السلام عليكم ورحمة الله وبركاته
كيفكم يا امهات وكيف صيصانكم؟؟
هذا الموضوع يخص الامهات اللي عندهم اطفال من عمر
( صفر الى 3 سنوات)
عندي فضول اعرف اطفالكم كيف بيقضو يومهم ..( وقت قومهم من النوم والاكل واللعب الخ الخ الخ)
لانه ابني احسه مسكين بيزهق كثير ويبغاني العب معاه طول الوقت واذا قمت من اللعب معاه وخليته بيترك الالعاب وبيلحقني ويقعد يزن يزن عشان ارجع العب معاه وبصراحه كاسر خاطري وبالمقابل انا كمان عندي مسئوليات ثانيه وماني عارفه ايش اسوي..
بالنسبه لنا
عبودي عمره سنه وشهر بالتمام والكمال
بيصحى ما بين 11 الى 12 ونص الظهر يعني خلال هذا الوقت ممكن يقوم ... باعطيه حليب واغيرله وباحطه بوسط صالة التلفزيون وبيبدا يدور براسه
عشان يختار يبدا يخرب ايش اليوم!!
بيقعد يتفرج عالكرتون وبيدور يدور بالصاله يمسك هذا ويمسك هذاك وانا ورااااااه ياولد ياولد
بعدين بنجيب صندوق الالعاب وبنفرط كل الالعاب على الارض وبنجلس نلعب الين وقت الغداء باغديه من الاكل اللي اكون عاملاه من قبل ما يقوم من النوم وبعد ما يتغدى بيروح ينام (قيلولة العصر)
مرات بينام ساعه واذا كريم معايا واخلاقه حلوه بيسحبها ساعتين ونص..خلال هذا الوقت انا احضر الاكل سريع سريع واشوف احتياحات البيت وكمان وقت دخولي عالنت..
لما بيصحى اخذه معايا مشوار اذا كنت ناويه اروح السوق او اقضي غرض.. وبنرجع نلقى ابوه على وشك وصول..
بعدها بيبدا الزن والدلع بيلعب مع ابوه شوي لكن ابوه بيكون تعبان وعبودي مصر انه اللعب يستمر ساعات وساعات طبعا خلال اللعب مع ابوه باعطيه موز وتفاح واشربه حليب يعني باستغل الفرصه انه مشغول عشان احشر بفمه اكل
على ال10 بالليل باعطيه عشاه وبعدين يتحمم وبعدين يبقى يدور بالبيت ينوح ويزن زهقان مش عارف ايش يعمل او ايش يخرب..على ال12 بياكل زيادي وادخله سريره ينام وبسسس..
احيانا بالليل ابوه بياخذه مشوار او بيروح معانا يزور قرايبنا ..
ويوم عيييييد لما بيجينا طفل من العائله بينبسط وبيفرح ويصير ما يبغى ينام من الفرحه لانه فيه طفل ثاني يلعب معاه..
هذا جدولنا وابغى اعرف جداولكم يمكن اسرق كم فكره من عندكم..وفرصه نتبادل افكار
يلا عاد لا تبخلو علينا..استناكم.
__________________
الى جنات الخلد يا امي
والله ما غابت دقيقة عن العين أمشي مع العالم وقلبي معاها