السلام عليكم ورحمة الله

سأطرح مشكلتي آملة إني أجد من مر بيوم من الأيام بمثلها وعرف يتعامل معها، لأني على مدى سنة أعترف إني فشلت في التعايش معها ..
أنا مطلقة - برغبتي - منذ أربع سنوات بعد زواج قصير نتج عنه طفل ..
بعد الطلاق رجعت لحياتي الطبيعية وماتغير علي شي ولا أثر فيني طلاقي أبداً الحمدلله ..
كنت ومازلت الحمدلله عايشة العيشة الي تتمناها أي بنت ولا عمري حسيت إنه شي ناقص علي ..
بس من فترة سنة - بعد زواج أقرب صديقاتي - تغير كل شي .. صرت أحس بوحدة فظيعة .. صرت أتمنى أتزوج .. أبي شخص أشاركه حياتي بكل تفاصيلها ..
انتبهت لقيت إنه على مدى هالأربع سنوات كلها ما تقدم لي إنسان ينقبل ! ماتقدم إلا إما كبير بالعمر - أكبر من أبوي - أو مطلقين بأطفال ما يقلون عن 3 أو طبعاً معددين ..
أنا الحمدلله واثقة من نفسي وأعرف إنه مافيني عيب - في نظر مجتمعي - إلا إني مطلقة ومعي طفل ..
تقبل هالحقيقة هو أساس مشكلتي ..
ليه أنا بهالمجتمع لي فرصة وحدة في الزواج بزوج لائق؟ إن نجحت الحمدلله وإن مانحجت حُكم علي إني أجلس ببيت أهلي للأبد أو أقدم تنازلات كبيرة عشان أتزوج !!
أنا إنسانة مو حالمة أبداً ولا تشرطت أول عشان أتشرط الحين !! كل الي أبيه رجل حاله من حالي مطلق بطفل !!
هل أنا أطلب كثير؟
بعدما فتحت عيني على هالقضية لقيت إن المتعارف عليه بمجتمعنا إن المطلقين يدورون بنات ماتزوجوا والمعددين إن كان فيهم خير أخذوا بكر لكن كبيرة ..
وإذا جاء مطلق بياخذ مطلقة جوه ربعه ليه وش ناقصك ياخي ؟؟؟
والمطلقة إذا تقدم لها واحد معه بقشة بزران ولا عياله كبرها ورفضته قالوا وش هالبطرانة ؟!

هذا الشي مؤذي نفسياً بطريقة مايحس فيها إلا الي عايشها ..
كل عمري أقرأ عن قصص المطلقات وكيف المجتمع يظلمهم ولا توقعت إني بأحس يوم بهالظلم لأني من عائلة راقية مثقفة مافيه أحد يوم سمعني كلمة تجرح ..
لكن الآن عرفت قصدهم ..

إذا شفت طليقي وغيره يطقون بيوت الناس ويتنقون من البنات الي يبونه وأنا في بيتي مالي إلا إني أنتظر سنة ورى سنة وأحلى سنوات عمري قاعدة تروح عشان أخطاء ماكان لي يد فيها ..
مجتمعي يحطني قدام ثلاث خيارات:
- يا إما إني أصبر على حياة زوجية بائسة
- يا إما إني أنطق ببيت أهلي كل عمري
- يا إما أني أقبل زوج بمواصفات لا تبلغ الحد الأدنى مما أستحق

بينما الرجل:
- تزوج
- ما جاز لك طلق
- ارجع تزوج
أهم شي عش حياتك بالطريقة الي تحبها


أنا مؤمنة إن هذا رزق ومتى ما كتبه ربي بيجيني ..
لكني شعور الوحدة صعب مرة ..
أحس بفراغ وجداني كبير جداً في حياتي ..
كيف أتعامل مع هالمشاعر؟
كيف أوطن نفسي على إمكانية إني قد أعيش عزباء طول عمري؟
أتمنى أصل لمرحلة الرضا والاستقرار النفسي لكن مو عارفة كيف ..