حبيبتي ام ريان
الله يخليلك ريان ويرزقك برّه

اول شي ماني حابة مسألة ان اهلك يعرفون هالموضوع ويقرأونه
لان كل النصائح الي بنعطيك اياها بيكونون ع علم بيها وبكل خطوة راح تمشين بها عشان تلاقين حل لمشكلتك
بالتالي راح ياخذون احتايطاتهم
اسمعيني
عمرك 30 سنة وللحين منتي قادرة تتخذين قرراراتك المصيرية بنفسك ؟
انا من وصلت العشرين ماسمحت لاحد يتدخل فيني
ينصحون من بعيد وبس
مع ان وضع اهلي زيك اب له شخصية قوية والكبر طيّحه
وامي احتارت كيف بيمشي البيت بعد طيحة ابوي ف صارت عصيبة عنيدة شرسة لدرجة انها ممكن تضرنا وهي ببالها ان هالشدة بتحمينا
***
خوفك الي جواتك ارميه برا
انتي حرمة بالغه عاقله مالحد قرار عليك ومحد له دخل بحياتك
خليك قوية بمواجهة امك
كل حواراتك معاها تدل انك قليلة حيلة
ما اقول لك اتفرعني عليها !
بس حاوريها وتفاهمي معاها وخلي حجتك قوية

ي امي زوجي نذل خاين مافيه من شيم الرجال الشي الي يخليني اصبر عليه
وانا ماني بموقف استشيرك فيه او اخذ منك القرار
انا بس اعطي تبرير لطلبي للطلاق مع اني مش ملزومة

مسألة اكمل معاه مابتصير
مسألة الفصل من الوظيفة
ف ضغطكم علي هذا تراه يخليني اتمسك فيها اكثر
انتو بتصرفاتكم خليتوني اتيقن ان انتو اول من يتخلا عني مالي غير وظيفتي
ولدي ماتبينه عندي ؟
ف ابوه الي يقرر ياخذه او لا وبعد السن القانوني
واعتقد انك ام وتعرفين غلا الضنا
لاتحرميني ضناي عشان ماربي يبليك بأحد من عيالك

واذا تطلقت بعيش معكم غصب عنكم
لي بالبيت مثل مالاخواني ولك

خليك حازمة
هذا حقك انتي ماغلطتي بشي

ومارسي حياتك بالبيت مثل لما كنتي بنت
كولي ونامي واعزمي الي تبين وسوي كل الي ببالك
ونهاية الشهر ساعديهم بمصاريف المويا او المونة او اي شي كأي بنت موظفة ببيت اهلها

*************
وقفوا اهلك معك وتم الطلاق ! الحمدلله
تخلّوا عنك او زوجك ماطاع او ماطل او اي شي
روحي من غير محد يدري اتصلي ع خالك فهميه الموضوع من الى
وقولي خليتك اخر الحلول لان امي ماتبي الموضوع يكبر ويوصلكم
احلفلك ان امك ماراح تسويلك شي
وش بتسوي يعني ؟؟؟
تحرقك ؟
تذبحك؟
شممكن تسوي وش الي انتي خايفه منه؟
هذي ام ي بنتي ام
واللهي ان قلبها يتقطع عليك وعلى ولدك
بس تستخدم سياسة الاولين انها ادرى بمصلحتك وشدتها معك بتصلح وضعك
اذا شفتي ان حقك مابيجيك الا عن طريق خوالك ف الجئي لهم
وبعدين تفاهمي مع امك
هي بس تهددك لانها عارفه انك خوافه

بعدين اسمحيلي بسئلك
اجل لو زوجك راميك لاهلك بسبب رفالتك ولا انك خاينة او او او مع احترامي لشخصك
شكانو بيسوون ؟
وانتي مظلومه هذي تصرفاتهم معك اجل لو انك غلطانه ؟؟؟!!
اهلك يتشرفون بهالنسيب !
عادي الناس يدرون ان بنتهم مهانه وذليله واهلها ما اخذوا حقها ؟
مازال امك تخاف من كلام الناس من باب اولى تخاف يتكلمون عن سكوتهم عن حقك
بكل الحالتين الناس بتتكلم
عالاقل تتكلكم وانتي حرة ومرتاحة وخالصة من عيشة الهم
^
قولي هالكلام لامك
افهمي منها ليش تسوي كذا

ولا تخافين
الدنيا دوارة
بنت خالته تزوجت ويمكن ربي يسلط عليها الي تلعب بزوجها
وزوجك بيلاقيها بوجهه لا تخافين
اصلا مسألة انه قاعد يخرب بيته بيده بدون وجه حق هذي بحد ذاتها عقوبة له
وامه بتنذل وتنهان مثل ماذلتك وترا الجزاء من جنس العمل

لا تهممين ع نفسك
ولا تخلين مشاكلك تلعب بنفسيتك واعصابك تجيبين لك المرض ع اول عمرك

ردّيهم لربي وهو بياخذ حقك من الكل
اما اهلك انتي خذي حقك منهم بنفسك
حتى بشرع الله مايجوز لك تقبلين ع نفسك الذل والضيم وانتي تقدرين تردينه عن نفسك وعن ولدك
اذا مو عشان نفسك عشان البيبي المسكين الي بذمتك
محتاجلك تكونين قوية تدافعين عن نفسك وعنه


سامحيني اندفعت بالحكي بس ضعفك وسلبيتك قهروني ):

سيهديني سيشفيني سيمسح ما على قلبي ومن همّي يُنجيني وينزع ما اعترى صدري وعن ضيقي يسليني
فيا ربي ويا حسبي ويا سندي ويا ثقتي ، اكفيني .
http://cutt.us/pcav