أخواني وأخواتي
أولا:أحب أحييكم وأتمنى إنكم تتقبلوني أخ جديد لكم في المنتدى عسى أن الله يوفقني وإياكم لما فيه خير وصلاح لنا
ثانيا:سبب لجوئي للمنتدى أني بأمر بظروف صعبة نفسيا مع زوجتي وتعبت من كثر ما أفكر في حلول وفي كل مرة حلي يفشل معها ومو عارف الغلط فين هو في أو فيها فخلوني أحكيكم القصة يمكن احد يفيدني أو أفيد احد بأنه يتعلم من الأخطاء إلي وقعنا فيها
واليكم الأحداث في تسلسلها:
أنا ومرتي أتزوجنا بعض عن قصة حب مثيرة يمكن كانت حديث اغلب الشخصيات المحيطة بنا دخلنا في أفلام وحكاوي مالها أول من أخر يمكن لو جلست احكيها راح يفتكرني البعض إني أبالغ المهم أتزوجنا وكنا مبسوطين انو حبنا أترجم أو انتهى النهاية السعيدة إلي نبغاها بس إلي حصل كان العكس كان بداية أحداث لقصة غريبة عجيبة أنا للآن مو فاهم كيف صارت وايش أسبابها.
طبعا بعد الزواج أتغيرت مفاهيم كثيرة وظهرت الوجوه الحقيقية بس كنا ماشيين لأنه أساسنا كان قوي (حب ماله مثيل) جانا أول طفل وجانا ثاني طفل والحمد الله حياتنا كانت ماشية فيها مشاكل ومناقرات عادي ملح الحياة إلى سنتين راحت وهنا تبدأ إحداث القصة.
مرتي من النوع العصبي يعني لو جا الهوا عليها ممكن تعصب أو من النوع إلي يطرطع على أي شي وأنا كمان عصبي عشان لا اظلمها بس اقدر أتمالك شوية المهم خليني أحكيكم ايش صار.. كانت حياتنا ماشية حلوة أمورنا ماشية تمام فجأة مرينا بمرحلة اسمها القاع وترجمتها كالأتي كانت حياتنا المادية مريحة الحمد الله عندي تجارتي الخاصة وشغال في وظيفة ممتازة براتب كويس بس لما صارت مشكلة الأسهم خسرت كثير وبدأت أمر بمرحلة حرجة قفلت تجارتي بسبب الخسارة..خسرت سيارتي.. يعني تقدروا تقول رجعت للصفر.. وهنا بدأت المشاكل مرتي كانت حامل ومع كل الأوضاع الحاصلة زادت سوء معاملتها ومشكلتها الرئيسية أنها ماتعترف بأي خطأ وعندها تكبر مو طبيعي لدرجة انك تمسك عليها الخطأ ويكون لابسها مية في المية لكن تصر على كبرها في الموضوع مع كل دي الأحداث وازتني نفسي إني أدور راحتي برا البيت .. وفعلا أتعرفت على وحدة عن طريق النت هدفي كان مجرد أني اضحك وأضيع الضغوط إلي علي مع العلم أني كنت أحس بالذنب لأني اعشق شي اسمه مرتي بس كل ما اقرب منها عشان احتاج حنانها كانت تزجرني أو يكون بينا مشكلة .. المهم ولدت مرتي بالسلامة وجابتلي ثالث طفل.. ولأنو علاقتي بالبنت كانت عابرة وما كانت أكثر من تلفونات وكلام فاضي فانتهت.. بس لأن الله حب يعاقبني على فعلتي عرفت مراتي وهنا بدأ فلم جديد طبعا راحت و قلبت الدنيا كلها وخلتني حبل غسيل منشور قدام الله وخلقه.. مافي احد إلا وحكته وهاذي عادتها كانت تحب تحكي كل التفاصيل إلي بينا لصحباتها حتى أدق التفاصيل
المهم بما إني الغلطان حاولت إني أصالحها بكل الطرق ووسط طوب الأرض وغير السلام على الروس وحب الخشوم وغير وغير .. الين مارضيت بس ايش بذل وصارت كل فترة والثانية تفتح الموضوع وتبدأ ترمي كلام وطبعا زادت المشاكل الين ماوصلت قرب المليون وفي احد الأيام العاصفة أتضاربنا بسبب مشكلة كبيرة صارت بينها وبين أختي وزادتها أنها ماسابتني في حالي وهنا خلاص قفلت معاي جلست نتضارب الين ماقررت أني اسيب البيت وفعلا نفذت قراري ودخلنا في دوامة كبيرة من المشاكل والأفلام .. المهم زادت بينا الرقعة وطبعا هي تكبرها زاد راحت بيت أهلها وأنا سكنت في بيت لحالي.. بينا اتصالات أحيانا بسبب مانكمل يومين إلى ومتضاربين تقريبا لنا سنة منفصلين بس للآن ما أتطلقنا .. المشكلة ايش إني أحبها وأموت فيها بس تكبرها متعبني وغير كده عنيدة عناد مامر على احد وطبعا غير موضوع الأولاد يعني عدة أمور مختلفة.. على العموم أنا راح افتح باب المناقشة للي فعلا يبغى يطرح رأيه في المشكلة وخلي محور الكلام حولين 3 نقاط:
- ايش تتوقع السبب الرئيسي للمشكلة؟
- هل تتوقع الحسد والعين لهم دور في الموضوع؟؟
- تتوقع من الغلطان أنا أو هي ؟؟
خلي هذا محور النقاش إلي حب يتواصل معاي هنا أهلا وسهلا


...........................



وأنا مستعد لآي سؤال


تحياتى


*الاشراف / يمنع اخى الكريم دعوة الاعضاء لتتعارف خارج نطاق المنتدى

ولهذا خاصية الرسائل الخاصة غير مفعلة بالمنتدى

أخي الكريم

بالنسبة لي ، أي مشكلة أواجهها مع زوجي أرجعها إلى البعد عن الله

فأرجو منك إنت و زوجتك النظر للأمر هذا و صدقني ، بتنحل أغلب مشاكلكم

و أنصحك بكتاب رجال من المريخ و نساء من الزهرة ، جدا رائع و بيحل لك 80 بالمية من مشاكلكم الزوجية

و الله يوفقك إنت و زوجتك

اختي روح الطير
شكرا على مرورك وكلامك
تحياتي

الله يعينكم هذا اللي اقدر اقوله

اللي ينبني على خطأ صار هو كله على بعضه خطأ.
هذا أولا ,, ثانيا: أنت ما راعيت نفسية زوجتك وهي حامل طبيعي تصير نفسها بخشمها ,,
لا وبعد رايح تدور بنات وتتكلم معاهم,,
يكون في علمك ,, حتى وإن أعتذرت لزوجتك وسامحتك ترى هي من داخلها مو مسامحتك لأنك جرحتها أولا وماراح تثق فيك ثانيا,,
الحل:
انك ترجع تحاسب نفسك وتشوف حالك مع ربك إذا كان في شي غلط بحياتك تتركة وتتوب منه ,,
أحرص على الصلاة في المسجد ومع الجماعة,,
أكثر من الإستغفااااااار.

والله انا اشوف انه انت سبب المشكلة لانك مدلعها بزيادة وماشافت منك الحزم

ايش يعني عصبية ، عصبية على نفسها مو على زوجها اما انها ترفع صوتها وتعصب وتصير اخلاقها تحت الصفر وبعد كده تقول عصبية ماصارت

الرجل يتزوج عشان يرتاح مو عشان يلاقي وحدة طول وقتها تعصب وتتنفخ على اتفه الاسباب

المفروض انك تكون حازم معاها واذا عصبت تحاول تهديها واذا ما هدأت تسيب لها المكان وتمشي وتزعل منها ، وهي لما تشوفك جاد وحازم في دا الموضوع وتعرف انه عصبيتها وراها زعل زوجها صدقني حتراجع حساباتها وتحسبها مليون مرة قبل لا تعصب

واما حكاية التكبر فانا اتحدى تلاقي وحدة متكبرة اكثر مني مستحيل اعترف بغلطي ومستحيل اعتذر لاحد حتى لو كنت مليون في المية غلطانة

ودحين تعال شوفني والله ابوس راسه ورجوله كمان اذا كنت غلطانة وما انام الا لما يقولي راضي عنك دنيا وآخرة

معليش من غير زعل الرك على الرجال او زي مايقولوا الخيل من خيالها

زوجي عرف يعلمني كيف اعتذر وكيف اعترف بغلطي من غير ما احس باهانة او جرح لكرامتي وكبريائي

اما حكاية انك تحتاج حنانها وماتلاقي منها الا الزجر فاقولك انتو اساس علاقتكم حب قوي وعميق معناها الصراحة بينكم موجودة ليش لما كنت تحتاجها ما تقولها بصراحة يافلانة انا محتاجك ؟ ليش تدور برا ؟ ليش ماتحاول معاها الاول ؟

يا اخي الكريم زوجتك تحكي الناس عن اسراركم ، زوجتك تفضحك قدام الله وخلقه ، زوجتك تعمل وتعمل وتعمل وانت غير راضي عن تصرفاتها ، طيب ليش ماتكون حازم معاها ويكون لك موقف ؟

ليش لما تحكي الناس عن اسراركم ماتزعل منها ؟ ليش تعديها وتمشيها وتشيل في قلبك ؟

اكبر غلط انه احد الزوجين يشيل في قلبه ويتغاضى عن الغلط ويتحمل ويقول معليش عشان خاطر الطرف الثاني لانه مع الوقت ماراح يقدر يتحمل أكثر وحينفجر

كان لازم انك تصارحها اول باول عن اي شي يضايقك وفي ساعتها تحلوا المشكلة مو تسيبوها تتراكم تتراكم بعدين تنفجروا

الله يصلح مابينكم يارب ويسعدكم مع بعض

اختي الفاضلة احلاهم واتحداهم
شكرا

عفوا ..

يرجى مراعاة حدود التخاطب بين الجنسين ..

وفقكم الله ..

اخت الفاضلة تالينا
مشكلتي اني احبها وضعيف قدامها بمعنى اني مش قادر اخلي عقلي يتحكم في قلبي .. يمكن تقولي انه كلامي كلام مراهقين مع اني عقلاني في كل حياتي وفي اموري الثانية.
شكرا على رايك البناء

حاشا لله كلامك مو كلام مراهقين بالعكس

بس انا اقولك لاتخلي الحب يعمي بصيرتك

انت كرجل مختلف في تكوينك عن النساء

وانا اقولك حاجة وبصراحة بيني وبينك لايسمعونا بنات حواء

الحرمة تبغى راجل قوي يحكمها يقولها لا ، يسيطر عليها عشان تحس انه لها سند في الحياة ترجع له اذا احتاجت منه الاستشارة تلاقي عقل كبير ومتفهم ، اذا احتاجت العاطفة تلاقي منه الحب والحنان

اما الرجل الغير حازم واللي يلبي كل طلباتها ويدلعها ومايقولها لا صدقني تركبه ، ماتحسب له حساب ولا تشوفه رجل قوي وفارس أحلامها ، تركبه وتسيطر عليه وتتحكم فيه لانها شافته ضعيف وسهل الانقياد

عشان تكون فارس أحلام حبيبتك لازم تقوي قلبك شوية ، واذا كنت فعلاً تحبها فالحبيب يسوي أي شي عشان حبيبه صح ولا لا ؟ خلاص قوي قلبك وكون زي ماحبيبتك تتمنى تشوفك ..

الله يسعدكم

اخت تالينا

يعطيك الف الف الف الف عااااااااافية على هالرد الرااائع

والله فاااااااادني كثيييييييير


انا صراحة ما تزوجت ... لكن ممكن اكون من النوع الي طييييب مرة مع زوجته ووو .. لووول


فصراحة ردك هذا فادني كثييير وخلاني انتبه لنقطة جدا مهمة


يعطيك العافية




وبالنسبة لاخوي صاحب الموضوع


اول شي انصحك انك تحاول تخفف تعلق بزوجتكـ .. خصوصا الفترة الحالية

لان حبك الزايد لها حاليا بيشكل ضغط عليك

او على الاقل تحكم بمشاعرك تجاهها

ثانيا ...

اتوقع الوقت كفيلل لاني يرجع زوجتكـ ... وبرضو انحك كما نصح الاخوان والاخوات وذلك بان " تثقل عليها "