عندي حل .. ولكن الحل عندي بوجود خادمة
ولكن خادمة تشتغل بنظام الساعات ..

أنا عن نفسي ماحب الخادمة تكون معانا بنفس الشقة
خصوصاً إن شقتنا صغيرة وما بناخذ راحتنا انا وزوجي (وإحنا تونا معاريس)

وبنفس الوقت شغل البيت يرهقني لأني ما تعودت اسوي كل هالاشياء قبل الزواج
يعني كنت مدللة ولا اشيل الريشة من الارض..

عشان جذي استعنت بخادمة تشتغل لي بنظام الساعات
يعني مثلاً وقت الي احتاجها اتصل فيها تعالي لي .. واعطيها فلوسها على قد الساعات الي اشتغلت عندي
اذا اشتغلت ساعاتين اعطيها اجره ساعتين واذا اشتغلت 3 ساعات اعطيها اجره 3 ساعات وهكذا..

ولكن الحمد لله آنا الحين تعلمت اشياء وايد . .
وصرت ست بيت ممتازة , بشهادة زوجي ولكني لازلت لا اشتغني عن الشغالة
ولو كان مرتين في الاسبوع .. حددت لها تجيني مرتين بالاسبوع فقط ولمدة ساعتين

__________________

نعم ممكن تستغني عن الشغالة بشروط

1) إنك تكون شخص منظم و مرتب و معتمد على نفسك ..أغراضك في محلها..لمن تستخدم شيء ترجعه لمكانه..لمن تأكل تنظف الأواني اللي تستخدمها ..ملابسك النظيفة مرتبة في دولابك ..و الوسخة في سلة الغسيل في مكانها المخصص ...و تحافظ على نظافة المكان اللي أنت فيه..و تخدم نفسك بنفسك في كل شيء..

(سبحان الله هذه الأمور معدومة عند كثير من الرجال وهو سبب إعتماد الزوجة على الخادمة لأنه سي السيد تنقص رجولته و كرامته لو شال المنديل اللي مسح به من الأرض أو على الأقل يرميه في السلال اللي مرتبتها الزوجة في البيت..و تنقص رجولته لو قام شرب كأس موية من المطبخ ..و تنقص رجولته لو حط ملابسه الوسخة في سلة الملابس الوسخة)..

2)تستخدموا احدث الأجهزة للقيام باعمال البيت مثل غسالة الصحون ، غسالة الملابس الأوتوماتك ( اللي تغسل و تشطف و تنشف 100% بنفسها ) ، العجانة و الخلاطة و قدر الضغط لتسريع عملية الطبخ..

( وهذه كثير من الناس تستكثر سعرها الغالي لم تشتريها )

و الكوي عند المكوجي..و في حال زوجتك عاملة الأكل من المطاعم أو تصبر على الأكل المعد ليلا أو تصبر تطبخ لك بعد الدوام..

3) تساعد زوجتك في العناية بالأطفال ( يعني ما تقرف تحفضهم أو تحممهم أو تعملهم رضعاتهم و تتناوب مع زوجتك في النوم و السهر عليهم)

(وهذه من المستحيلات عند كثير من الرجال..و اللي يتقبلوها أو يعملوها يعتبروا أحجار كريمة و جواهر نادرة الوجود)

و تتنازل عن فرصة الجلوس مع زوجتك بهدوء كما في الأيام الأولى للزواج..

__________________
أدعوا لي ربنا ينور لي دروبي..و ييسر لي أموري..و يفرج لي همومي..و يبارك و يوسع لي في رزقي..

أهلا بكم جميعا

صقر الشرقية

شكرا لك أخي والله يعينا على النظام


منت عاجبني

فكرتك جميلة أختي وبفكر فيها

بس أتوقع هذا النوع من الخادمات ينبغي الحذر منه في موضوع السرقة وأسرار البيت

لكن فكرتك حلوة


a_gleam

الشروط أختي معقولة إلا الشرط الأخير وهو الجلوس مع الزوجة بهدوء

لأنه هذا الشرط من أركان الزواج عندي والا كيف السعادة تدوم في الزواج إذا كل واحد ما يقول مشاعره للآخر في مكان هادئ

وهذا الشيء بإذن الله أقدر عليه بس أبغى تعاون

أنسى مرررة إنك تستمتع بوقتك بهدوء مع زوجتك لو خلفتم ..
لمن تتزوج حاول قدر الإمكان تستمتع بوقتك قبل ما يجوا الأولاد ..أستغل كل دقيقة و كل ثانية..و لا تبخل على زوجتك لا بسفر و لا بمطاعم رومانسية..و لا بأي شيء..
من أول يوم تصير فيه أب أنسى الهدوء..
ممكن تضطر تجيب شغالة بس عشان تلاقي وقت هدوء مع زوجتك..

__________________
أدعوا لي ربنا ينور لي دروبي..و ييسر لي أموري..و يفرج لي همومي..و يبارك و يوسع لي في رزقي..

انا اشووف انة تقدر تستغني عنهااا
شوف انا عندي اثنين بنت وولد وكلهم تحت 3 سنوات وبيتي يعني موكبير شوي بس متعب
وانا يومياا اطبخ واهتم بعيالي وزوجي دائما يجي وانا مرتبة وعيالي كماااان
يعني عااااااااادي وفوق هذا كلة اجلس اختلي بنفسي ساعتين او ثلاث اذا ناامو كلهم
اجلس اقرأ او على النت

اهم شي الواااحد ينظم نفسة وراااح يلحق على كل شي ان شاء الله
ويكووون مرتاح نفسيااااا

بس الاحلى من هذا كلة زوووجي دائما يقدر مجهوداتي وتعبي عشااانهم

اخي الكريم ..

انا مع الاخت الي قالت عن الخادمة الي بنظام الساعات

ترى شغل البيت ماهو بسهل ... لاتتوقع شغل البيت هو تغسيل الصحون

ترى كي الملابس تعتبر طامة من الطامات الكبرى .. الي تكسر الظهر وتعور الرجول

اخي .. لا تخلي الخدامة تدخل غرفة نومكم ..

حدد شو اهم شي متعب في البيت ؟

المطبخ .. غسيل الملابس وكيهم .. وتنظيف المطبخ.. وتمسح الارضية مالت الصالة

جيب خدامة اتخلص لكم هالامور.. وتكون تحت اشراف الزوجة

الخادمة لو تبغي تسرق .. بتسرق شي ثمين ماراح تسرق صحن او كاس ماي

اي شي ثمين حطه في غرف النوم .. وانتو بس عليكم تنظيف غرف النوم.

تحياتي

a_gleam

شكرا لك أختي ويا رب يكون في وقت حلو مع زوجتي حتى لو ما في خدامة والحريم اللي ردوا هنا وما عندهم خدامات صراحة ردودهم تشجع إني ما أحتاج خدامة وأنا بتعاون مع زوجتي إن شاء الله

وأشكرك أختي على ردك الذي أفادني حقيقة


daimound22

أهلا بك أختي وأشكرك على ردك الجميل

وأنا عرفت انك ما شاء الله مستمرة في عملك بدون خدامة من خلال (بس الاحلى من هذا كلة زوووجي دائما يقدر مجهوداتي وتعبي عشااانهم) وهذا بالفعل اللي يخلي الانسان يستمر في عطاءه وعمله أسأل الله يسعدكم ويهنيكم

وردك الجميل أفادني كثير


الفهدي 25

يا هلا ومسهلا أخوي

والله يا أخي أنا ما ودي أتعب الزوجة لكن في نفس الوقت ودي يكون لها حركة ونشاط في البيت غير التلفزيون والتلفونات وأنا بتعاون معها في هذا وإن شاء الله بيتنا ما يكون كبير مرة يعني على القد

أما الاشراف على الخادمة فيخوي انسى لأنهم يشرفون فترة بسيطة ثم ينقطعون

وصدقني يا خي ما في احلى من انك تبستم وتفرح إذا زوجتك جابت الغدا أو العصير وإنت تشكرها وتثني عليها وانت تقوم تحب ايدها وتساعدها والله منظر حلو ما تقدر تسويه مع الخدامة

والله أحيانا اشتهي اسوي هالشي مع أمي لكن الخدامة للأسف هي تطبخ وتسوي وتنظف كل شي في البيت


وأنا صراحة أشوف إن تعاون الزوجين في التربية وفي شؤون البيت يزيد من المحبة والألفة

وفي هالزمن قليل من يسويه مع إن الحريم يفرحون إذا شافوا الرجل يتعاون معاهم


الله يغنينا عن الخدامات ويرزقنا البديل الأحسن إنه سميع مجيب

ممكن خادمة بس ما تبات فى البيت

__________________

تبغون الصراحه هالايام البيت من غير خادمه صعب ادارته وخاصة اذا كان البيت كبير اما ان كان البيت صغير وام العيال ما تشتغل يعني متفرغه انا في رأيي ما في داعي لان وعن تجربه قدرت ام العيال اتدير بيتها وبكل جداره بمساعدتي لها لاني وفرت لها كل شي من الالف حتى الياء وخاصة هالايام متوفر غسالات الملابس الاوتماتيكيه وحتى غسالة الصحون يعني بكبسة زر اتنظف لك الملابس والصحون اما بالنسبه للكوي انا في رأيي تاخذ الملابس للمغسله وترحم ام العيال بتنال الاجر وذلك لصعوبة هالمهمه !! فما بقي سوى الطبخ وتنظيف البيت وهذا الحمدلله سهل ولو تذكرت البنت امها كيف كانت تدير البيت ومن غير الوسائل الحديثه كالمكنسه الكهربائيه والغسالات والادوات الاخرى وقد يكون لديها اكثر من عشرة اولاد واحيانا تكون حامل لهان الامر عليها ولكن بناتنا للاسف دلوعات شوي !!!!

اخي الحبيب

والله اني عارف مشاعرك وحاس فيها .. وعارف وش تبغي بالضبط .وانا بصراحة ودي تكون حالتي في المستقبل مثل ما قلت ياخوي ... . لكن والله الامور اصعب مما تتخيل

اذا الزوجة تشتغل ترى الخادمة ضرورية في البيت .. يمكن في اول فترة من زواجكم ماراح تحتاجون ابد

لكن بعد خمس سنوات بتحس انك محتاج لخادمة

تخيل اخوي ان زوجتك ترد من الدوام تعبانه وعندها طفلك رضيع .. يحتاج لامه في اغلب الاوقات .. ويجيها الولد الثاني يقولها درسيني رياضيات ما افهم .. والطفلة الثالثة تبغي تلعب .. والبيت اصلن يبغاله تنظيف .. البلاط من فترة ما تنظف .. الشبابيك عليها غبار ماتنظفت .. فيه كثير ملابس تحتاج وقت عشان نكويها .. اووه الطفلة كبت العصير على الارض .. الولد يصيح يبغي عشا .. اووه الرضيع لازم انبدل حفاضته .. وانت رايح الجمعية تجيب حاجيات البيت او مشغول بشيء ما خارج البيت

.. توصل البيت زوجتك اعصابها منهارة وتصرفاتها اتحسها عصبية وتفكرها متغيرة عليك .. بس الضغط يولد الانفجار

اخي الكريم .. مش شرط الخادمة هي الي تطبخ .. بس على الاقل تقصص اللحم وتجهزه وتقصص الثوم ومتطلبات الاكل .. وتجي الزوجه من الدوام وتعمل الغدا بشكل سريع لان المكونات جاهزة ..

وتقدمه

بالنسبة للعصير مافيها مشاكل .. تروح الزوجة وتسوي لك احلى عصير

تحياتي

__________________

متى زرت والدك آخر مرة ؟