السلام عليكم ورحمة الله وبركاته
كيف حالكم أخواتي وأخوتي أعضاء المنتدى الكرام ؟
بصراحة مادري شلون أبدأ وممكن يكون موضوعي غير مرتب الأفكار ولكن إعذروني
أنا متزوجة من سنة وسعيدة في زواجي مع زوجي الحبيب :14: وطفلي الصغير حفظهما الله
أنا ما أعتبر الي بقوله بعد شوي مشكلة لكني ضايقة نفسي ومحتاجة أفضفض لاحد ما يدور بقلبي وما حصلت غيركم
ممكن اطول في موضوعي فالي حاب يطلع مو مشكلة والي حاب يكمل اشكره من اعماق قلبي
السالفة وما فيها اني مو عايشة في بيت مستقل انا عايشة في بيت زوجي مع أمه لا تفهموني غلط وتقولون هاذي تبي بيت بروحها لا والله انا رافضة اني أطلع واخلي ام زوجي بروحها وهي بمقام امي وهذا كان اتفاق بينا انا وزوجي من قبل الزواج
****** الحين بتقولون وين المشكلة *******
المشكلة انه اسلوب حياتهم ما يعجبني ........
** سهر الى نص الليل أقصد الى الفجر
أنا تعبااااااااااااااااااااااانة من هالشي لاني أصلا ما أنام عدل من ولدي الله يحفظه وبعد أضطر اني أسهر لوقت متأخر لا تقولون روحي نامي من وقت ما اقدر لاني لازم أجلس معاهم شوي ( أقصد الي يجونا زوار من أخوات زوجي وغيرهم ) وما تصير قعداتهم الا نص الليل
** وعلى ذكر أخته أطفالها على طول معي يا الله ما يخلوني ارتاح حارميني من خصوصيتي، أي وقت يدخلون غرفتي ويخربون ترتيبها وبعدين ما يخلون طفلي في حاله لازم يشيلونه وانا اخاف عليه يطيح من عندهم لان ما يمسكونه عدل هذا غير اني انحرمت من خصوصيتي مع زوجي وانتو فاهمين قصدي اكيد بس على العموم هي كلها شهر وتسافر لانها مقيمة برا البلاد
** طعم الاكل ما يعجبني بس استحي اقول شي، وانا ما اقدر اطبخ لاني ادرس في الجامعة انا ما اتدلع بس الأكلات هي هي كل يوم جسمي ضعف والسبة اني ما آكل نفس ما كنت آكل في بيت أبوي
ومادري صراحة بعد أشياء كثيرة لكن مو جاية على بالي
أنا مستعدة أرد على ردودكم وانتقاداتكم لكن تكفون ابي واحد أفضفض له بلييييييييييييييييييييز
انا والله قلبي كبير وكاتمة في قلبي وأتعامل بطيبة معاهم لكني حبيت افضفض شوي

ياحليلج يارمش..والله كلنا ودنا نفضفض ...بس الله يعين..
على موضوع السهر...فلازم تعوديهم شوي شوي انج تنامين من وقت...وماعليج من الزوار..خاصة انهم من يا اخوان او خوات زوجج..يعني من اهل البيت بيسوون اللي يبونه... واتعذري في البدايه بالتعب والطفل..اشوي اشوي لين يتعودون... وخبري زوجج انج ماتحبين السهر..وانه يتعبج..وهو اكيد بيحس فيج
ومن ناحية موضوع الاكل... انا مثلج بس الفرق اني الحمدلله اطبخ لهم الغدا فحاول اذا مافي شي محدد اضبط الاكله على مزاجي والحمدلله صرت انا طبيخة البيت عقبالج
بس بما انج في الجامعه..حاولي مرات تطبخين شي على قدج..او تشترين اكلات جاهزة اتحبينها واتخلينها ببراد غرفتج.. وتسخنيها حزة الجوع
اما عيال اخته..فالحل بسيط صكي الباب بالمفتاح وطنشي اي تعليقات...ولاتخليهم يدخلون ابد.. وخلي المفتاح دوم بجيبج ....والطفل حاولي اتييبله كرسي او سرير صغير هاللي ينحطون في اي مكان... وخليه قريب منج دايما وحذريهم انه حد يمسكه وعادي اتبقين عينج فيهن اشوي عشان يخافون هذا ولدج باجر لاسقط ولاشي بعيد الشر محد بينفعج حتى لو امهم زعلت اشوي..طالعيها ببراءة وقوليلها اسمحيلي اذا تقدرين عليهم ياليت اتكلميهم..ماحب حد يشل ولدي..وهي بتستحي

عزيزتي رمش الغزال
شعرت من رسالتك أنكي تقصرين في حقك حتي تسعدي الاخرين
لم تقولي شيء جديد ...هذا حال ناس كثيرين ....

كل اللي ساكنين مع أهل الزوج يحسون نفس الشيء
يعني مثلا لو كان العكس زوجك ساكن مع أهلك بيشعر نفس الشيء

يعني عزيزتي لابد أن تتأقلمي مع الوضع وتنظمي حياتك ...
وكأنك في منزل خاص لك ...نظمي وقتك ...ولايهمك من الاخرين وسهرهم
لانكي بكل بساطة طالبة وأم ولكي واجبات وحقوق ....بالنسبة للاطفال لاتدعي باب غرفتك مفتوح وعندما يطرقون الباب لاتجيبي ....

أتمني لك حياة زوجية سعيدة

__________________

um flan
شكرا لانك اول من رد على موضوعي
من ناحية السهر حاولت بس ما قدرت لان اصلا عشاءنا متاخر مثل ما غدانا متاخر والمشكلة انه زوجي يتاخر بعد وصعب انه يغير طبعه مع اني شارحة له الظروف وهو يقول لي روحي نامي بس انا ما عرف انام عنه
لكن فكرة الاكل في البراد فكرة حلوة وأظن انها بتفيد
وعيال اخته أصك عنهم الباب بالمفتاح بس اذا جوا يطرقون الباب يعورني قلبي وأفتح لهم مرة طنشت وسويت روحي ما اسمع لكن في النهاية ما قدرت أسكت عنهم كسروا خاطري وهم واقفين عند الباب ومستحيل اكلم امهم أستحي والكلام ما يطلع مني


مهد
شكرا على الرد ولكن صعب التاقلم مع هكذا وضع


أنتظر المزيد ودمتم ....................................

اختي رمش... عادي خلي قلبج قوي..انا اخوان زوجي الصغار سووها في بداية الزواج والله لايراويج كان حالي من حالج.. بس قويت قلبي وصرت بعد احذرهم من كثر الدق..اقولهم النونو نايم لاتصحونه...او ابى انام وغيره...والافضل انج تطنشين الدق..وتشغلين نفسج اخرتها يملون ويروحون يلعبون..مره مرتين ويملون الدق نهائيا الا اذا في شي ...الاهم راحتج واعصابج...واشوي عصبي مرات عشان يخافون اكثر

ومن ناحية النوم حاولي من تتعشين اتسيرين ترقدين..واذا على زوجج طنشيه مره مرتين وارقدي غصب حاولي يمكن يرد هو بعد ينام من وقت...لان انتي اللي تتعبين وتتعب اعصابج بالسهر خاصه انتي ام..
وخذيها نصيحه مني...كلام مهد صحيح..خلي عنج الطيبه الزايده..كنت مثلج ببداية زواجي ما اخذت الا حرقة الدم والضغط على الاعصاب....حياتج الخاصه نظميها مثل ماتبين ..نووم..واكل وغرفه خاصه ...ومحد يقدر يقولج شي .. وانتي توج في البداية حاولي تنظمي حياتج من الحين...وبسرعه قبل لاتزيد مشاغلج.. وتضغطين على نفسج اكثر

اتذكرت شي...اختي انتي ام..اذا ماعدلتي نظامج الخاص بالنوم...باجر ولدج بعد بيكون له نفس النظام..وهذا ظلم له خاصه انه طفل صغير ويحتاج للتنظيم..... فاذا مب عشانج عشان ولدج لازم تغيرين اسلوبج ونظامج

um flan
شكلي بسوي الي تقولين عليه قبل لا أستخف
بحاول أخلي من شقتي الصغيرة قصر أحلام والله يساعدني
وما تقصرين حبيبتي

الي قلتي عنه صار ومواعيد نوم ولدي صارت نفسهم والحين احاول اغير نظامه خصوصا انه يتعبني في الجامعة

اختي من ظاهر موضوعك أنت حساسه زيادة وساهديك هذه النصائح :
* طبقي القاعده طنش تعش وإذا لم تعش ستنتعش . فطنشي ولا تدققين .
* حسب ما فهمت من موضوعك هذا ظرف ويعدي ( شهر وينتهي ) .
* بالنسبه للأكل أحضري بعض الاكلات وضعيها في شقتك وكلي منها عند الحاجه .
* بالنسبه للاطفال الصغار فلا تسمحي ابدا لم بحمل ابنك لأنه امانه .
* من راقب الناس مات هما فلا يهمونك اخوت زوجك ( اهم شئ زوجك وامه )
تحياتي

غاليتي رمش الغزال : المؤكد انج مو مرتاحه بس اتسويين نفسج مستانسه علشان تسعدين زوجك وترضينه لانج عارفه ان رضا الزوج والوالدين من رضا الرب لكن لا تنسيين ان هذا حقج وما يزعل حد ولا تقدمين انت دايما التنازلات لانج بتندمين وايد نصيحة مجربه