تناقشنا قبل 10 ايام بخصوص المشكلة الأخيرة واعتذرت وتقول انا اسفه لو اني ماسويت شي ومفروض انت اللي تعتذر بعد الكفوف اللي على الصبح وانا ماسويت شي ( كف واحد مع انه مايحمل من اسم كف الا الاسم بس لكن مو متعودة فتسميه كف وانا ايضا اسميه كف لأنه أول مره وبدون مبالغة لو ضربته لطفل ما يأثر فيه ولكن لعلمي بأن المطلوب التأثير النفسي وليس الحاق الأذى البدني ... عموماً صار نقاش بعد الاعتذار ونبعد نقاش قالت اللي بيني وبينك هالباب تقصد الفاصل بين قسم الرجال والنساء يعني نتطلق وابقى انا في قسم الرجال لمراعاة شؤون الابناء وتلبية احتياجاتهم ومنامي واكلي وجلستي فيه ولا أتعداه لداخل البيت وهي بداخل البيت مع الابناء تتولى امورهم وانه كذا أفضل شي بنظرها والشي هذا انها لما فكرت فيه مو عشان نفسها عشان الاولاد اللي لولاهم لما جلست دقيقة وحدها على قولتها لكن مصلحة الأولاد وانهم يعيشون بين والديهم حتى لو كانوا مطلقين بتسوي كذا كل واحد له قسمه اللي مايتعداه وبهالحال تكون المشاكل انتهت وماتضررت مصلحة الأبناء !!!! رديت عليها قلت اسمعي الطلاق لا شك انه حل ولو ماكان كذا ما حلله الله والزواج الثاني حل ولو ماهو حل ماحلله الله انتي تشوفي ان مافيه حل وافضل حل الا الطلاق شي راجع لك والكلام هذا ماهي أول مره أسمعه وحياتي انعفست من يوم كنتي بالأربعين في بنتنا الكبيرة وشفت مغثتك من ذيك السنه للآن 15 سنه راحت صبر راحت هم راحت تعب راحت قلق راحت توتر يوم مرتاح وشهر منعفس حتى حقوقي الزوجيه الله العالم فيها ... وأول اذا سمعت كلامك اللي مثل هذا لما تقوليه كنت اقعد اتكلم واراضي واتحبب ومعليش هذي الحياة والكل يعاني والحياة تبي صبر وانا لو مكانك والوضع معكوس تصدقين كنت بانبسط واحد اغثه ويجي يتسامح ويقعد يسولف علي له ساعتين ثلاث واصير شغله الشاغل ودام اني بانبسط وش اللي يمنعني لا اكررها كل وقت ... قالت ايه متى كان الكلام هذا من سنين وبعدها تغيرت هذاك أول يوم انك حليل ... قلت انسي انه بيرجع الحليل هذاك لأنك لا قدرتيه ولا ريحتيه ولا اهتميتي فيه قد ماتشوفي البيوت مليانه بنات الا انه ولا همك ... لكن اسمعي يا بنت الحلال الأمر سهل انتي تقولي حدي الباب والشي هذا عشان الاولاد وراحتك بالشي هذا وباحترم رغبتك انتي ماطلبتي الا حل حلال لكن بالمقابل بتحرميني الحل الحلال مايصير حياتك وحددتيها مثل ماتبين مالك اي حق تحددي لي حياتي ... انا ما اقعد بالمجلس ( عزوبي متزوج والان عزوبي مطلق ) البيت بما فيه المجلس لكم بس انتبهي للعيال وانا ان شاء الله بيوفقني ببنت الحلال اللي تعوضني ما مضى واعيش حياتي من جديد معاها قالت ابد تزوج ... طبعاً كذب وانا متأكد مليون في الميه لو تسمع اني خطبت خطبة ممكن والله تموت وواثق من الشي هذا ... لكن قلت اسمعي وافهمي انا لا تتوقعي قصدي من الزواج عقاب والا انتقام ... لا بس كنت ابحث عن شي مالقيته معك وسويت اللي علي ونبهتك ولكن للأسف مانفع وصبرت 15 سنه وبرضه مانفع يعني لا تلوميني بالشي هذا اذا صار ولومي نفسك ودام انك تقولي حدي الباب يعني ماعندك مشكله تزوجت وحده والا ثنتين ... وسكتنا على هالكلام .

واضح انك تحب زوجتك اكثر من حبها لك وهذا ليس بعيب ولكن الغريب كثرت عيوبها في عيونك وصبرك عليهااا

ولا تستغرب ان فيه حريم يرضون ازواجهم ينزوجون عليهم خصوصا اذا كان فكرها مثل نساء زمااااااااان

فيه سؤال من زمان نفسي اسئله ممكن تعدد حسنات زوجتك وصفاتها الحميده

الفكر انه فكر نساء زمان هي تقول هذا وتفتخر فيه ... ولكن الواقع لا زمان ولا حديث ... فنساء زمان أراهن في أمي ... وكيف تصرفاتها مع أبي رغم أن أميه وكبيره في السن ... إلا أنها حريصة كل الحرص على أبي فهي في الصباح تستيقظ قبله وتجهز فطوره وقهوته وتنام بالصالة تنتظره يصحى وبعد مايخلص ويطلع تروح تنام ... واذا رجع بالليل قهوته جاهزه وعشاه أيضاً واخرها البارح مريت عليهم قريب وحده بالليل الا الوالدة الله يطول بعمرها بالمطبخ وتسوي قهوه قلت ليش بالوقت هذا قالت ابوك جا قبل شوي وحطيت له عشاه ويقول ماتقهوى غير قهوه الصباح ... وشوي الا وهي داخله بالقهوه ... هذولا حريم قبل بس رومانسيات واشياء زي كذا مايعرفون لها ولا هي مطلوبة منهم ...

الحسنات ....
- ام أولادي
- تذكرت قبل اكثر من 10 سنوات احتجت مبلغ وباعت من ذهبها

الله يوفقك تدري زوجتك راح يعقلها زواجك بس بعد اييييييييييييييييييييييش!!!

سأتكلم بحال لسانها:
اقوم بواجباته والله مايلقى مثلي لكن مايشوف فرشت له عمري فرش ووجع رجليني وايديني من كدتي له وبكره لا مرضت مرض امي يرميني ولا هميته وكثر خيره اذا مارماني بالشارع والا اليا طحت يتزوج والحقوق الزوجية المشايخ اللي انا اسمع لهم وهو ماعمره سمع المشايخ ولا يعرفهم يقولون ( وجعلنا مودة ورحمة ) يعني الزواج المودة والرحمة ماهي الفراش واذا يبي يتزوج بكيفه المثل يقول ماتعرف قديري ياما تجرب غيري رح تزوج علشان تعرف الحريم وشن لكن ترى اذا يبي يتزوج والله أموت والا انجلط والا انجن لكن يا الله كان انه يبي يتزوج يشيل غلاه من قلبي علشان مايهمني !!!!!!!!!!
وبعدين اللي ماهو مريحني روحاته للسوق دايم حتى لو انه يقول ما اروح وحتى لو انه ماطلع البيت او يجي مامعه اغراض من السوق بس اكيد انه يروح ... وبعدين ماهو صريح لأني اسأله ويجاوب جواب ماهو صحيح يعني مثلاً اقول له من عند أهلك يقول فلان اقول له وش عنده يقول مدري ماجلست عندهم قعدت شوي وطلعت لأن عندي شغل كذا كذا رحت سويته ... شفتوا وشلون ماهو صريح لا هو يدري بس مايبي يقول لي كذا دايم اسأله وش عندها امك سافرت يقول عشان عندها موعد يكذب علي مايبي يقول لي ليه هي مسافره واذا قلت انت ماتبي تقول لي لكن انا عارفه يقول انتي سألتي وانا جاوبت باللي اعرفه يعني انا أعرف وش عندها وهو هي امه ويصرفني يقول لي عشان موعدها ... وبالفترة الأخيره تغير علي قلب ... اذا سألته عن شي مايرد علي والا يقول لا عمرك تسأليني يعني معقول كذا اسأله ومايرد علي ليه وش هو شايفني والا وش شايف نفسه علي وليه مايترك التكبر والغرور ولا هو معتبر احد قدامه أنا لو انه يسألني وما أرد عليه وش يبي يقول عني ... واذا قلت له ليه ماترد والا ترد كلمه وبس يقول لي سنين تسأليني واجاوب واذا خلص بس اقول له ماهو صحيح انت تلف وتدور علي ولا تبي تعلمني ... يقول انتي تسأليني عشان تكذبين لي .... وأقول له انت وش عليك مني خلني اقول اللي اقوله وانا ما اكذبك بس اقول انه ماهو صحيح والا انك تبي تضحك علي وبعدين وش عليه مني يجاوب وبس انا اقولها بس كذا ما اكذب له ويوم شفت مافيه فايدة قلت زين هين ليه انت اذا سألتني اجاوبك يقول لي انا اسألك عن شي ما أعرفه واذا عطيتيني جواب صدقته ولا عمري كذبت لك بشي والا اذا خلصتي كلامك قلت لك ماهو معقول والا انتي تلفين وتدورين علي والا ما انتي صريحه ... وبعدين احيان يكون جالس بالبيت ويأذن المسجد يروح يغير ملابسه ويطلع مدري وين يبي يروح اسأله أول مايوقف هاه وين قمت وين تبي وين تبي تروح يقول لي ابروح اصلي واخذ فترة يقول كذا لين جا مره وقال ميزي بيني وبين أولادك انتي ما انتي أمي وانا ماني ولدك وحتى ولدي ماتسألينه كذا هذا جزاي عشاني احبه اكثر من عيالي والا لو ماله قيمة كان والله ما همني جلس والا طلع ... بس هو يحط اسألتي هذي ان فيها شي ... ابيه مايقول لي صوتك ملعلع بالبيت وتلعنين وتشتمين اصلا انا اقول كذا من التعب اللي احس به وهو لو انه يحس بنص تعبي كان طاح يومه كله ... ابيه كل ما قلت ودني للطبيب يوديني ماهو يوديني لطبيب مايفهم واذا قلت هذا ماعنده سالفه ابشوف دكتور غيره واذا قال الثاني مافيك شي يوديني لثالث ما ابيه يقول الحمد لله الاول قال مافيه شي والثاني اكد الكلام واذا قلت له هذولا مايفهمون يسمع كلامي ماهو يقول لا 3 كافي لأني لو ما أحس بشي مارحت واصلاً انا ما أروح الا لما اكون خلاص ... ابيه يحس فيني هذا هو يوم جاه مغص كلوي راح يركض للمستشفى ... وقبل كم يوم مالقى بنادول بالثلاجه وهو راجع من الاستراحه جا وحبوبه معه ...

هذا بلسانها وهو غيض من فيض

نعم اجبرت ووضع لي خيار كنت اعتبره قاسي جداً في ذلك الوقت ولكن لو كان هذا الخيار اليوم لما بنيت سعادة غيري على سعادتي ولن اضحي بمصيري مقابل مصير غيري حتى وان كان اعز الناس ...

لا لا يعرف لا أبي ولا غيره بأنني لست مرتاح ... ولا يعلم اي مخلوق بما بيننا ... الا اخوها كلمته مرتين فقط ويتصور بأنه لا توجد مشاكل سوى المشكلتين اللي كلمته على شانهم و لا يعلم بكل ما اعانيه ...

تذكرت قبل اكثر من 10 سنوات احتجت مبلغ وباعت من ذهبها


بس هذي الحسنات الي قدرت عليها
فكر بعد شوي يمكن تلقى غيرها
للاسف الرجل ما يتذكر الا الي على مزاجه