السلام عليكم

السادة الأعضاء..أبغى رأيكم في موضوع منكد علي حياتي من أول ما اتزوجت..لحد يومنا..

أنا موظفة و زوجي موظف ..

من أول ما اتزوجت غلطت غلطة عمري..وهي إني ما خليت راتبي مستقل عن راتب زوجي..و دخلت نفسي في دوامة كبيرة ..وهي مصاريف البيت و سداد الفواتير..

المشكلة مهي في المشاركة..ولكن المشكلة في إنه خلاص معد صار لي خصوصية في فلوسي..و لا عد صرت اقدر اشتري أي شيء أحبه إلا بحساب ..و نظر و موازنة مع الأمور اللي فرضتها على نفسي..تخيلوا بطاقتي دايما في محفظة زوجي..
كل نهاية شهر على كيفه يصرف الفلوس..لو اتكلمت يجاريني و يطبطب علي علشان ما انكد عليه..

وعلشان ما اظلمه حاول كثير فصل الرواتب ..لكن بسبب طوارئ : ( ولادتي قيصرية في مستشفى خاص ، سبوع للمولود ، سفريات صغيرة داخل الدولة) و بسبب كثرة الأقساط عليه ( قسط الزواج ، اقساط اجهزة يحتاجها في العمل) يتأجل الموضوع..

في مشكلة مررررة قاهرتني ...زوجي بعد الاقساط..و تسديد الفواتير ..كل الفلوس تروح في المطاعم..لو ما معه غير 100 و عارف إنه بعدها يشحت ..ما يهمه يصرفها في مطعم..المهم يكرم كرشه..

و اللي يقصم ظهر البعير..يمووت على السلف ( من أمه ، اخوه، اصحابه....المطاعم )
فيه شيء يسحر الناس و يخليهم يسلفوه بدون مقاومة..

يمووت على شيء اسمه على الحساب ( البقالة ، الخضار ، الصيدلية ، المكوجي ، المطاعم المجاورة لنا)..

تخيلوا ممكن يتسلف بس علشان يكرم بطنه..و ممكن كل اللوازم ( ملابس ، نواقص البيت...إلخ) تتأجل بس علشان يبعزق على الأكل..

أنا مررة تعبانة ..أحس إنه حيجيني الضغط و السكر بسببه..

أحس دايما بعدم الأمان المادي معه..مع إني موظفة..

أحس دايما إنه عمري ما راح يصير لي بيت ملك أو مصدر رزق بعد تقاعدي و سنوات الكرف ..و لا راح اقدر ءأمن مستقبل أولادي من بعدي.. حتى الإجازات ما اقدر اتهنى و أسافر ولو سفرات داخل البلد أو حتى أغير جو..أو أخذ لي دورة تسليني..


حسبي الله و نعم الوكيل..