اهلا وسهلا
الطلاق له عواقب والعودة لزوجك لها عواقب ايضا والقرار بيدك
بالنسبه للمشاكل كل بيت يعاني منها ولاكن في نقطه مهمه جدا وهي موضوع الضرب لانه يخص الكرامه انا كرجل اعتقد ان الزوجه قد تتحمل اي شي من زوجها ماعدى الضرب ويمكن تكون مشكلتك هنا تحديدا لماذا لم تقومي بوضع حل لضرب زوجك لكي لماذا لم تخبري اهلك بانك تتعرضين للضرب من زوجك فهناك العديد من الحلول بيد اهلك لايقافه عند حدة
جربي العوده بشروط هذه المره شوفي الاشياء الي كانت تنقصك وضعيها في شروط وعلى راس هذه الشروط انه مايمد يده عليك
ولاكني اقترح عليك الاتي يااختي قبل كل شي يجب ان تشتكي لاهلك من كل ماتعانيه من زوجك عشان ترتاحي من المعايره اذا طال بقائك لديهم لاتستحي ابدا ابدا عن والدك اشرحي له عن الاشياء الي عذبتك عند زوجك وخصوصا الضرب
عند والدتك ااشكي لها عن الاشياء التي تستحي من ذكرها لوالدك مثل موضوع الجنس لانه مهم جدا وهي راح توصل المشكله لوالدك بطريقتها
ومافي مانع ايضا انك تشتكي لاخوانك وتتقربي منهم لانهم سندك وصدقيني ان الاخ اذا قدرتي تقنعيه وتدخلي قلبه افضل من والدك ويوقف وقفه بجانبك مستحيل حتى والدك يسوي مثله
المهم يااختي الطلاق ماهو بعيد بس عشان تاخذيه باريحيه وبدون مضايقه من الاهل ومعايره لازمك تشتكي لهم من زوجك عشان يعطفو عليك وينقلبو بصفك ضد زوجك ويوافقو على اي قرار تتخذيه
واتمنى من الله ان يوفقك لايجاد وضيفه ويعوضك بها ويختار لك مافيه الخير والعفو ياااختي ماسوينا الى الواجب ولاتنسينا من اي جديد واهتمي بوالدك ووالدتك ولاتنسي الصدقه ولي عوده انشاء الله

__________________
تمنيت حبـاً يدوم طويـلاً .. فـدام الحب وَ رحل الحبيب.

اشكرك اخي bulldozer. ..
كلامك صحيح انا الشي الاكثر الي خلاني اكره زوجي كره نهائي .. هو مد يده علي وتكرار الموقف وإهانته لي شعور لا استطيع وصفه ...

انا شكيت على اهلي كثيير وعارفين انه مد يده علي وعشان كذا هم تاركيني عندهم ...
مع اني من زمان اشكي لهم ويضعون اللوم علي ويرجعوني بيتي..

قلت لهم مابيه انا اكرهه لاتجبروني عليه..
فهمتهم كل شي بس احسهم يسكتوني وينتظرونه يجي يترضاني..

له اسبوعين والله لايسأل عن بناته لايقول محتاجين شي ..
انا ماعاد ابغى منة شي لا كن بناتي هم نقطة ضعفي..

انا بحيره تعبت من التفكير تعبت مااحس اني اعرف مصلحتي وين !!

اشكرك اخوي على ردك
ولك دعوه بظهر الغيب

انا ماادري اذا سبق وعدتي له بشروط وضمانات و من رئيي انك تحطيه هذه المره امام الامر الواقع عودي ولاكن بشروط
المهم ماتكون شروط تعجيزيه ضعي شروط مناسبه تحفظ كرامتك وتغطي احتياجاتك ويلتزم بها وبما انه جرحك اكثر من مره وقصر معك وعودتي اليه فلديك الحق في ذالك وصدقيني يااختي ان هنا مصلحتك بانك تتمسكي بحياتك وتعملي بالاسباب الى اخر حد وبعدها طبعا للصبر حدود وبامكانك تطلبي الطلاق ربي يعينك ويلهمك الصواب

__________________
تمنيت حبـاً يدوم طويـلاً .. فـدام الحب وَ رحل الحبيب.

نعم سبق واتفقنا وتدخلو اهلي وهو الي يدخلهم ... اما من ناحية جلوسي عند اهلي فهاذي اول مره بسب رفض اهلي جلوسي عندهم..
مشكلتي أيضاً امي الله يهديها رغم اني ادور رضاها رغم اني اسمع كلام منها واكتم بداخلي..
الا اني انفجرت وفقدت اعصابي والسبب كانت تقول ( البلا فيك مو بزوجك) بدون اسباب او داعي للكلام وحسيت انها تسوي كذا تتعمد غضبي ..
كانت الله يهديها لما اجي اشتغل معها ترفض بطريقه استفزازيه وتقول روحي مافيك خير ..
وتدعي علي بعد!!!!!
والسبب ؟ !!
تعايرني اني ماتوظفت !!!! وتقولي نيتك شينه ....
ليش ؟؟؟
وش مسويه انا لها.. مادري!!!
المشكلة ابوي يقتنع بكلامها دائماً. .
والله انا في حال لايعلم فيه الا الله. .
احسها ضاقت علي من كل ناحيه مو قادره اتنفس ..
عطوني الخطأ الي اخطيته..
ولا قادره افكر بشي نهائي..
حصل جدال بيني وبينها قدام ابوي .. وابوي ساكت.. وهي تدعي علي!!?
وتقولي كلام جااااااااارح ..
وصلت مرحلة كرهت نفسي كثيييير. . تمنيت الموت..
والله اكتب و انا ابكي..
شكراً لك اخي
واسفة جداً لازعاجك.

انتي الى الآن لم تحملي اسم مطلقة وهذا هو تعامل اهلك معك

بعد الطلاق تأكدي أن كل هالسلبيات ستتضاعف

استغرب بداية موضوعك تقولين مرتاحه كثير كثير

وببعض الردود تبكين بصمت الى ما جا ابوك وهداك

وردك هذا يبين ان سلبيات اهلك بتجنن فيك وبتقولين عيشتي هناك اهون

انا رأيي دامه وصل الى باب بيتكم وطلب ابوك للتفاهم هذي بداية خير ان شاء الله

خلي ابوك يتفاهم معاه على اهم النقاط اللي تضايقك مثل

البصق - السب - الضرب - الاهمال والسهر - المصروف او النفقة

واتركي : يمشي خواته مايمشيني يعطيهم ولا يعطيني يوديني ويتركني للفجر

قبل تطلعين قولي له وديني الساعة كذا ورجعني الساعة كذا

هذا رأيي اما ان كنتي قد وصلتي الى درجة عدم تقبله نهائياً ولا تريدينه

فالله يرزقك بالوظيفة اللي تغنيك والزوج الصالح اللي يعوضك

راحتك في رضى الله

صدقيني أرضي ربك

وكون عون لبناتك على بر والديهم أنتي الحين مرتاحة مع والدك ووالدتك وأخوانك وهم سندك
لو تطلقتي بتحرمين بناتك من هذا كله لو لا سمح الله كبرت البنات و تزوجن وصار لهن مثل ما صار لك أي بيت بيروحين يا ترى عند بيت أمهن ولا بيت أبوهن ولا عند أخوالهن

شوفي أختي دام جاكم زوجك لباب بيتك حطي عليه شروطك
وحاولي تتعايشين معاها ولا تكبرين غلطاته كثير وركزي على إيجابياته
وحاولي تدلعينه جعلي نصب عينك بعد رضى الله بناتك و أفرحي لفرحهن
ولا تأخذين هم كثير لسلبيات زوجك و صدقيني بترتاحين

الشيطان يجي عند الواحد منا ويزن عليه و يخليه يفكر في السلبيات ليييه
عشان يزيد المشاكل والفتن

واستعيني بالله
وربك كريم
والله أعلم

جبتها على الجرح الصراحة ...
بناتي هم الي افكر فيه ..
ام زوجي فلا ينفع معه لا دلع ولا غيره .. انا جبرت معاه الدلع و كل شي ما فاد معاه
والشروط فعلا شي جدآ ممتاز الله يجزاكم خير انا قاعده افكر فيها ..
الله يجزاك الجنه ولايحرمك السعاده بالدنيا والاخره.

اشكرك على ردك اختي..
من ناحية تقبلة نعم لا اتقبله نهائي ..
بس بناتي كاسرين ظهري.. والله مافيه شي يرددني غيرهم ..
مستعده اتقبل كلام اهلي ومشاكلهم
ولا اتقبل ضرربه واهانته لي يمكن مو متخيله الشعور كيف !!
لا كن انا حاليآ قاعده افكر مثل ماتقولين و احاول اعطي نفسي فرصة اخيييييييييره ..
وأحياناً اقول لا لا
اخاف اهلي يرجعون ضدي امام زوجي ...!!!
انا كني بين نارين ..
الله يسعدك ويوفقك ولا يذيقك حزن يارب..

لا لايااختي مافي ازعاج ابدا خذي راحتك وفضفضي بكل الي يجول بخاطرك وكل مافضفضتي اكثر فهمنا اكثر ونقدر نفيدك انشاء الله طبعا يااختي انتي حاليا بين قوسين معاناتك معى زوجك واهلك في نفس الوقت ولاكن يااختي ابشرك انه عندما تشتد المصيبه قرب الفرج بأذن الله انتي حاليا حاولي قدر الامكان تمسكي اعصابك وامك مهمه جدا لمصلحتك على الاقل تقدري تدخلي لوالدك عن طريقها انتي لازم تبلغيهم بأنك صبرتي على المر معى زوجك وصبرتي على الضرب وكرامتك من كرامت اهلك ولجئتي اليهم فأذا كان وضعك حاليا مايرضيهم وودهم ترجعي لزوجك فماهناك اشكال حطيهم في القايمه معى زوجك وقليلهم يعملو لك حل للضرب معى زوجك ويلزموه بباقي حقوقك وقليلهم انا برجع واعطيه اخر فرصه عشانكم واذا ماتسوون لي حل انتم من غيركم يسويه عند من اروح من لي سند غيركم بهالدنيا اشرد من عند زوجي والا اروح انتحر لاني حاسسه ان مافي معي حد يسندني كل يوم وانتم تعايروني وتقفلوها بوشي وكأني ارتكبت جريمه ........
المهم ياااختي الطلاق شيليه من راسك حاليا والله مااانصحك لان اهلك حاليا ماهم مقتنعين فيه يمكن يقتعنو فيه في المستقبل اذا كثرت المشاكل وشافو ان مافي حل غيره بس حاليا انا شايف ان الاهون لك الرجوع لزوجك ولو يوقفو اهلك بجوارك ويأخذو موقف حازم معى زوجك ويرجعوك بالشروط الي ذكرناها ويهديه الله ويلتزم بها فأكيد انك راح تنسين الطلاق وراح تتغير حياتك ان شاء الله وفي حاجه مهمه جدا ابغى الفت انتباهك لها بعد عودتك لزوجك استخدمي فنياتك فيه وحاولي يدور لك وضيفه قريبه من البيت وهناك عدة طرق لاقناع الزوج بالوضيفه وافضلها في قدر ضني انك راح تساعديه في مصاريف البيت وراح يكون راتبك تحت تصرفه الى ان يرزقك الله بالوضيفه وبعدها ان صلح زوجك واصلتي حياتك وان استمر على حالته سابقا فوضيفتك جاهزه ومنتي محتاجه لاحد بعدها حتى لورحتي بيت اهلك ماراح تحتاجين منهم شي
اتوكلي على الله افتحي صفحه جديده منتضر ردك الله يوفقك

__________________
تمنيت حبـاً يدوم طويـلاً .. فـدام الحب وَ رحل الحبيب.

والله يافي بعض الردود تقهر
وش الي هذا وانتي مابعد تطلقتي هذا ردت فعل اهلك
وش هالكلام؟؟!!
المهم انت اعلم بزوجك هل عنده نيه يتغير
طيب فكري لخمس اوعشر سنين قدام هل بيتغير
والا مثل ماهو ويعيشون بناتك مرضى نفسيين
لزوج اخلاقه سيئه فكري هل يستحق يكون اب
هل زوجك فيه رجى يتغير والا بيظل يهينك ويبصق في وجهك
كل هالاشياء انتي ادرى بزوجك منا
اليوم عندك طفلين بكره يكون الضحايا اكثر ويصير مافيه خط رجعه

__________________
استغفر الله وأتوب إليه