طيب نختم الضيافه لان زين ما عاد بها صبر 😂

ونبدا في طقوس الزواجات
واكثر شي احبه بهالموضوع الحنا مع اني ما اتحنى ابداً ابداً
لكن فيه كذا علاقه وديه بيني وبين هاليوم احساسه مختلف
الزواجات عندنا
ابدا من البدايه خالص
عندنا تكون الخطبه في البدايه بمكالمه هاتفيه من الام او الاب
يليها عرض الزواج من اهل البنت للبنت وهنا تبدا حفلة الخجل وهالخرابيط 😜
وبعدها اللي تشوفه يبه
وبعدين يجي وقت النظره الشرعيه اللي هي زيارة الولد فقط لا غير
يجلس مع الاب او الاخ وتبادلون الحديث اهم شي يتبادلون هاه
وبعدها النظره الخطافيه اللي في بعض الحالات ما تتعدى العشر ثواني ورجللللك
وبعدها موافقه وتحاليل وعقد القِران طبعاً العقد بس الرجال
وبعدها تكون الشبكه وحفله كامله مشابهه للزواج وتكون على اهل البنت
بعدها فتره ملكة تختلف مدتها على حسب اتفاق الزوجين
ثم الزواج
وتجهيز الدبش والحنا وعزومة ما قبل الزواج تكون عند اهل البنت
يقالهم يودعون بنتهم يعني حفلة توديع عزوبيه بس برز ولحم 😂😂😂😂
وتكون قبل الزواج بيوم قبل الزواج بيومين يكون الحنا
المهم وصحابتها ممكن يسوون لها بارتي يسلكون لها قبل تنشات من الشله 😜 ( عاده مستحدثه ذي )
والله ويوم الزواج اجمل يوم للعروسين واطين يوم في حياة اهل الطرفين
من كثر المراكض ورى الترتيبات
وزفة للشوكولاته وزفه للعصير وزفه للتوزيعات ... الخ الخ
بعدين تنزف الست هانم ( ممكن ينزف معها العريس وممكن لا على حساب عادات اهل الولد والبنت ) وتجلس ابو نصف ساعه او 45 دقيقه تتقدم لها الهديا من كل حدبٍ وصوب وفيه هدايا خاصه واطقم ذهب هاذي بعد لها زفه المهم بين كل زفه وزفه زفه 😄
ويردحون صديقاتها وخواتها وبنات عمها وخوالها ومرات يدخلون اقاربها الرجال وبعدها تقضب الباب
ويستمر مسلسل الردح لييين الفجر
بعدين كل واحد على بيته
ويلا اليوم الثاني بس احنا ما عندنا نظام انو اهل البنت يروحون الصباحيه لبنتهم لا
بس يسوون عزومه ثانيه بعد الزواج مدري وش هدفها لكن ضروريه 😔 ناس تحب الكرف
وسمع الله لمن حمده
هذا اللي اتذكره حالياً بس اتذكر شي ثاني ارجع اكتبه

بخصوص الزواج عندنا...
- يجون الام والاخوات والمعرس حق يشوفون البنت ، البنت والرجال يقعدون في مكان بروحهم وعندهم كل الوقت عشان يتكلمون براحة .. ومحد يدخل عليهم واساسا الباب مفتوح
- لما البنت والولد يتفقون .. يجون الاهل مرة ثانية حق بيت البنت .. وتجي الام والاخووات والخالات والعمات .. يتفقون عالمهر / وهذا يسمونه قصاص المهر
- بعدين ليلة الملجة .. ويسوون فيها سفرة عجم .. يحطون دواشق زري ملونه .. ويخلون في الغرفة مناظر وايد " مرايا " وتكون العروس لابسه اخضر او احمر
- ليلة الحنا .. يزينون الغرفة بالزري الاخضر والاحمر والوردي .. يعلقون قطعة القماش على الجدار .. ويخلون مسند ودوشق حق العروس تقعد عليهم ويحنونها وحوالينها اهلها و رفيجاتها
- ليلة الخطوبة تلبس العروس فستان ملون .. ويزفونها على عريسها اول زفة .. وحسب العادات والتقاليد ما يصير تبات في بيته ..

بعد مدة سنة عند البعض والبعض كانت تصل حتى 5 او 6 سنوات
يكون الرجال جهز غرفة او الشقة ...

- اول شيء يسوون ليلة الحنا من جديد
- بعدها يسوون ليلة الجلوة " اليلوة "

تلبس العروس اخضر .. ويقعدونها على كرسي بالوسط
وتمسك بايدها شمعتين .. ووالناس واقفين حوالينها وبايدهم قطعة قماش يرفرفون فيها فوق راسها
ويقولون الاغنية المعهودة " امينة في امانيها مليحة في معانيها تجلت وانجلت حقا سألت الله يهنيها .. جدايل شعرها حلت على اكتافها دلت .... "

- بعد الجلوة يسوون حفلة العرس .. وتلبس الابيض بهالليلة تروح مع زوجها لبيته وتكون اول ليلة تبات فيها في عش الزوجية .. مع ان بعد الخطوبة يلتقون ويطلعون وو الخ
في نهاية العرس بعد يقعدونها على كرسي
ويقعد زوجها قبالها على كرسي
والناس حوالينها .. وب فيه قطعة قماش خضراء ترفرف عليهم
ومخليين بوسطهم صحن فيه ماي ورد ويكون المعرس ماسك ايد زوجته ويصبون عليهم الماي ورد...
ويغنون عليهم " وات ريمبو وات يومي اول ما نبدي بالصلاة على محمد....
حبيبي لا تقول أنه سليتك سلتني العافية حين نسيتك

أنت الرازقي وانه جنيتك وكل عود درز عندي حسابه*

حبيبي لا تقول العب ولا اشعب ولا تأخذ بنات الناس تلعب

ولا تجعل رياض الحب ملعب سخي الأيد بين الناس ينحب

بنات الناس يبغون الدراهم وميفيدك تعب تركض وراهم* "
ومعنى وات ريمبو وال يومي هي :
white rainbow while you and me

ويكونون الاهل مجهزين المشموم والسكسبال يوزعونه على الناس ومجهزين منقوع الزعفران بالماي ورد
ويقولون اللي تبي تتزوج تاخذ شوي بطرف اصابعها وتخليه على مقدمة شعرها

- يوم ثاني صباحية العرس .. يطبخون جدور البرياني حق اهل الديرة كلهممم .. ويوزعون عليهم حلوى بحرينية ونقل


ومن الاغاني الشعبية اللي كانت تنقال في الزواج
- سبع ليالي وليلتين وليلة حتى ندخل دار ابوج يا زينه

- بالعافية يا حلوة بالعافية يادرة البحرين يالوافية
نذر عليه واشهدوا ياحضور لقسم الحلوى وانا الوافية*


- الليل ياللالي الليل ياللالوه
بالله عليكم خذوني عندك جمال*
الليل ياللالي الليل ياللالوه
ارعى جميلاتكم واشرب حليب اجمال*




😆 باجيب لكم الصور بعدين



هذي اعراسنا القديمة.. الحديثة فيها تغيير شوي

__________________

حاجة الناس إليكم من نعم الله عليكم ، فـ لا تملوا النِعم ☁✨