السلام عليكم ورحمة الله و بركاته ،،،

لي جارة مضيفة طيران

بتسافر طبعا دول اجنبية و عربية وكل مكان

المهم انو هية مثل كل المضيفات بتجيب اشياء حلوة وبتتاجر فيها وبتكسب من وراها

من يوم مسمعت عن المضيفات وهما هيك

طيب حلال عليها والف مبروك ماقلنا اشي

انا احيانا بوصيها على اشياء او هية ان كانت برة وشافت شي حلو بتتصل فية تخبرني

يعني والله اعلم مش لسواد عيوني يمكن بتكسب من ورايا

يعني مفروض اني جارتها وماتعاملني هيك لكن حلال عليها ومش مشكلة راضية تتاجر معي

الله اعلم انا بس بتوقع هيك لانو يعني مابظن انو هية حتعاملني غير شكل بس لاني جارتها

صحيح علاقتي معها جيدة علاقة جيرة يعني

لكن انا بحس من كلامها انها بتحب تربح وهيك

انا استشفيت هالاشي من طريقة كلامها

مثال بتقول انها بتختبر الشغالة وبترمي الها فلوس تحت السرير لتشوف امانتها

ولما تجيبها الها بتعرف انها امينة بقلها حرام اعطيها اياهم

بتقول ليش انا اشتغل واتعب واعطي الشغالة

يعني بس نحكي عن امور النقود والعمل وهيك بحس انو بتعز القرش تبعها وبعز عليها تعبها وانو مابتفرط باي مكسب
انا هيك حسيت

والله اعلم وحتى لو هيك حقها

بس انا الي شاغلني اني احيانا بحس انها بتستغلني

مابدي اظلمها لكن انا خايفة تكون هيك

حتقولو شو الدليل

مثلا مرة وصيتها على شيء تجميلي

كل علمي انو مش هالسعر الكتير يعني 20 او 30 $

احضرت واحد لكن ماركة غير ب75$

احضرتو من فرانكفورت في المانيا(بس عشان لو حد عندو علم بالاسعار هناك اعرف الحقيقة)

المهم انصدمت بس اخدتو لانو جابتو على اسمي يعني مش معقول اقلها بديش اياه

بعدين ماارتحت للموضوع فتشت بالنت وجدت انو سعرو حوالين ال20$ تقريبا

طيب بدها تربح تعطيني اياه ب 40$ يعني الضعف

بس 75 $ !!! اليست مصيبة

لكن احسنت النية وقلت يمكن البلد هناك غالية ويمكن اسعار النت ارخص بالعادة وطنشتها ومشيتها

قبل عدة ايام وصيتها على منتج وعشان ماتضحك علية شفت سعرو عالنت ولاقيتو 15$ من هبلي قلتلها هوة سعرو 15

(قال يعني عشان ماتضحك علية بس كان مفروض مااقلها واشوف بكم حتجيبو)

المهم انها اتصلت من بريطانيا وقالت انها مالاقتو

الله اعلم مالاقتو فعلا ولا عشان لاقت حالها ماحتربح منو اشي

الله اعلم

المهم قالت انو هناك في محل عامل تخفيضات وهيك

وصارت تقلي الاسعار

اسعار جيدةة

انا قلتلها اوكي جيبي كزا وكزا لاتتعدى اسعارو السعر الفلاني والفلاني

عاساس انو ماتغشني

لكن اكتشفت انو هالطريقة مالها فايدة برضو لانو كانت تقلي في كزا بسعر كزا

هية ممكن تقلي هيك و تكون الشغلة ارخص ويعني تكزب بشان السعر
وبتعطيني سعر رخيص وبتقول جواها يعني هالسعر حلو ومابتحلم فيه
كان تكون الشغلة اصلا 5 $ ولكن تقلي 15 $ فالل15 بحد ذاتها قليلة وحقول جوايا الله ياسلام رخيص والله

ولو قلتلها بدي لايتعا السعر الفلاني ممكن تجيب شغلة ارخص من هالسعر وتقلي هادا سعرو وتربح

يعني مااستفدت اشي

المهم رجعت وجابت الي وصيت عليه وشايلة تيكت السعر

ولما فتشت النت عن هالماركة شفت انها ماركة حلوة ورخيصة جدا بنفس الوقت

الاسعار الي عطتني اياها مش غالية لكن بالنسبة لهالماركة مفروض تكون ارخص من هيك

يعني اعطتني اياهم بالاسعار التالية 20 و 30 $

حتقولو انو مش غالي طبعا مش غالي

بس لما شفت الي زوار هداك المحل قالو انو تتراوح اسعارهم بين 5و و6 و 10 باوند يعني ارخص من السعر الي انا قلتو

يعني لو الشغلة ب5 باوند معقول تروح تبيعلي اياه ب 30 دولار

مع العلم الفرق بين الباوند والدولار مش شي مهم يعني 30 دولار قدام ال5 باوند كتير جدا قدها 5 مرات

ولا مابعرف هالاسعار قديمة يمكن

وزي مقلت انا ماعندي مانع تربح

الشغلة ب 5 باوند تربخ فيها 5 باوند ولا 6

ايش يعني تبيعني اياها ب 30 دولار

بس ببرضو خايفة اكون ظالماها ومسيئة النية فيها

وعشان الي عايشين في بريطانيا الماركة الي بحكي عنها اسمها primark

و الاغراض كلها حسيت السعر مبالغ فيه بالنسبة للغرض نفسو

يعني اشياء جيدة ومعقولة

فانا محتارة

يعني خايفة تكون فاكراني جاية من الادغال لاني مابسافر كتير زيها

بس شكلها نسيت اني جامعية ومثقفة اكتر منها (ما بشوف حالي عليها بس هية مامعها شهادة انما دورة لعمل المضيفات فقط)
ويعني انا بشوف التلفزيون والعالم وعندي خلفية عن كل اشي واهلي مثقفين وزوقهم ماشاءالله عالي

وبشوف النت وكل اشي

ومش جاهلة ولا متخلفة ولا هبلة

وبقدر اجيب سعر اي شي من النت

بس هية فاكرة انو انا ماعمري شفت اشي ويعني مهجونة ولاشو بالزبط

ويعني الحمدلله ذوقي راقي جدا بشهادة زوجي والجميع وعندي زوق في كل شي من ملابس و مكياج

وديكور و بيتي بجنن ماشاءالله والكل بيقول عني مزوقة
والكل بياخد رايي في هذه الامور
ولو تيجي تتفرج عدولاب ملابسي حتشوف كل اشي راقي و زوق جدا

(مابمدح نفسي) بس الخلاصة انا مش مهجونة ولا عمريش شايفة اشي وطول عمري مابلبس الا احسن واحلاى الاشياء من ايام بيت اهلي

فليش ممكن تفكر حالها اشي غير شكل وتستهبلني بالشكل هادا

المشكلة خايفة اكون ظالماها

وانا مش عارفة كيف احسسها اني مش هبلة وبعرف وبشوف الدنيا زيها واكتر

وكيف اوصللها رسالة انو انا مابنضحك علية وانومش هبلة

وكيف المح الها بكل ماقلته لكن بدون ماخسرها او يصير بينا مشاكل بالنهاية بضل جارتي وانا مابحب اعمل عداوة مع احد ومش حابة اظلمها

فحابة اوصللها كل هالكلام بحيث لو كنت ظالماها مااسيئ الها بشي ولا اجرح مشاعرها
ولو كانت تستاهلو والاخت بتستغلني توصل الرسالة الها(مابعرف حاساها فاكراني غنية وقاعدة عبنك انا و زوجي ومش عارفة وين اودي فلوسي)

وتفهمها بدون مشاكل ونضل جارات وحبايب

اتمنى تكونو فهمتو علية


ولو مافي طريقة لتوصيل هالحكي كيف ارفض عروضها ان اتصلت فية؟بس انا مش حابة هيك صراحة عشان مااكسفها وعشان الاسواق برة حلوة وممكن اجيب كتير اغراض غير متوفرة هنا وانا بنحرج ومابحب اكسف حد واقلو لا يعني مابحب اقول لا لاي حد

بالنهاية عايزة امسك العصا من النص

__________________

يااقلبي ياا ملووووكة ...

حبيت ارد عليك بخصوص ال primark
هاي من ارخص المحلات هنا ..
الاكسسوارات ابدا ابدا ابدا ما تتعدى ال 5 باوند هذا لو هي غالية
ولا بالعادة من 1 باوند او 2

عنددهم ميك اب .. بس برضوا ما تتعدى ال 3 باوتد
الثياب.. في بلوزات من جنيه و في من 20
بس عادة حاجات ال 20 و ال30 بتكون الفساتين او الجواكيت
روبات النوم 8 و البيجامات القطن من 6 و عاد ايام التخفيض
كل شي بينزل...
المهم اكيد هي بتربح و لها حق بس مش اكثر من الضعف
و على فكرة السايح له الحق ياخذ فواتير المشتريات و يقدكها بالمطار و يرجعوا له ضريبة المشتريات
اللي تبلغ 15% من السعر الاصلي فا اعتقد انها تستفيد من هذه النقطة

المهم الحل اما انك ماعاد تطلبي متها طلبات و استخدمي الانترنت للشراء
او تطلبي منها فاتورة بحجة تقدميها لزوجك عشان يعرف انتي وين تصرفي فلوسه

__________________
سبحان الله... الحمدلله ... لا اله الا الله .. الله اكبر
سبحانك لا اله الا انت اني كنت من الظالمين
استودعكم الله

سلامتك من الهبل يا ست الكل

الحل انك تشتري من النت وتستغني عن خدماتها

وتبقى علاقتكم جيره وبس

__________________

انا راي من راي نورة اذا قلتيلها ان زوجك يطلب الفواتير من باب انوا يريد يعرف وين بتصرفي فلوسك بتنحرج و اكيد بتعطيك اعتقد حل حلو ارميها على زوجك
و ما اعتقد هي راح تمانع

__________________
--------------------------------
( اللهم اكفنيهم بما تشاء و كيف تشاء انك علي ما تشاء قدير )

انا مستغربة كيف هية بتبيعك الأشياء من دون ما تعطيكي الفاتورة اللي أخدتها من المحل
ما في محل هون الا بيعطي فاتورة بالمبلغ اللي اندفع لكل منتج اشتريتيه من عندهم
انا لما أي حدا يوصيني من بلدي على شي بخلي السعر على الأغراض و ازا مو مكتوب باخد معي الفاتورة حتى ما يضيع لا حقي و لا حقوق الناس

ماركة PRIMARK متل ما قالت نورة أسعارها أرخص أسعار بكل انكلترة
لكن لو وصيتيها على أي ماركة عالمية من المكياج رح يكون سعرها هون أكتر من الانترنت و اكتر من البلاد العربية
يعني ممكن ما تكون عم بتكذب
لكن هذا اذا هية فعلا ماركات عالمية يعني الديور و اللانكم و غيرها
بحكم وجود الضريبة و انك بتاخديها من محل أغلي بكتير من الانترنت
مثال بسيط الاسبوع الماضي كنت بدي اشتري بارفان الإيوفوريا من CK كان سعرو بكل المحلات بالسوق 61 باوند
بينما سعره على الانترنت 40 و سعره بالسوق الحرة السورية كمان رخيص متل الانترنت

بالنسبة للباوند نزل كتير سعره و قرب لسعر الدولار شكلها عم بتحسبلك على اساس انه الباوند ضعفين الدولار (متل ما كان قبل سنتين ) استهبلي عليها و قوليلها الاسعار الجديدة

و انا من رأيي اذا بدك شي من المكياج و العطور و أي شي ماركة عالمية لا توصيها على شي لأنه بأوروبا أغلى من البلاد العربية

و ما تاخدي شي منها إلا بفاتورة
او لا توصيها على شي

__________________
.
.

استودعتك أهلي في سوريا يا من لا تضيع ودائعه

اقتباس:

ولو مافي طريقة لتوصيل هالحكي كيف ارفض عروضها ان اتصلت فية؟بس انا مش حابة هيك صراحة عشان مااكسفها وعشان الاسواق برة حلوة وممكن اجيب كتير اغراض غير متوفرة هنا وانا بنحرج ومابحب اكسف حد واقلو لا يعني مابحب اقول لا لاي حد

اذا عرفتي السعر و هية عم بتحكي معك وصيها و اذا ما عرفتي قوليلها لأ
أحسن ما تفلسي زوجك على شي مو مستاهل
صدقيني مع الوقت لو تحسبي كل الخسارات رح تكون كبيرة شي فوق شي بصير مبلغ كبير
شي بيجمع !!!
يا ريتني جارتك كنت أنا جبتلك

و دائما أشعريها انك حريصة على القرش صحيح انه صعب لكن أحسن ما تخليها تستهبل عليكي

__________________
.
.

استودعتك أهلي في سوريا يا من لا تضيع ودائعه

ماله داعي تمدحي نفسك ياعمري

اخاف عليكي من الغرور ..

اكتبي المشكلة الاساسية بعيد عن مدح الذات ..


يعني ماله داعي سيرة الديكور والدولاب وكلام الناس عنك

كان تقدري تختصري كل هالكلام

بعبارة

" وانا ولله الحمد أميز الأشياء الحلوة وانتقيها بشهادة من حولي "





عموما

على قولة إخواننا المصريين

بين البايع والشاري يفتح الله ..


اذا ما ارتحتي في التعامل معاها

ماله داعي تشتري منها ..



واذا سألتك عن السبب

قوليلها

الأسعار جدااا غالية .. وهي راح تفهم ..

لك فااائق ودي واحترامي ..

اخواتي الكريمات شكرا الكو ولتفاعلكو معي بارك الله فيكم كلامكو منطقي وعين العقل
بس بالنسبة للفاتورة مابعتقد اطلب ويعني اكيد وطبيعي انها ماتعطيني اياها قصدي قبل مااكتبلكو هالموضوع هية هبلة تعطيني الفاتورة
وانا ماعندي مانع تربح بس من غير نصب والله اعلم


ماريا هية اليوم كانت عندي وجابت سيرة الباوند وفعلا زي متقولي مابعرف عن شو كانت بتحكي اه عن انو كل متسافر بلد بتطلع معها فرق العملة اثناء الصرافة بحيث انو بتخسر
فبتقول بتصرف ال100$ بروحو طالعين الها 60 $ شكلو عالسعر القديم عنجد؟!!!





اما اخت شعاع من نور يعني مافي داعي لكلامك الي قلتيه في البداية والجملة الي قلتيها كان ممكن احكيها فعلا لكن انا خانني التعبير وحبيت اشرح لحتى اوصل الفكرة تماما
اما انا يصيبني الغرور من شو ؟اناعارفة قدر نفسي ومش محتاجة امدحها بدافع المدح
بعدين ماعندي خلل في الاتزان لحتى انغر واشوف نفسي في موضوع عالانرنت يعني ماحد بعرفني !!!
كان ممكن اسلوب الطف لوسمحتي
وشكرا لردك الكريم

__________________

اهلين حبيبتي ملك

والله ما عندي فكرة عن هده الماركة

بس حبيت اسلم عليكي واقلك اني اشتقتلك كثير يا احلى ملوكة

__________________
يا رب اشفيني من مرضي النفسي
أمانة يا اخوتي تدعولي

ماشاءالله الاخوات لم يقصروا ابدا ... وفعلا الماركة التي ذكرتيها

رخيصة جدا بالنسبة للماركات الاخرى ... والحمدلله انك انتبهتِ ولم تتورطي اكثر

انا فعلا من رايي ان تتوقفي عن الطلب منها ... هي لا يهمها جيرتك وعلاقتك معها ....

المهم بالنسبة لها الربح ... في هذه الايام ياغاليتي الكل يبحث عن مصلحته ... هذا ماشعرت به من خلال

تعاملي مع الناس ... وفعلا تعلمي ان تقولي لا ولا داعي للخجل والحياء ... فبعض الناس يستغلون هذا الجانب

وللاسف هذه الصفة موجودة بي ايضا ... لذلك صرت اكثر جرأة مع الناس .... لاحظي هي لم تستحي

ولم تعمل اي حساب للعلاقة التي بينك وبينها ... فلم الخجل ؟؟ .... وياليتك جئتِ وسالتي ماشاء الله

هنا اخوات يعيشون في بريطانيا او غيرها قبل ان تتورطي ...ذكرتني بصديقة لي عندما وصتني ذكرت لي

سعر الحاجة التي كنت اريد ان اشتريها لها من البداية مع اني اصلا لست من النوع الذي يفكر بالربح

ابدا ... انتبهي غاليتي ام فهد ... وفقك الله

__________________



اللهم اغفر لوالدتي وارحمها واعفو عنها

اللهم اجعل قبرها روضة من رياض الجنة

اللهم ادخلها الجنة مع النبيين والشهداء

والصديقين والصالحين ... آمين ... آمين