ست اذكر كانت امها توكلها تفاح غصبن عنها وهي تبا تقوم تلعب قمنا ضحكنا كلنا .. قلت سامحينا مااذكر شي ابد . (تفجانا تعرف التفاصيل وذاكرتها ) .


الوحيده اللي كانت تصيح في العزى هي عمتي ماادري ليش محد كان يصيح من خواتها يعني في عزى امي واخوي حتى بنات عمومتي كانن يصيحن من صياحي انا وخواتي




وضع عمتي وابوي وعمومتي

عمتي وعيالها وبناتها وضعهم اكبر من وضع ابويه وعمومتي وعيالهم بس والله على الخير اللي عندهم تخيلوا حتى السوق ممنوع يروحوله السوق يوصلهم مايسافرون الاماكن الاوربيه وهالدول ولايستمتعون في حياتهم ممنوعين من السواقه والشغل البنت عندهم وضعها يقول تزوجي حفظي القران يلسي في بيت زوجج ارعي حلقات الذكر ودعم الامور اللي تخص الدين العمره والحج وبسس غير الدين لا لاسفر لاسواقه لاشغل البنت تتخرج من الجامعه شهادتها تتعلق والسلام يوجبون القريب والبعيد في الافراح والاتراح بس موب كل المناسبات .. عيبهم وقت العرسات عندهم اكبر المطربين يغنون في اعراسهم بس حياتهم العاديه ذكر الله وطوع
حتى عندهم نظام ممنوع اي احد من بنات عمتي وعيالها وعيالهم وبناتهم يتزوجون صوب يدتهم و امهم
اللي هي صوب عمتي يعني ( عايله ابوي عايله اخوانه ) لازم يتبعون صوب ابوهم ماادري عن هالعاده الغريبه مع انه امهم تشل اسم ابوها اللي هو ابو اخوانها 0 ابوي وعمومتي )