يعتبروه - ذكاء و دهاء -

اضيف شي ..
كل الي يعلموه مع سلفتي ..
حاولوا يعملوه معايا بداية الزواج و جنننننوني ..

لدرجة صرت ابكي بشكل هستيري عند امي و انا حامل بولدي الكبير ..
امي حلفت لو ولدي الي في بطني مات او صار فيه شي ؛ انها ما ترجعني لهم ..

كنت كل ما عاملتهم بطيب و اخلاق .. و على نياتي وقتها
و احاول اكسبهم و يحبوني مثل بنتهم ..

لكن كانوا هما يدوروا على فرصة عشان يعاملوني بنفس الي يعاملوا به سلفتي ..
و زوجي كان يقول لي ( تستاهلي .. احد طلب منك تواصليهم او تتقربي منهم !؟ )
اقول له ( بأعمل بالأصول ) يقول لي ( خلي الأصول تنفعك )

فأقوم أصد عنهم و اخد موقف .. و ما كنت اسكت عن الغلط مثلها ..

.
.

مرة بعد ثلاث سنوات من زواجي ..
صرت قليلة أصل .. مثل ماقالت شوك ( بعد ما امي و زوجي قالوا لي تعلمي تردي و ماراح نمنعك )

حماتي غلطت علي و طولت لسانها ؛ ترمي عيوب ولدها معاهم علي ..
قمت قلت لها ..
الوحدة قبل لا تزوج ولدها لبنات الناس و ترمي العيب على بنات الناس ..
تتعلم كيف تربي ولدها اول شي .. و بعدين تزوّجه ..
(( ههههه زوجي قالي بعدين .. ترى ردّك هذا سب فيا ))

و لما هددت بالطلاق و ماعرف ايش ..
قلت لها ( شوفي ولدك قدامك هنا .. قولي له طلقها ياللا )

خافت تخرب بيت ولدها .. و زوجها ما يسكت لها وقتها ..
و قالت ( ما قصدت و انا ما قلت يطلق )

.
.

عشان كذا امي الله يرحمها كانت تقول لي زوجك ما يغصبك على اهله .. و هذه ميزة تنحسب له ..
و سلفتي تقول لي ؛ لما اهل زوجي يتكلموا عني .. زوجي يدافع عني او يطنشهم ..
تقوللي بجد اعترف اني - اغبطك -

تقوللي سلفتي مرة جلس زوجها .. و ام زوجي يكلموا زوجي و يسبوه ..
و يقولوا له ( راتب زوجتك المفترض تعطيه لك يا خروف )
و قال لهم ( راتب زوجتي لها هي .. و مالي حق اخد منه او اتصرف فيه .. و ماحد له دخل )
و اخته الكبيرة دافعت كمان .. و قالت الصراحة لو انا موظفة .. زوجي ماله حق في راتبي و ياويله لو مد يده على فلوسي

.
.

عشان كذا ..

استخسر الهدية فيهم ..

.
.

انا ماني جالسة أعدد عيوبهم عشان اطلع اهلي افضل من اهله ..
لو ابغى اتكلم عنهم .. عندي قروبات اهلي و اخواتي و صحباتي ..
بس ماحد يدري عن الي أقوله هنا ..

و باحصل على نصيحة تنفعني مستقبلا ..

الدليل اني اسمع النصائح هنا .. انه زوجي طلب مني اكتب السؤال عندكم و اقتنع بالردود ..

.
.

الله يجزاكم خير ..
و يغفر للجميع في هذا الشهر الفضيل ..

و بسبب مبادرة حماتي الصراحة بالاتصال للسلام ..
شفته شي كبير منها ..

لكن بنفس الوقت ابغى ( تستمر الحدود و الرسميات بيننا )
افضل لي و لهم ..

مثل ما قالت نورة ام يوسف و سما ..
( كثرت الاحتكاك يودي للاختلاف )


ممكن إغلاق الموضوع ..
مرة شكرًا لتحملكم ( غثاي ) ^^
و كل نصيحة ترى قراتها و اخدت بها .. و جالسة ببالي ..