السلام عليكم ورحمة الله

نزلت قبل فترة موضوع استشارة عن رجلين تقدما لخطبتي
المهم أن الله قدر وتقدم لخطبتي شخص آخر غير الإثنين وبعد الإستخارة تمت الموافقه
مع أن أهلي موافقين عليه بكل أريحيه من أول يوم تقدم لي والسبب أننا نعرفه زين
برضو سألنا عنه ..شاب محافظ على صلاته جامعي مثقف أخلاقه طيبه مع الجميع وظيفته ممتازة معروف بكرمه وحبه للخير
تم زواجنا والحمدلله على كل حال
مشكلتي أني ماأحبه مااشتاق له أجبرنفسي على كل شئ معه وأجامله من كثر ضيقتي منه إذا كنت عند أهلي وجاء ياخذني أرجع معه وأنا أبكي ماعاد صرت لاآكل ولاأنام ومافيه سبب لعدم حبي له
أنا انسانه بسرعه الناس تدخل قلبي من اوسع ابوابه إلا زوجي ماقدرت وربي ماقدرت
من ناحيه ثانيه حبه لي يخنقني وأسلوبه يخليني أبتعد عنه أكثر لوأطلبه أي شئ حاضر حتى لوكان هذا الطلب لابد يناقشني فيه مايناقش ولايعترض ولايبدي رأي
أقوله عن حق من حقوقه يقولي عادي أنا حقوقي أشوفك سعيده!!
أمزح معه مزحه ثقيله أبي أحركه أبي أشوف ردة فعله يقول عادي ياعمري فداك وفدا رجولك!!
أوضح له أني متضايقه لأنه مدخن يقول أبشري بإذن الله بتركه
أقوله(مزح) نفسي أشوف التدخين حلو أو لا
يقولي والله لوبخاطرك أخليك تدخنين لوسيجارة!!
صدق؟
عادي ياقلبي اللي تبينه!!
كل شئ أبيه عادي ياقلبي أغلط بشئ عمدا" أوأتأخر يقول أنا كلي لك روحي وقلبي ووو
أنا ماقلت لايحبني بس موكذا
يمسكني يقول أنا مويه بين يديك خاتم بإصبعك آمريني وووو

يقول صحيني من نومي أجيب لك مويه أو حليب أو أو ..
أنا أتضايق من كذا
طبعا قلت له رأيي قال ماعليك أنا أحب أدلعك
هذا غير الرومانسيات اللي 24 ساعه وحنا نتقهوى ناكل وووو
ماقلنا شئ نحب الرومانسيه بس موكذا
وإذا حس أني متضايقه يجلس ينكت لي نكته ورى نكته ورى نكته
إلين يشوفني أضحك وأحيانا أضحك من قلب وأحيانا أنضغط وأجامل
لكن الضيقه حلها موبالنكت والضحك
والله صرت أكره نفسي مابي أرده بشئ أرحمه وهوقلبه طيب طيب طيب أعجز أقول عنه طيب
يحن علي أكثر من حنان الأم على طفلها
فرفوشي مايحب المشاكل والنكد مرح درجة أولى فااهمني بقوة لدرجة أنه يعرف وش بخاطري بدون ماأتكلم
يفاجأني بسفريات وطلعات وكل 4 أيام يوديني ساعه زيارة لأهلي وإذا رجعت ألاقيه قالب الغرفه ورود وشموع
لكن ماحبيته أبدا ماحبيته ماحب أي شئ معه لاأكل لانوم لاسوالف لاطلعات لاسفر
حتى الكلمه الحلوة إذا قالها مالها طعم عندي ماااحس بشئ اتجاهه
مرة سألني ماوحشتك
قلت ايوه وحشتني وجلست أبكي لأني أكذب عليه وأبكي على حالي نفسي أحس في هذي الكلمه معاه
شخصيته خارج البيت قويه وعمله يلزمه بإبداء الرأي وووو وماشاءالله عليه شخصيه ناجحه واسمه يلعلع في الدول المجاورة
ماعنده إلا أخ واحد وامه وابوه متوفين ويقول أنتي امي واختي وصديقتي
وأنا ماحس بإتجاه له أحس أني مشلوله قدامه مشاعري اتجاهه مجمده
أنا بطبعي إذا أرتحت لأي شخص أسولف معه بكل أريحيه
وإذا ماأرتحت مستحيل أتكلم مهما حاولت أجامل تضيع مني السوالف
فمع زوجي صااامته
إذا قال قولي شئ أجلس أفكر كأني بحل مسألة
تعبت من حياتي معه الليلة تمر كأنها سنة
وأنا عارفه أنه حاس بوضعي لكن مايبي يسمع هذا الشئ
نفوري منه موبسبب حبه الزايد لي لأن لوكنت أحبه كان فرحت بحبه لي وكان أنعمي عن عيوبه لوكان فيه عيوب
موقادره أكمل معه حتى أصحى من نومي وأروح لغرفه ثانيه أبكي من همي وضيقتي
ماقدرت أتقبله أحس قربه مني شئ فوووووق طاااااقتي
طلبته أجلس عند اهلي اسبوع ومر الإسبوع ورجعت وانا همي بقلبي
وقلت له بنأجل الأطفال طبعا وافق لكن حسيته تضايق لأنه عارف اللي بداخلي
يمكن أنتم شايفين أن اللي ذكرته أشياء عاديه أوماتضيق الصدر
لكن أنا مخنوووقه عارفه أن الإنفصال قرار صعب لكن أنا جالسه أختنق معه نفسيتي تعبانه استخرت وخايفه من قراري شورو علي.

وعليكم السلام ورحمة الله وبركاته

ماشاء الله تبارك الله على زوجك انا ماشوف فيه اي شي كامل والكامل وجه الله

والله كل وحده بتقرى الموضوع لتحسدك

مافي عيب ذكرتيه

رومانسي لأبعد الحدود

يحن عليك أكثر من أمك

وتقولي ابي انفصل !!

سبحان الله هالرجال على قد طيبه وحبه لك انتي مو عاجبك

انتي شكلك متزوجه قريب وزواجكم ماصار له فتره طويله

حاولي تكسري هالحاجز اللي بينك وبين زوجك وحاولي تتقبليه

صدقيني زوجك شخص مايتعوض

الله يسخرك له ويحفظه لك يارب العالمين

الله يوفقك يا اختي

__________________

طيب ليش اختي تدوري النكد و الهواش , عشان يصير في الحياة اكشن!
عفوا محد يعاف الدلع و الحب ,ما اعتقد سبب نفورك منه,, تدليعه لك و حبه
بل انت لم تتقبليه و مصرة ألا تجعلي نفسك تتقبله
تعطي لنفسك رسائل سلبية انني لا احبه لا استحق حبه و الخ
الحمد لله الف مرة احمدي الله على زوجك فأنت مثل من يقدم له الله نعمة كزوج صالح محب و انت ترفسينها
الله يهديك و يهدينا

__________________

أبو جوري أشكرك جزاك الله كل خير
أقسم بالله أني حاولت تقبله حاولت حبه حاولت أشتاق له
مااااقدرت
المسداني
أشكرك انا ماأبحث عن النكد والهواش بالعكس أضغط على نفسي وقايمه بواجباته كاامله الحمدلله وماراح أقصر بشئ إلى آخر ساعه أكون عنده وأجواء المنزل هاديه جدا خاليه من المشاكل لكن نفسيتي جدا تعبانه لم أحبه ولم أتقبله ولاأشتاق له أبدا
مشاعري وقلبي ليس ملكي..وأعرف أنه حاس بهذا الشئ مع أني أحاول أخفي شعوري إلى أن أجد حل
الكل ملاحظ أني مهمومه حتى أهلي يظنون انه يضايقني لأنهم يسألوني كثير
أنتي مرتاحه؟!
ينقصك شئ؟!

__________________

ياقلبي هادي وسوسة شيطان
احيانا الواحد ما يحس بقيمه الشي الا اذا راح من عنده
احمدي الله على نعمه واساليه يوفق بينكم

__________________
يارب
فوضت اموري اليك

حاسة فيك ياعمري ومالك الا الدعاء ان الله يحببه الى قلبك ويجعله قرة عينك واجتهدي في ذلك وفرصة انك تحاولي انه يترك التدخين (لان يهدي الله بك رجلا واحدا خير لك من حمر النعم) مع الصدقة بنية ان تحبيه , صدقيني راح تشوفي النتيجة بأسرع وقت . وانت بعد ابذلي جهدك في محاولة حبه , اشعري نفسك بحبه وتخيلي انك مشتاقة له حاولي انك تعملي بنفسك ليلة رومانسية يمكن يتحرك بداخلك شعور جميل تجاهه . الله يوفقكم

من شهرين بالضبط لم يكن قد تقدم لك بعد ... يعني عرفتيه وتزوجتيه خلال أقل من شهرين ...

هذا حبيبتي جدا سريع ....

كما أني لاحظت انك شخصية جادة تحب تكون ناجحة ... وأتوقع انك تقرئي كثير في أمور الزواج والحب وبالتالي توقعتي مشاعر غير اللي تشعري فيها ... توقعتي انه بما انه زوجك فالصحيح هو أن تشعري بالوجد والهيام تجاهه .... لكن حبيبتي الحب ما يجي بهذي الطريقة ... يحتاج وقت .. يحتاج شهور .

تحتاجي وقت حتى تتعودي عليه أول ومن بعدها تبدئي تتقبليه ومن بعدها تبدئي تحبيه وهذي المراحل كلها كان مفروض تصير خلال فترة الخطوبة وبما انه تقريبا ما كان عندك فترة خطوبة فأكيد لازم تمري فيها الان .
ولكنها راح تكون أصعب شوي لانه المخطوبة مرتاحة مع أهلها وما تغير عليها شيء وابنتعاد خطيبها عنها يساعدها انها تشتاق له ويساعد على خلق حب خطيبها بقلبها بهدوء .

اللي صار معك انك ابتعدتي عن أهلك وانت متعلقه فيهم وافتقدتيهم ... وبالتالي متضايقة من الوضع الجديد المفاجئ .من مسؤولية وبعد عن أهلك.... ولما ما شعرتي بالحب اللي تقرئي عنه حسيتي بالفشل وهذا زاد من ضيقك ...

لا تفكري بالانفصال الحين ... أعطي زواجك فرصة ...

هل تجدي عدم توافق بين أفكاركم انتي وزوجك ؟؟؟ هل هناك فروق معينه أو اختلافات بطريقة التفكير ؟؟ بأهداف الحياة ؟؟

هل عندك ما يشغلك غير بيتك حاليا ؟؟؟ هل عندك عمل أو اهتمامات تشغلك ؟

__________________

سبحان الله المرءه دايم تحب الصارم معها والخيل تحب عسافها
مسألة وقت البدايه كذا طبيعي اتوقع زوجك عنده ضغوطات وعمل يحتاج قوه وصرامه خارج المنزل
وصدقيني داخله اشياء كثيره وقاعد يضغط على نفسه عشانك ولا وده يقولك عن الاشياء الي ما تعجبه
فيك بس يسوي كذا ما يبي مشاكل ولا نكد ما يبي يوجع راسه من الجهتين بدايتي كانت كذا الرومانسيه الزايده تنقلب الى بالعامي نسميها مصاله وهذي دايم في البدايه شوي ويمل

الحمد لله على كل حال وربي يحنن قلبك وعسى ان تكرهوا شي وهو خير لكم