مشكلتي مع خطيبي وأريد رايكم
السلام عليكم ورحمة الله
أول شي انا معقود علي من نص سنه ومابيني وبين زوجي مكالمات لأنه هو مايتصل ولا يسأل وماشفته من ثلاث شهور ونص!!
المهم انا بحاول أختصر المشكله على شكل نقاط:
أولا: هو مايسأل عني بالمره حتى أهله يطلبوا منه يتصل علي وهو مايتصل والعيدين اللي مرزا ماعايدني؟! <<< انا دريت بعدين إنه هذا طبعهم هو وإخوانه مايسألوا عن حد ومامتربين على أبسط الذوقيات اللي الكل يعرفها لأن أمهم جابتهم فوق بعض (13 ولد وخمس بنات) قولوا ماشاء الله بس ماكانت تهتم بتربيتهم كله على الخدامه (فرق سنه بين كل واحد) حتى ماتحاول تقرب بين عيالها كل واحد في حاله ودور أبوهم غاااايب يعني هو موجود ومو موجود تارك عياله يدبروا نفسهم وأغلبهم (شباب وبنات) مامكملين دراستهم ومنهم زوجي (ماكمل إبتدائيه وانا عندي شهادة من كليات القمه!!!!)
ثانيا: ولا وحده من خواته ترمسني يعني ماحسيت إني عروس وإني بكون شي يديد عندهم ولا وحده حاولت تقرب مني يعني لا هدايا ولا إتصال. وأمه دايما انا وأمي نتصل عليها ونسأل عنها بس هي ولامره إتصلت علينا!! واللي مخوفني إني بعيش عندهم في البيت.
ثالثا: اللي بيسألني ليش وافقتي عليه بقول لكم عجبتني بساطه (هو بدوي وراعي إبل) وأهم شي يصلي صلاته في المسجد <<< ولا تستغربوا هذي من النوادر يعني انا كل اللي تقدموا لي قبل مايصلوا بالمسجد إلا بالمناسبات وبالنسبه لزوجي انا توسمت فيه الخير ورغم كل المشاكل والفروق اللي بينا أحس إنه طيب وقليل خبره وهو صغير 20 سنه بس يريد يعرس ويستقر وأعرف إنه الزواج مو كله شهد وإنه صبر وصبر وفي الأول والأخير أقول لكم النصيب سبحان الله.
رابعا: بعد العقد عرفت عنه إنه مرات يدوخ سجاره, وهالمرات لمن يكون مع أبوه والرجال الكبار يعني عاده ماخذه منهم بس لمن يسير الشغل مايدوخ لمدة أسبوع وأسبوعين وعندي أمل أخلصه من هالعاده والحمد لله ابوه الحين مايدخن. بس قبل الزواج سألنا عنه والكل قال مايدوخ حتى أمه قالت لأمي مايدوخ (كذبت علينا) وبعد العقد قالت لأ يدوخ هو وأربع من خوانه. هنى حسيتي إني إنخدعت لأن مثل هالشي مايتخبى.
خامسا: واللي مزعجني أكثر دايما ينكث بوعوده ويتكلم ووااااااااايد ولا ينفذ شي!!! يعني يقول بزوركم في اليوم الفلاني ولا يحضر بجيب وبسوي ولا يلتزم زين ليش تتكلم وإنت مو قد الكلمه. أبوي تعب معاه وأخوي مل منه ونحسه بروحه ماحد راضي يتفاهم معاه من أهله كل ماجينا نكلم أحد قالوا عندكم إياه تفاهموا معاه!! وأهلي مو فاضيين لمشاكل الصغار هذي بعد عندهم بنت ثانيه بتعرس قريب والثالثه إنخطبت في العيد هذا وكلهن مهورهن أكثر عني.
الحين أحس إن أغلب مشاكلنا إنا مانكلم بعض في التليفون لأن يوم يزورنا مايجي لوحده أغلب الوقت معاه حد عشان جي أسلم وأطلع. وللحين ماتعودنا على بعض وهو دايما يدخل أطراف ثانيه في أي موضوع.
والحين عرسنا قرب يعني في شهر أو شهرين (كان المفروض بعد أسبوع بس وين اللي يلتزم ويكون قد كلمته) غاب فتره طويييييييله لا إتصال ولا سؤال ولا حتى عيدكم مبارك والحين رجع وجايب معاه واحد (رجال كبير في السن وهو اللي خذ موافقتي قبل العقد) وكلفه يتكلم عنه و يقول لأبوي إنه مايقدر يدفع أكثر عن 20000 لليلة العرس وهذا المبلغ مايكفي غير وليمة عشاء (على حد قوله) يعني إختصر كل شي في العرس بيعشي الجيران وياخذ حرمته وبسسسسسسسس!!!!
أنا أول شي إنقهرت لأنه مو هذا إتفاق أهلي مع أهله ولأني أول فرحه لهلي يريدوا يفرحوا فيني (وعلى فكره انا ماخذه من أهلي 13000 عشان أخلص جهازي لأن الفلوس اللي خذتها من عنده ماكفت بس نحن نعرف إنه بأول الطريق وماثقلنا عليه التزمنا بكل كلمه قلناها من البدايه)
وطبعا هو ماعنده للعرس الحين لأنه شرا سياره ب 89 ألف!!!! يعني اللي حطه ثمن للسياره ضعف اللي بيحطه للعرس (40000) والله هذا هو الإستهتار بعينه ماعنده لزوجته وعنه يخسر على حديد ؟!!
انا حركته هذي واااااااايد أثرت في نفسيتي لأني حسيتي إنه مرخص فيني لأن كل وحده تحلم بفستان وزفه وكوشه وتصوير وألبوم وفرح <<< شو اللي ممكن يعوض هذا كله؟! وهو ولله الحمد راتبه 10000 في الشهر يعني مايكفي حركته من البدايه وأهماله
انا أخر شي أتوقع إن الفلوس تسوي هذا كله بينا الله يسامحه.
طبعا أهلي سكتوا وماردوا عليه للحين يتريوا ردي موافقه ولا لأ بس الللي أزم الموضوع زياده كلمت أمه لأبوي ولأمي قالت هذا اللي عندنا ولو ماموافقين ترى بنتكم عندكم وولدنا عندنا!!!
حرام أمي عصبت بس ماتكلمت ولا ردت عليها خلت الكلام لأبوي وبعدين ماحد راضي يدخل من أهله ولمن تدخلت أمه خربت ليتها ماتكلمت حتىأخوه اللي أكبر عنه يقول هو مامحترم أهل زوجته كيف أساعده؟
المهم انا طولت عليكم بس علشان أحطكم في الصوره وتساعدوني أحصل حل لأني أحس عمري ضايعه ومأقدر أرتب أفكاري وأموري كيف أحل مشاكلي معاه انا ماحس براحه أبد وماأتخيل إني صدق زوجة هالإنسان لأني وبكل بساطه ماأعرفه غير من هالتصرفات اللي ذكرته لكم وهي ماطمن أبد
طبعا الحلول اللي جت في راسي أول شي فكرة بالطلاق وإن كل واحد في حاله على قولة أمه
بس فيه حل ثاني وانا أميل له أكثر بس يباله جرأه وحزم من من؟ مني انا أمة الله!!!
وهو وهذا اللي أبا رايكم فيه:
إني أتصل عليه يعني أبادر انا ونحاول نتفق ونحل المشاكل اللي بينا بدون تدخل أي حد. شو رايكم؟ والعشرين اللي هو يشوفها ماتكفي غير عشا انا أقدر أخلها تكفي عشا وكوشه وزفه وتصوير وألبوم <<<< عندي معارف بيساعوني غير أهلي الله يخليهم لي
بس تتوقعون هالحركه حلوه يعني أكلمه وأحاول أساعده رغم إن الحركه اللي سواها واايد أثرت علي وحسيت إنه مايستاهل أساعده بس جي على الأقل مشاكلنا أحس بنحتويها ولو على الفلوس مو مشكله عندي وعرسي بإذن الله بيكون من أحسن الأعراس.
والله إني محتاره أخاف هذا يؤثر علينا بعدين (يعني يعتمد علي في كل شي) انا إن شاء الله بستلم وظيفتي بعد خمس أسابيع براتب ضعف راتبه!!!!
الله يخليكم اللي عنده رد ممكن يساعدني يكتبه والشي اللي مو مفهموم لكم انا بوضحه وأسفه إني طولت عليكم وكتبت بالعاميه.
08-01-2007, 04:23 PM
صاحبة القلب الحنون
لا اله الا انت سبحانك انى كنت من الظالمين
ضوابط المشاركة
العرض العادي
