السلام عليكم
المشكلة الي راح اكتبها لكم هي مشكلة اعز صديقاتي و ياليتكم تخدموني علشان اقدر اخدمها و ياليتكم تبذلون كل جهدكم علشان بإذن الله ما نخلي بيتها ينهد و مشكلتها كالاتي.
صديقتي انخطبت لولد عمها و طبعا تمت الموافقه لان الولد ما عليه كلام البنت ما ارتاحت لولد عمها من يوم الملكه لان الاخ من اول يوم جلس معها و هو يقول لها اهلي و اهلي وا مي و خواتي لانه متعقد من زوجة اخوه الاكبر منه لان علاقتها كانت مش و لا بد مع اهله . و تقول انا خايفه منه احس انه يسمع لنصايح خواته و اي كلام يقولون له يوصله لها و كانت تقول خلينا ننفصل من اولها و كنا نقول لها لا الوضع راح يتغير بعد الزواج بس هو الحين يبغى يفرض رجولته و بعدين راح يلين الحاصل تم الزواج و بدأت المشاكل على اسباب تافهه و كانت كل شوي تروح بيت اهلها لمن نبغى نعرف الاسباب هيه تقول شي و اهل زوجها يقولوا شي ثاني. و الحمدلله حملت و صرنا نقول لها ان شاء الله اذا جاء البيبي راح تتغير الظروف و جاها ولد و بعد ما خلصت نفستها عند اهلها رجعت على بيت اهل زوجها ( يعني بيتها ) تشاكلت هيه و اياه على هديتها بمناسبة ولادتها و راحت بيت اهلها و هو بسلامته ما عبرها زي كل مره و صار كل يومين يرسل امه او وحده من خواته تاخذ الولد ساعتين و يرجعه لها و هو و لا ساإل فيها و بعدين توسطت وحده من جماعتها و رجعتها لبيتها و الرجال دخل غرفة نومه و تفاجأ بوجودها و مو عارف ايش يقول و هي الله يهدينا و اياها تسرعت و قالت اذا ما تبغاني رجعني بيت اهلي قال لها الي جابك يوديك و رجعن بيت اهلها و الحين تقريبا لها سنة في بيت اهلها و هو و لا على باله و قبل فتره تدخلت وحده الله يجزيها خير و نصحتها انها تتنازل و تكلمه على التلفون تعتذر له علشان ما تهدم بيتها طبعا اتصلت عليه المرأه هذي و قالت له خذ كلمة زوجتك ام ولدك تبغى تعتذر منك و قال لها ما يحتاج لاني في السنة الي هيه بعيده عني فيها مرتاح و عايش احسن عيشه و انا خطبت عند ناس و بيردوا لي خبر بعد اسبوعين و مستحيل اتراجع عن كلمتي قدام الناس و قالت له خذ زوجتك و كلمته و اعتذرت منه و قال لها اهم شي انتبهي على ابنك و ابوك و امك و مع السلامه و قفل الخط طبعا المرأة هذي نصحت صديقتي انها تروح لام زوجها و خواته و تعتذر منهم و تطلب منهم انهم يحاولون في ولدهم و يرجعها بس هي شوي متردده انها تكون فيها اهانه لكرامتها او انها تكون خطوة ضدها انتم ايش رايكم كيف تتصرف بيتها راح ينخرب و اي مرأة مستعده تسوي اي شي و لا بيتها ينهد و بعد عندها ولد و لا تبغاه يتشتت بين ابوه و امه ياليت كل واحد فيكم يعطيني حل .