الله يهيدكم ويصلح حالكم خواتي
في البدايه حابه اشكر اللي افهموني صح وعرفوا اني ماقصد الا الخير ورفع الهمم وبس
اما اللي اخذوا الموضوع بحساسيه او قالوا لي انتي تطلقي وبعدين شوفي وو الخ
الله يهيدكم ليش جذي !! انا كنت ابغي لكم الخير
كنت ابيكم تعيشون حياتكم بحلوها ومرها وترضون باللي الله كتبه وتتوقعون الافضل
ادري حاسين بحرمان بس مو معناته الحياه متوقفه على هالشي
يعني الزوج المنتظر واثقين انه حنون وعطوف وكفو وبيحس فيكم !!!
قولوا يارب ارزقنا الزوج الصالح وكرروا الصالح ادعوا وزيدوا وعيدوا بس بعد تفائلوا بالله خير
وانا قلت ان عندي صديقات كثير مو متزوجات ومطلقات بس انا ابداً ماتكلم عن زوجي وعيالي بالفاضي والمليان عندهم وكأني اشوف نفسي عليهم
بالعكس اللي ماتزوجت اتكلم معاه بالشي المشترك بينا وهو الموديلات والملابس والوظيفه اذا كانت زميلة عمل
والمطلقه نفس الشي بس اذا عندها عيال اكلمها عن العامل المشترك بينا وهو العيال ومشاكلهم وطلباتهم والاشياء الزينه فيهم
اما انا ماتكلم عن زوجي الا اذا شي يستدعي مثلا استاذن منه علشان اطلع معاهم او نلتقي بمكان فاضطر اقولهم باستاذن من زوجي واشوف يوافق والا لا
وهم اصلا اللي يقولون يااه من هالزوج اللي لازم تستاذنين منه واحيانا يزعلون لمن اقولهم رفض اطلع
فهم اللي يتنرفزون من زوجي مو انا وهم احيانا اللي يتحمدون على انفسهم انهم بدون زوج
وبالعكس احيانا من قبل المزح يقولون الحمدالله ماتزوجنا ( عمري ماقلتها لهم وهم قالوها )

بعدين انا حبيت انكم تعيشون حياتكم بالجانب الحلو فيها وتصبرون على الجانب المر وتدعون الله يعوضكم فيه خير
واصمم واقول عيشوا حياتكم
الحياه ماتتوقف بزوج او ولد
بتقولون لي متزوجه وام عيال صح
بس انا لو زوجي يهيني او مايحترمني او مدمن او غيره من العيوب الي ماتتحمل والله ماقعد معاه
وعندي اعيش مطلقه مرفوعة الراس ومعززه ومكرمه ولا اعيش مذلوله ومنهانه بس علشان اقول اني زوجه مو مطلقه !!!
يابنات الزم ماعلى الواحده كرامتها وعزتها تعيش مرفوعه وشامخه فيها

اما خواتي الصغار اللي غاوين حزن شسوي فيكم انتوا يا كبريائي وشوبارد وياربي لاتحرمني ومن على شاكلتهم
على كيفكم عوانس !!!
هي فوضى يعني !!!!
مادري وش اقول بس !! اللحين واحده عمرها 21 تعتبر عانس !!!
الله يهديكم بس طيب انا عيالي ماراح يتزوجون الا لمن يكملون دراستهم واكيد شريكات حياتهم بيكونون جامعيات مثلهم
يعني اقل شي تكون بسنه ثانيه او ثالثه بالجامعه واحسن شي لو كملتها
بالله لو انتوا تقولون عن عمركم عوانس شتبون يعني عيالنا يتزوجون بنت 11 او 12 سنه مثلا !!
احنا في زمن مفتوح والكل يدور له على البنت الفاهمه والناضجه والمتعلمه واللي فكرت اصلا بالزواج واشتاقت له
مثلها تكون حريصه على حياتها الزوجيه ومتمسكه فيها
وفي شباب يتزوج بنات سن 28 و 29 لان نصيبهم جا بهالوقت
وبعدين الرجال اللي بسن 40 سنه وتوفت زوجته اكيد بيدور على بنت بالثلاثينات تكون ناضجه وواعيه وحنونه
وحتى لو كانت اكبر وراحت عليها فرصة الامومه الامر عنده عادي لانه عنده عيال وهو يبي ام تربي عيال وتشيل المسؤوليه معاه
وهي ماراح تتعب نفسيا انها ماحملت وبالعكس بيكون الله عوضها بزوج وعيال جاهزين
حكمه من الله يمكن لو تزوجت كان زوجها بيذوقها المر ولو ماحملت كانت بتتعب من العلاج والعمليات
ويمكن ويمكن ويمكن ......... الخ
في الاخير تكون حكمة الله وقدره ونصيبه هو الافضل لنا وماكان مطلوب منا الا الصبر والتفائل بالخير من الله
ولهالشي كنت اقولكم عيشوا حياتكم بدون حزن وبدون هم وتفكير لين يجيكم النصيب اللي الله كاتبه

اخيرا اشكر اخوي لورانس الشمري والذئبه وكل من تفهمني له مني جزيل الشكر والامتنان

تحياتي لكم وفوق تحياتي علشان ماتزعلون بدعيلكم واقول
ياربي ارزق خواتي الزوج الصالح والذريه الصالحه وعوضهن كل خير

اختكم صريحه جداً

__________________

اختي صريحة جدا

لما قرات موضوعك زعلت منك و السبب تجدينه في بعض ردود الاخوات

لكن لما قرات ردك عليهم حسيت بصدقك و بنيتك الصافية, فاردت ان اشكرك على ذلك, انا من اكثر من شهرين لم اشارك في هذا القسم, لانني مللته, مرات ادخل اتصفح بعض المواضيع, و مرات كثيرة لا اكمل القراءة, تعرف لماذا?

السبب يوجد في ردك انت, لانني اعتقد انه ليس لي مكان في هذا القسم فهو للناضجات الصغيرات (19 سنة مثلا تعتبر نفسها متاخرة عن الزواج) و الذي احزنني ان الجميع يتفاعل معها عندما تكتب عن احساسها بالوحدة و الحزن و الكل يرفع معنياتها, و لما تاتي وحدة مثل حالاتي 35 سنة مع مس عشق, ترى ان الكثير لم يعبرها و لو حتى بدعوة بالشفاء حتى اصبحت اعتقد ان الاعضاء يقولون ان شكوتي لله لم يعد لها فرصة للزواج و انه ليس لي مكان في قسم العوانس

صحيح انني لم اطرح مواضيع كثيرة و لا املك الاسلوب الجميل الذي يشد الانتباه, و المشكلة ان جهازي لا يكتب يالعربي ضف الى ذلك ان ثقافتي فرنسي, و لكن هذا لا يمنع ان الكلمة الطيبة صدقة, لكن عذرا لكل الاعضاء نادرا ما وجدت من يتفاعل معي و يبتسم لي

تحياتي

__________________
(قَالَ إِنَّمَا أَشْكُو بَثِّي وَحُزْنِي إِلَى اللّهِ وَأَعْلَمُ مِنَ اللّهِ مَا لاَ تَعْلَمُونَ) (الآية 86 من سورة يوسف)

غاليتي صريحة جدا
اولا تشكرين على صراحتك وحسن نيتك وان كان البعض لم يتلمسها
فهي واضحة للعيان
ولكنها حساسية البعض تجاه مثل هذة المواضيع هي السبب في بعض الردود الحزينة
انا سيدة متزوجة مثلك يا غالية وفهمت ما تعنين,,,, ولي صديقات مطلقات وبعضهن جواهر (لا احب مسمى عوانس) وافهم ما يحسسن به تماما
تخيلي معي اختي لو انك تعانين من زوجك لسبب ما ,,,, والطلاق غير وارد كحل لمشكلتك معه والتي تتنفسينها مع كل نفس من انفاسك ليل نهار
ثم تاتي جوهرة وتقول لك
سو وات عندك مشكلة مع زوجك؟؟؟
سو وات تعانين؟؟؟
سو وات ليلك بكاء ونهارك هموم؟؟؟
عيشي حياتك ,,, البس ,,, اطلعي ,,,, وانسي مشاكلك بضغطة زر
بكل بساطة بتقولين الي يده في الموية مو زي الي يده في النار
انا معك ان الموضوع كله نصيب واننا مسيرين في دنيانا هذة ولسنا مخيرين
لكن هذا هو طبع الانسان يبحث عما ينقصه دائما ولا يرا ما يملكه بين يديه
فالافضل والاسلم لنا جميعا ان لا ننقص من قدر معاناة من امامنا
فهذة الشاكية ( سواء كان متزوجة , مطلقة , او جوهرة) وجدت المنتدى متنفسها لتبوح باسرار قلبها في عالم لا يعرفها
فماذا تنتظر برايك؟؟؟
ربما حلا
او ربما مشاركة وجدانية
او في اضعف الحالات تريد دعوة صادقة لتواسي بها نفسها

لا اعلم ربما انسقت في الموضوع اكثر من الازم بس صدقوني اخواتي
صدقني يا كل من يقرا ردي هذا
لو قارنا كل نعم الدنيا لن نجد اهم ولا اغلى من,,,,,,,,, العافية,,,,,,,,,
فالحمد الله الذي عافانا في ابداننا وعقولنا وجعلنا مسلمين

اشكرك اختي الصريحة وجعل ما طمحت اليه من خلال طرحك لهذا الموضوع في ميزان حسناتك,,,, واستاذنك بهمسة صغيرة في اذن اختي ,,, شكوتي لله

اختي شكوتي بالله او ترضين لنفسك دعوة هنا في المنتدى او دعوة لك في ظهر الغيب مع كل سجدة اسجدها ؟؟؟؟
انا بالنسبة لي اخترت لك الاخيرة,,, دمتي سالمة دائما

اختك شذى2

حبيبتي شذى و الله كلمتك ابكتني

والله لما اجد موضوع (ادعولي بكذا و كذا) والله ادعو للشخص, و لما اشوف توقيع فيه دعوة ادعو للعضو بما طلب

اختي شذى, لما تعرفت على المنتدى, كل ما اعرف ان هذه العضوة عانس ادعيلها في صلاتي باسم عضويتها, يعني ما كنت اعمم كنت انطق بالاسم

لكن بعد فترة لاحظت ان الاعضاء يتفاعلو مع الموضوع حسب صاحبه و ليس حسب خطورة المشكل. لاحظت مرات ان مع عضو معروف تصل صفحات الاجابات الى 10 او اكثر حتى لو كانت مشكلته صغيرة, و لما عضو غير معروف يكتب على مصيبته, نجد عدد التفاعلات قليل جدا

عارفة حيطلعلي اعضاء يقولو انهم غير مجبورين بالرد على كل المواضيع, طبعا سارد عليهم بان جبر الخاطر يؤجر عليه المسلم, و ادخال السرور لقلب المؤمن فرض, و لما واحد يطرح مشكلة و يلاقي التفاعل معاه, يفرح و ترتفع معنوياته ستكتب لك حسنات

الله المستعان و لك اختي مني دعوة في جوف الله

__________________
(قَالَ إِنَّمَا أَشْكُو بَثِّي وَحُزْنِي إِلَى اللّهِ وَأَعْلَمُ مِنَ اللّهِ مَا لاَ تَعْلَمُونَ) (الآية 86 من سورة يوسف)

شوبارد وعبد الملك والله لااااااايق اسمه حلو بعد اعجبني
مزحك على راسي ياخالة << دخلت جو مصدقة

-------

اختي صريحة.. انا فاهمتك زين.. وماصرت ضدك ابد اتمنى تعيدين قراءة ردي..


اختي شكوتي لله.. من جد ماصرت أشوفك تكتبين مثل أول وبصراحة دايم أسأل هالسؤال.. عزيزتي كلنا هنا يد وحدة

واخوان واخوات نهون على بعض يعلم الله انك في بالي ودايم اشوف اسمك واقول وينها ماترد مثل اول!!

__________________
اللهم لك الحمد والشكر
"ولئن شكرتم لأزيدنكم"

ابحث لي عن قسم عوانس درجة ثانية, و هو القسم الذي يهتم باليائسات من الزواج و الي اعمارهم ما بين سن اليأس المعنوي و سن اليأس المادي, يعني امامي كم سنة و يجب علي العثور على قسم الي فاتهم قطار الزواج و المحطة اتنسفت, يعني لا تستطيع حتى شراء تذكرة

هذا الكلام ليس نابعا من اليأس و لكنه نابع من الرضا بما كتبه لي الله سبحانه و تعالى

__________________
(قَالَ إِنَّمَا أَشْكُو بَثِّي وَحُزْنِي إِلَى اللّهِ وَأَعْلَمُ مِنَ اللّهِ مَا لاَ تَعْلَمُونَ) (الآية 86 من سورة يوسف)

هلا وغلا

قرأت مقال الأخت صريحة جدا وقرات كذلك الردود

ربما أنت أختي ما تحسين بالظروف والمواقف حتى لو كانت صغيرة اللي تمر على كل وحدة كبرت في السن وما تزوجت لحد الحين

ولكل الأخوات اللي ردوا عليها بحساسية كبيرة ( والله حاسة فيكم وأحيانا أعيش مثل هذي المواقف اللي تصير لكم لكن ابعد عن تفكيري هذي الفكار واقول ان شاء يا اللي يعوضني خير)

ولكن أخواتي الأخت كانت تريد بنية حسنة التخفيف عليكم و تنبيهكم بامور اخرى غفلتن عنها

والله هناك امور في الدنيا ( ربما لا تكون أحلى من الأبناء ومشاكل الزواج وغيره) ولكن أشياء احيانا احيانا تغيننا عن التفكير بالزواج والزوج والأبناء

الموضوع جدا متشعب

في الغرب مثلا ( ولا اعتبر مجتمعهم مجتمع مثالي ولكن ...) لا توجد كلمة عانس في قاموسهم فقط كلمة عزباء أو أعزب ليش؟

مشكلتنا في المنطقة ان الأهالي والتقاليد والأعراف جعلت حياة البنت كلها تدور حول شي واحد بس وهو الزواج وانجاب الابناء كاننا ما عندنا قيمة غير الإنجاب والزواج

ولا أحقر ها الشي باالعكس هو امتياز نحمد الله عليه حمدا كثيرا لكن ...........

صدقوني الحب لا يتجلى فقط في الزواج بل يتجلى في اشياء كثيرة بس للأسف منطقتنا هنا ما تسويلها أي قيمة

من أهم الاشياء اللي تجلب السعادة هو عمل المراة ... والله من أهم الاشياء

ليش ؟ أنا بقولك

هناك وظيفة محددة للبنت في هذي الحياة صح؟ وهو الآنجاب والاهتمام بالمنزل وغير ذلك

ولكن أليست الوظائف رزق من الله وهو اللي يقسم الأرزاق ؟ اللي ما أخذت العمل الأول تقدر تاخذ العمل الثاني وهو العمل خارج المنزل أو حتى داخله

عمل ينفع المجتمع ويبقالك ذكر واسم بين الناس حتى بعد رحيلك ربما لن تلقيه اذا كان عندك أبناء



أنا احيي وبصراحة المرأة العاملة اللي تبني مجتمعها وأحسدها الف مرة على اللي عندها

ما قلتلك العمل ارزاق وكل راح ياخذ رزقه

اتمنى ما تشوفون كلامي مبتذل او مثالي زيادة عن اللزوم ولكنه الحقيقة والواقع بأجرد صوره !!

الله يرزق جميع بناتنا الخير والزوج الصالح والأبناء الصالحين

ويجبر خاطر كل متزوجة أو مطلقة او ارملة او عانس ويعينها في حياتها ويبعد عنها الهم والضيق

آآآآآآآآآآمين

__________________
الظلال تمد ايديها لنا !
هل يا ترى تكون ارفق علينا من الضوء؟

اختي صريحة جدا كلامك على العين والراس سلمت يمينك
خالتي شذى2

ما عندك نية تزيدين حريم عيالك تكفين جيبي لي واحد

معك حق والله
حتى انا لاحظت هذا الشي
جزاك الله خير

غاليتي شكوتي لله
الحمدالله انج احسنتي الظن فيني
واعتذر اذا سببت لج الحزن ومن قال مالج مكان يالغلا اكيد لج مكان
ويارب اشفي اختي شكوتي لله وعوض صبرها خير وارزقها بالزوج الصالح والذريه اصالحه
وحابه اقولج قصه لصديقه لي تعرفت عليها في العمل وبقول قصتها لج ولبنات المنتدى
صديقتي هذي تاخرت في الزواج بس ماكانت تظهر لي الانكسار اللي اوشوفه منكم ولا كانت تاخذ كلامي بحساسيه مثل اغلبية اللي ردوا علي تمنيت تكونون مثلها وابيكم مثلها وبقول قصتها اللحين
صديقتي هذي اكبر مني بـ 10 سنوات تعرفت عليها في العمل من اول يوم توظفت فيه رحبت فيني وحاولت تخفف الخوف والخجل والغربه اللي فيني وشالت الكلفه اللي بيني وبينها وخففت عني رهبة اول يوم وكانت وايد متعاطفه معاي هي ومجموعه بسيطه من الموظفات بعكس تصرف اغلب الموظفات القدامى واللي يحبون يتشتطرون على اي موظفه جديده بس هي اكثر كانت حبوبه وطيبه وراعية واجب واصول ماشاء الله عليها حبيتها والله من اول يوم
قامت بعدين تسالني متزوجه والا لا وعندج عيال وكل شي عني وعرفت بعدين انها مو متزوجه وكان سنها بسنج يا شكوتي لله بس يحليلها ابد مو مبين عليها حزن ودايم تسالني عن عيالي وتعطيني حلاوى لهم وحتى زوجي عارفه اسمه وتقولي كاش هاه شقال فلان يعني زوجي تسولف عادي يحليلها طيبه
وبمره كلمتني بشي ماتبي حد يعرفه قالت لي تعرفين فلانه الموظفه عندنا قلت لها ايه قالت لي جايبه لي حريم يشوفوني في الشغل تبي تخطبني قلت لها والله !! ( يعني فرحت لها ) بس ردت علي وهي زعلانه ومعصبه ومنقهره قالت لي: هي وش شايفتني مو انا اللي اتزوج بهالطريقه ولا انا اللي انعرض علشان اتزوج وقالت لي انها ردت عليها وقالت وفري على عمرج ولا تجيبينهم عندنا
وانا استغربت منها بس عجبني فيها اعتزازها بنفسها هي فعلا تبي تتزوج ودايما تقولي ادعيلي ولمن اسافر العمره تقولي ادعيلي لاتنسيني يعني تبي تتزوج بس تبي زواجها يجي بطريقه رسميه باللي تعودنا عليه ناس سألوا عليها وراحوا بيت اهلها وخطبوها مو بالطريقه اللي صارت لها واللي عجبني اكثر منها انها مو اي حد توافق عليه يعني لانها تاخرت في الزواج توافق على اي واحد ولو كان بدون دين او سيء الخلق
والله انها عجبني وكنت اقولها كاش انتي تعجبيني ماترضين باي واحد ومو مهتمه بتاخرج في الزواج فكانت ترد علي اهم شي الزوج الصالح
وبعد سنه من تعرفي عليها انخطبت من واحد متزوج بس علاقته مع زوجته ورق بس لانهم في خلاف دائم ومخليها للعيال وبعد خمس سنوات منعزلين عن بعض قرر يتزوج ويخليها للعيال رقم ان زوجته جميله وهو وسيم بس زوجته شريه وراعية مشاكل وهو يدور على انسانه طيبه وتفهمه ومو مهم عنده الجمال وصديقتي بسيطه جدا في الجمال يعني حتى زوجها احلى منها بس طييييييييييييبه جدا وقلبها ابيض بس هو سأل عنها ودلوه عليها الحريم وانا عني والله كنت ادور لها واحد يستاهلها من طيبتها وعقلها واللحين عندها ولد وبنت قمر يجننون وربي محد يصدق انهم عيالها من حلاتهم طالعين على ابوهم وعماتهم
كانت راضيه بنصيبها وتتخير بعد يعني ماكانت ترضى باي واحد وتفهمني صح لدرجة اني احيانا هي من بد اللي ماتزوجوا ممكن اتكلم معاها عن مشاكلي الزوجيه احس انها اختي الكبيره واحس انها فاهمه الحياه اكثر مني وتعرف للاطفال كثير لانها ربت عيال اختها ماشاء الله فاهمه لكل شي بس هذا نصيبها
واللحين يالله اشوفها من جابت هالاثنين مو مبينه مشغوله فيهم ماعاد تزور وتوجب مثل قبل وطبعا معذوره بس لازالت في قلبي راعية الواجب والاصول واختي الكبيره اللي الجأ لها

واتمنى تكونين يا شكوتي لله انتي واغلب بنات المنتدى مثلها نلجأ لكم في مشاكلنا تساعدونا وتنورونا اكيد فيكم الحكيمه والفاهمه مو شرط تكون متزوجه حتى نستفيد منها هذي صديقتي كانت اكبر مثال لي ولكم وعندي مثلها كثير مو متزوجات وماشاء الله عقولهم يوزنون بلد





عزيزتي شذا 2
يعني لازم اواسيهم اما ارفع هممهم اكون فيها غلطانه !!
انا ابغي اوصل لهم انهم مو ناقصهم شي وانهم شي كبير ومهم ويقدر يفيد نفسه ويفيد غيره

وبعدين وش يعني متزوجه يعني ماعندي مشاكل !!
والله اني احيانا اكون ميته من البكاء لمشكله مع زوجي ومع هذا مجرد ماطلع من البيت اكتم عليها ومافضفض وفي الشغل وعند صديقاتي اضحك واسولف وانكت بعد وكان ماعندي مشكله في البيت تنتظرني ووالله لو حد هون علي مشكلتي وقالي الدنيا ماتسوى اني اتاثر بقول فعلا ماتسوى هالزعل اهم شي العافيه ومن هالكلام اللي يهدي اما اني اعيش طول الوقت حزينه هذا اللي انا مارضاه
لهالشي انا اعتبرت خواتي مو ناقصهم شي المساله مسالة وقت فقط وحلو الواحده تعيش على امل
والدعوه مطلوبه وبالعكس ضروريه وتاكدوا اي واحده تطلب ندعيلها مانقصر معاها وماراح نبخل من الاجر
وانا معاج مافي اغلى من العافيه


الغاليه شوبارد حبيبتي وانا بعد يالغلا فهمتج زين وادري انج مو ضدي يالغاليه
بس يا عمري انا اقصد توج صغيره ماينقال عنها تاخرت في الزواج

الى اخر كلامج انا معاج ووهذا اللي ابي اوصله لخواتي ان لهم شخصيه وكيان واثر في الاسره والمجتمع حتى لو تاخروا في الزواج فحياتهم ماتنتهي ولاتتوقف لان الزوج تاخر


ريمال

يحليلج يا ريمال ضحكتيني والله
الله يرزقج الزوج الصالح والذريه الصالحه

__________________