انا ما اطبخ بقدر الضغط ابدا ..،
زمان قال لي ليش وايش السبب
بلت له اخاف منه .. ولك عليا أكلك جاهز بالساعه اللي تبغاها لو اقوم قبل الاكل بساعات مايهمني..
اشتراه .. وطاااال النقاش والجدل فيه كل مرا ارفض اطبخ فيه
مرا اقول اخاف مرا اقول ايش دخلك بالطبخ لك اكل تأكله وخلاص ومرا اقول له يخلي نكهة الاكل تروح ومرا اقوله قدر الكسلانه اللي تصحى من نومها قبل ما يجي زوجها بساعه وتقربع له الاكل بدون نكهه .. تعبت اتعذر واجيب أسباب ..
طبعا وقت الويك اند يقول طلعي اللحمه ونبغى كبسه بقدر الضغط .. ونتفق انه هو يقفله ويفتحه. وكل مرا يقفل فيها القدر يناديني الا اجي اتعلم وبالبداية تبدأ مزح بعدين اعصب واروح بعيد واحلف ما المسه لو ايش ما صار ..

بهذا اليوم .. قلت له دامك تبغاه بقدر الضغط الان بكشن للحمه وقفل عليها وافتحه قبل ما تروح الصلاه وانا اسوي الرز قبل ما تجي .. طبعا الرز ما أقفل الغطا عليه .. لانه مرا قفل الغطا ع الرز وطلع مويه ..
قال طيب
كانت الساعه 11 قمت كشنت وناديته.. تعال قفله.. طبعا من مكانه وهو جالس بالصاله قال يلا انتي قفليه اتعلمي .. قلت لا لا ما ابغى يلا تعال.. قال جربي يلا .. قلت معرف .. قال جربي لفي الغطا يمين لا يسار لا بقوه لا مدري ايش الين طلع البخار ..
قمت قلت له خلااااص طلع البخار ماني لامسته تعال قفله انت قلت تقفله..
قال ماني مقفل
قلت احل بنزل اللحمه بالقدر العادي واطبخ براحتي طبعا كنت منفعله
قال لا اطبخي بقدر الضغط رسلت قفليه
قلت يووووووووه وقمت ابكي وقلت ماني مقفله شي ورحت غرفتي ..
قام دخل المطبخ وخرج.. مسحت دموعي بعد دقايق ورجعت جلست عنده بالصاله
قال قومي سوي غداك
قلت قفلته ،؟
انا على بالي لما دخل المطبخ قفله

قال ما قفلته
قلت بصوت عالي هيا والله ما اطبخ فيه
قام شد شعري قال قومي سوي الغدا
قمت ضربته من كتفه ثلاثه ضربات وكان شايل البنت .. قلت له وانا اضربه انا ما تمد يدك عليا فاهم
قام حطها وجا وقف قدامي ومسك رقبتي وقام يضربني من راسي والله من الصدمة مدري ضرب ع وجهي مدري شد شعري المهم انه بهذلني
قمت انا ابكي وما خليت كلمه ما قلتها قلت والله تطلقني اليوم
وصرت الم اغراضي زي المجنونه واحطها بالشنط .. حتى ادراج التسريحه..لميت اللي فيها ..
بختصر لاني مرا تعبت وانا اكتب واستحضر الموقف وازعل ع نفسي واحد عليه اكثر ..
المهم
راح الصلاه وجا يقول السلام عليكم ما رديت
قام قال رجعي شنطتي ما تاخذينها معاك
قلت احط اشيائي ببيت اهلي وارميها لك
بكمل

__________________

قال ما اخذ معايا شنط انا تبغي تروحي خلي اخوك يجي يأخذك
قلت اخويا متله علاقه توديني وانت تضحك
نسكت شوي ونتناقر شوي
ما خليت كلام ما قلته له من القهر
قلت له قوتك هذي اللي تتقاوى فيها بعد عشره سنوات لما تضعف تدور محبتنا ما تلقاها لا من طرفي ولا من طرف اولادك
واصلا اولادك يكرهوك
وانت تقول زوجتك دايما نايمه غصب تنام لما تشوفك دام عندها زوج نقه زيك
وكلام كثير

هو معاه الحزام الاسود بالكراتيه .. وقوي يعني تخيلوا ضربي له مقابل ضربته ..

انا الان احس ب ذل فضيع
اهانه
شعور الله يبعده عنكم
بداخلي شي ما يعلمه الا الله


زوجي طيب وكريم وشهم ..
تزوجته عن حب وقناعه
زوجي كان يحبني كثير قبل اولد .. بعد ما ولدت بعدنا عن بعض
وصار اغلب كلامنا بنتنا.. يشوفني ما افهم شي وجالس يعلمني.. كأني طفله ..

أحب فيه اهتمامه فينا انا وبنتي
لكن الفتره الاخيره صار اللي يجمعنا طفلتنا.. عكس قبل اولد لما كان يجمعنا الحب والرومانسية والهدوء ...
انا اللي حياتي تغيرت المفروض انا اللي أزعل مو هو ..

مرا اسكت بنتي ومرا اكتب اتحملوا الخربطه انا كتبت معلومات وموقف وانتم جمعوها واحكموا

__________________

عذرا منك اختي مهرة انا ما ابرر ضرب زوجها لها
لكن منفردة تقول بأول المشكلة شدها من شعرها ولما أمها سالته قال كنت امزح
واكيد هي تقدر تحدد اذا كان يمزح او جد بكل الأحوال طريقتها بعد شد الشعر استفزته واتوقع أي رجال مكانه بيغضب
شوفي ردة فعلها وطريقة كلامه مع زوجها أتوقع ضربه لها كان بسبب اسلوبها في الكلام وضربها له
وطبعا طريقتها معه ما تعطيه الحق انه يمد يده عليها
الوحدة تكون عند أهلها معززة مكرمة وتتزوج انسان يجرح انسانيتها شيء يقهر
المشكلة الاثنين تصرفوا بتهور وما حد منهم قدر يمسك نفسه علشان المشكلة تنتهي على خير

__________________
الحمد لله بلا سبب ولا طلب..
الحمد لله في حياتي وبعد مماتي..
الحمد لله دائمآ وأبدا..

عيل شو بيقول يا حنين؟ .. عصّبت عليها لأنها ما تبا تطبخ بقدر الضغط؟!

كل ما حدث بعد شد الشعر والضرب هو رد فعل.

نعم طوّلت لسانها .. وهذا بالتأكيد خطأ .. لكن بالله وحدة شعرها مشدود ومضروبة على سبب تافه كيف المفروض تتصرف؟! .. وحدة شعرها مشدود ومضروبة على سبب تافه من وين بتييب طاقة للمسايسة وتهدئة الأجواء؟!

انشد شعرها وانضربت على سبب تافه والمفروض إن رد فعلها يكون عاقل ومحترم .. لكن هو عادي يطلع من طوره عشان نفس السبب التافه؟!



ما عليه .. مهما كانت أخطاء منفردة لا يكون علاجها بالضرب.

والبنت صادقة .. لما عدت المرة الأولى هاهي تتكرر .. وكل مرة الضرب سيشتد.



كلنا نغلط مع أزواجنا بشكل أو بآخر .. هل إذا زوج وحدة فينا تهور وضربها لسوء تصرفها .. بتقعد تلوم نفسها وتقول: صج والله أنا أستاهل إني أنضرب لأني سويت كذا وكذا؟!!

يعالج الخطأ بالطريقة اللي تعجبه .. لكن ضرب؟ .. لا.

__________________


اللهم طِيبَ الأثر .. وحُسْنَ الرحيل.

من قراءة الموضوع بس احس عصبتني مزاجيتك وبعض تصرفاتك ...
باين زوجك يحبك لأن مستحمل مودك اللي يتغير ع طول حافظي عليه وعلى حياتك وبنتك ..
خففي من حساسيتك وخلك ربة بيت سنعة ياأختي ..صار لك مدة متزوجة وانتي الى الآن اتخافي اتظلي لحالك في البيت, واتخافي
من قدر الضغط....تقلبي على الأشياء اللي تخافي منها واعملي الأشياء اللي يحبها زوجك.... اذا حسيتي ان معصب لا ترادديه وخلك ساكته لما يهدأ , شي طبيعي اذا بتحطي راسك براسه بيمد يده عليك ..خليك انتي العاقله وحافظي على بيتك ..

هو قام الصباح مروق و يبغاكم معاه المفروض تحملتي و لا عصبتي
ومافيه احلى من الصباح هذي نقطة
بالنسبة لقدر الضغط كلها غطا كان حطيتيه
او طبختي بقدر عادي وانتي تضحكين لو شافك مو لازم تنادينه يعني كان تصرفتي
هو شافك مبالغة يوم رفضتي تسكرين الهوا
سهل مرررة و اساسا مايستاهل تتزاعلون عليه- بس هو انقهر من الاسلوب من قمتي الى هاللحظة -الله يصلح ماببنكم -وبصراحة تعجبني مصداقينك في سرد الاحداث سواء لك او عليك

انا من لما ولدت وقلبي مليان عليه ..
وتدخلاته بكل كبيره وصغيره بحياتي تضايقني
صح هو يسميه اهتمام بس انا اسميه تسلٌط

بنتي وهي نايمه اذا تحركت تحب اني ألمسها او تمسك يدي وترجع تنام او امسح على رأسها وتكمل نومها
هو ما يبغى كذا .. يقول لاتدلعي البنت ويزعل من جد
الرضاعه يتدخل فيها رضعي بنتك طبيعي وان شافني ارضعها باليوم اكثر من مرتين يعصب .. رغم انه بنته مو مقصره بالطبيعي لو عليا افطمها من الاربعين لكن كل ما كبرت تعلقت اكثر
لبسي .. بيتي .. كل شي يتدخل فيه مايديني مساحه للقرار لوحدي
حتى نوم بنتي يقول .. انتي تتحكمي فيها مو عي تتحكم فيك .. طيب البنت فيها النوم العبها العبها الين تنام وهي جالسه اوقات .. اصحيها يعني اقول لا مو وقته ؟؟
لسا مادهلت الخمسه شهور ايش اللي اتحكم وما اتحكم !
بعدين بنتي شافت الموقف وبكت بيننا وربي قطعت قلبي
انا ما ابغاها تتعود على هذا الجو .. ماشاء الله ما صارت أسره .. من جد صارت حلبة مصارعه..

أعيد لكم وأكرر انا ما انسى أفضال زوجي عليا ..
انسان لو عاد الزمن للورا ما اتزوج الا هو
لكن انه يمد يده عليا ؟ لا والله ما أرضاها لنفسي وهو أساسا مايرضاها لبنته

كلمت اخته من زعلي وقلت لها كل شي
قالت امتي ما غلطتي وحتى لو غلطتي ماله مدة يد عليك .. هذا مجرد تحليل منها ومحاولة انها تهديني لكن ما تقدر تكلمه لان شخصيته أقوى من انه يسمع لاحد .. اللي براسه يسويه..

نسيت اقولكم قبل ما اطلع كنت ناويه ما اقول لاهلي وأخلي الزعل بيننا
لاني وانا استفزه بالكلام عصب وقال والله لو ما سكتي لاطلقك بالثلاثه الان.. وجلست ابكي.. قلت ماعليه فيك عادي .. قال عااادي ؟؟؟؟؟ مارديت عليه .. قال قومي رتبي أغراضك بغرفتي بسرعه قلت ما ابغى قال ما تبغي طيب ماني مآخذها السياره قلت انا انزلها قال انتي كلك ما تطلعي دام هالعفش معاك

تركته وأخذت اللي يكفينا اسبوع ولما نزلت ما شال معايا قال شيلي بنفسك
ومعايا البنت صرت اطلع وانزل واشيل الأغراض ومعايا بنتي
لما وصلت السياره قلت وربي انك ......... وما انت رجال اخليني أشيل اغراضي وبنتي
كنت معصبه ولو بيدي الموت رسلته له
البنت مسكينه متخطيا يدي ورا ظهرها وكل شوي تميمدري إفك باب ولا أشيل اغراض ولا امسكها

بالسياره قال انا .............
قلت ايوااااا طلقننني وقلتها بصوت عالي انفعلت حسيت بوصل لمرحلة ما راح ارجع منها بخير
انهرت وجلست ابكي وأقوله وربي كل هالموقف انحطيت فيه ظلم
انت قلت قومي اطبخي وانا أقفل الغطا تغير كلامك ليش دامك رجال
تضربني ليش دامك رجال
لكن انا ما ابغاك طلقني
قال بطلقك ارتاحي
قلت يلا انزل قول لامي ايش صار علشان لما اتطلق ما يلوموني
قال انزل عادي
لما وصلنا قال هذي أغراضك وانزلي
نزلت ابكي وقلت لاهلي امي طلعت له لقيته ينزل اغراضي
قالت له ادخل
قال لها الشيطان حاضر الان لما اهدأ اجي
قالت له ليش امد يدك عليها
قال كنت امزح شديت شعرها وضربتني

بالله هذا كلام !!!!
وربي ما كان يمزح سلامات كان معصب وبعدين من متى المزح بشد الشعر


طيب انا فيني عيوب الدنيا بس ما يحق له ضربي
الرسول عليه الصلاة والسلام قال رفقا بالقوارير
مو من حقه يضرب

__________________

معليش ع الأخطاء الإملائية من السرعه بالكتابه

__________________

واضح انك غيرانة عليه من ( بنتك )
بطريقة انت مو حاسة بها .. مجرد تحليل لموقف الصبح

.
.

كمان
لا تزعلي منفردة

بس انت استفزيتيه كثير
و ما تعاملتي معاه بطريقة أنثوية

تعاملتي بطريقة طفولية في كل المواقف من وقت صحيتوا لحد وقت الغداء
بتغلطي عليه و هو ساكت لك من اول

كانك تستني من البداية انه يضربك

تحليل غريب. روح
ما حسّيت كذا أصلا. فهي تدلع بنتها و هو ينهاها
أتوقع انه في باله يقول أن دلعك و خوفك ماصخ أو مصطنع
فمو مقدر خوفك. زايد أن فيه (هو) دفاشة شوي.
ما عليك سوى ان تهدأي الآن
و تنتظري
أمك طلبت منه الدخول و هو رفض و قال بوقت لاحق
اذن انتظروه. مافي شيء بيدك خلال هاليومين

__________________