المشكلة ( حساسيتي الزائدة ) ..
و ( قلة أدبهم ) ..

اتأثر جدا و لعدة ايام .. و مع اني ما ابين لهم ابدا اني تأثرت و ما يبان علي ..
و الشي هذا ؛ هو الي يقهرهم بزيادة .. لانهم مو قادرين يستفزوني و لا يمسكوا علي اي غلط ..
و الي يشوفني يقول ( متبلدة الإحساس ) ..

.
.

اعطيك مثال ..

ابو زوجي مثل ما قلت من قبل .. بخيل جدا جدا جدا .. و ام زوجي تحب الفلوس مررررررة مرة مرة ..
و زوجي و اخوانه و أخواته .. كل كلامهم يا فلوس .. يا 18+ ..

و قبل كم يوم كنت اكلم زوجي عن الفلوس .. انه الواحد المفترض ما يكون تفكيره بس الفلوس ..
و قالي هو اهم شي في الحياة .. المال و البنون زينة الحياة الدنيا ..
قلت له .. بس مو بالشكل المبالغ هذا .. و الي فتح الموضوع؛ لما قلت له عن الملك الله يجزاه خير و تعويضه للمصابين
و زوجي يمزح و يقول لي: ليتني كنت واحد من المصابين ..

فأنا قلت لزوجي .. استغفر الله لا تقول كذا..
لو قلت لك .. اخد منك عيون .. او رجل لا سمح الله .. و اعطيك نص مليون .. بتوافق !؟
أكيد لا .. الصحة اهم شي .. و عندك نعم كثيرة الحمدلله ..

الزبدة انه انا انسانة عارفة نفسي ..
مو همي الفلوس .. الفلوس ماهي غاية ..

و الدليل اني ما تشرطت في زواجي و لا طالعت في راتب و لا منصب و لا مظاهر ..
يعني المفترض اهل زوجي عارفين الشي هذا.. و هما على العكس ؛ كل أزواج بناتهم لازم أغنياء اهم شي ..

.
.

فاللي يقهرني مثلا ..
قبل يومين ابو زوجي يتكلم مع سلفتي عن الرواتب و عن الفلوس و فيها شوية فلسفة من راْسه ..
انا كنت شوي بعيدة عنهم .. و مشغولة مع ولدي ..

ابو زوجي يطالع فيا كل شوي و يبغاني اسمع له ..
طنش سلفتي و قال لي ( ركزي معايا .. هذا موضوع عن الفلوس .. انت تحبي الفلوس !؟ )

طبعا الي ما يفهم لهم .. بياخد بظاهر الكلام ..
بس لاني فاهمتهم و كانهم كتاب مفتوح قدامي ..
فأنا عارفة ايش سبب كلامه ..

.
.

هو مقهور من ولده .. عشان ولده بيصرف علي و على اولاده ..
ما يبغوا زوجي يصرف علي و على أولادي و بيتي ..

الكلام هذا مو من راسي ..
هذه وحدة من نقاط الاختلاف بيني و بينهم و زعل حماتي ..
لاني قلتلها مرة .. زوجي مسوول عني و عن اولاده وبيته
و هي كانت مخطط انه راتبي يروح لهم .. لكن ما صار الي في بالهم ..


يبغوا راتب زوجي كله يروح لهم .. و مقهورين مني امه و ابوه ..
و انا طلعت سيارة باسمي و زوجي يسدد أقساطها و عندي ضمانات أخدتها منه ..
فمقهورين .. بس ما يقدروا يتكلموا عن المواضيع هذه ..

فيقهروني عن طريق رمي كلمات و جمل مثل هذه ..
مثلا ( اسمعي .. الموضوع يهمك .. انت تحبي الفلوس )
بينما فعليا و بشهادة كل الي يعرفوهم .. انه ابو زوجي انسان بخيل جدا ..
و ام زوجي كمان فيها طمع و جشع ..

المشكلة ماهم شايفين نفسهم ..

.
.

انقهر غصب عني ..

لاني اكل في نفسي .. و ما اكل كم يوم ..
و ماقدر أطنش و أعدي الكلمة ..

لازم اقول لزوجي و أطلعها غصب عني ..

.
.

ابغى نفسي تكون صافية تجاههم ..
بس يقهروني بالكلمات هذه الي يستفزوني بها

.
.

لا تقول لي ما يقصدوا او حسن نية او او ..

لانهم زمان لما زودوها ..
عيوني دمعت و كلمت ابو زوجي .. قلت له ليش احسكم تتقصدوني بالكلام !؟
كاني عملت شي غلط !؟ ليش كل كلامكم علي !؟

رد علي و قال ..
لانك انسانة تتحملي المسؤولية .. فتشعري بكل كلمة انها موجهة لك .. و تتحملي مسؤليتها ..
و عشان زوجك انسان ما عنده احساس و لا يتاثر .. فنحن أصلا نقصد ولدنا . بس نرمي الكلام عليك؛.
عشان انت توصليها له بدال عننا .. لانه هو ما يحس ..

.
.

و مرة زوجي قالي ..
انت غبية ..

انا ما اعطيهم أذني و مطنشششششهم ..
و ما يلاقوا طريقة غير انهم يقهروكي و هذا هو الي يبغوه ..

طبعا زوجي ما يتكلم عن اهله قدامي ابدا ..
لكن المرة الوحيدة الي قالي كذا .. بمرة من المرات ..
قبل لا انفجر خلاص عند امه و أرد عليها و أقاطعها ..

.
.

هي دحين تابت شكلها و اخدت درس ..

لكن البقية شكلهم ما أخدوا درس الى الان .. و لا يبغوا يتوبوا لحد ما يجربوني و يتلسعوا مني ..

.
.

على فكرة ..

اخر مرة قابلت أخواته في عيد الفطر ..
و دحين قابلت بس اتنين منهم ..

و امه قابلتها في عيد الفطر و قابلتها بعد العيد بشهر ..
و انا طلبت من زوجي انه أعدي و اسلم .. وأبو زوجي كان نايم وقتها .. مع انه كان العصر ..

لكن بنتواصل انا و امه بالجوال بعض المرات ..
و الامور بيننا سليمة الحمدلله .. رسميات و في حدود ضيقة جدا جدا ..

.
.

المشكلة مثل ما قلت ياخوي المثابر

انهم يتقصدوا الاستفزاز و بشهادة ابوهم و شهادة زوجي .. و من تصرفاتهم
و اني اتأثر للأسف الشديد و حتى لو ما بينت لهم ..
و اخر شي .. الاحساس بالظلم .. و عدم التقدير و عدم وجود الرابط و الجو الاسري ..
و إحساسي اني وسط ( حرب ) .. كل ما جيت اروح لهم .. اجلس ادعي كم مرة و أكرر كم مرة دعاء اللهم اكفني شرهم

.
.

اخلص منهم ؛ تجي سلفتي التانية ..
حاقدة علي بشكل مو طبيعي ؛ هي ما تقدر عليهم .. و يعاملوها كأنها شغالة ..
و انا ارفض معاملتهم؛ فتلاقيني اتصرف بالوضع الي يليق بي كإنسانة و بشر ..
مثلا كلهم جلسوا عالطاولة عشان الفطور ؛ اجلس مثلهم ..
ما اجلس مع الاطفال في سفرة عالارض .. و تشوف اخوات زوجي و امه مقهورين مني ..
و زوجي يباشرني بكل شي موجود عالسفرة ..

سلفتي التانية اذا هي رضيت على نفسها .. مو ذنبي انا ..
و مع كذا .. تلاقيني اخد بخاطرها باي طريقة ..