تعشينا الحمدلله .. و جلست اتكلم مع ام زوجي ..
و ابو زوجي يتحكى معايا ..

و كان ابو زوجي بيرتب أشياء .. و كنت أقوم من نفسي كالعادة و أساعده من غير ما يطلب ..
من زمان انا كذا .. اراقبه لو بيعمل شي و مو قادر يعمله بحكم كبر سنه ..
أقوم على طول و أساعده فيها ..

بس بعد العشاء .. ام زوجي تلمح متى تروحوا

دايما لما كنّا نجلس عندهم ..
تقول لنا كلمي زوجك خليه ياخدكم و هو راجع ..

او مثلا .. متى رايحين !؟

و لو زوجها يبغانا نجلس اكثر ..
تجيب له اي حجة .. عشان ما نجلس اكثر

ماعرف ايش السبب !؟

.
.

سالتني متى جاي السواق !؟

مع انه الساعة صارت 9 الليل .. و زوجي يخلص دوامه 1 الليل
و نحن جينا عندهم الساعة 7 ونص .. يعني ما طولنا

.
.

بس قلت لها السواق دحين جاي ..

و نحن خارجين .. ابو زوجي قال ليش رايحين !؟
خليكم جالسين و لما يجي زوجك ترجعوا كلكم سوا ..

ام زوجي قالت له عشان اولادها نعسانين ..
خليهم يروحوا يناموا ..

.
.

بس و نحن خارجين ..

قالت لي .. تعالوا دايما زي كذا ..
انا فاهمة قصدها .. عشان العشاء ؛)

صراحة اللي يشوف مصيبة غيره تهون عليه مصيبته

يعني الوحدة اتزوجت وخرجت من عائلتها لعائلة جديدة

عائلة جاءتهم بنت ولااروع

مثقفه متعلمة

وابنهم مايقدر يعيش من غيرها من حبه لها ومن حسن تدبيرها ماشاء الله

اكرمتهم وجعلت احفادهم انظف واحلى احفاد

واكرمت العائلة باحضارها للهدايا والعشاء ومتفرقات اخرى

فكان اقل شي يقدموه لهذه السيدة الفاضلة هو القليل من الاحترام والشكر والعرفان لها

لكن ايش نعمل اختي روح

هذه الدنيا

الله يعطيكي الصبر ويقويكي ويعوضك في عيالك وفي زوجك خير

__________________

ماني قادرة اقتبس عشان من الجوال

اخوي لماذا نتزوج ؟

- انا ما كنت مبوزة .. كنت مبسوطة و عادية و مرتاحة و اتكلم بعفوية مع امهم .. و هي كانت مبسوطة مني ..
عالاقل ( علي بالظاهر )

و بنتهم الي كانت ( مبوزة و مكشرة ) .. و انا تجاهلتها

- الشي الثاني .. هما عارفيني و بنتهم هذه ( هي اقوى وحدة في اخوات زوجي و كم مرة - مو قدامي -
تطول لسانها على اخوها و الي يصير زوجي .. و الفرق بينهم اكثر من 10 سنوات )
و لما تحتاج اي مصلحة لنفسها في الجامعة .. تصير مرة كويسة معايا و زي العسل ..

- يعني انا عارفة انه الي اسويه .. ما راح يجيب نتيجة ( نتيجة موقتة فقط و في نفس اللحظة فقط ) ..
و اخوات زوجي مو لاقيين اي سبب او عيب فيا .. يقوموا يمسكوا حجة ( انه اخونا خروف )
كذا يقولوا مع بعض في القروب حقهم .. و يسخروا من أخوهم ..

- سلفتي ما كانت موجودة ..
بناتها موجودين و اولادها الكبار .. عشان يخدموا حماتي و يساعدوا عمتهم الي تصير اخت زوجي ..

.
.

انا بالعكس .. اخدت راحتي مررررررة و اتصرفت بطبيعتي
و عشان كذا ازعل بعدين و اتأثر .. لما بدون اي سبب ؛ يعاملوني بطريقة غلط ..

.
.

يعني لو رحت بس كذا .. بدون اكل ..
اتوقع حماتي كانت قابلتنا بوجه عبوس ..

ابو زوجي يحب اولادي الحمدلله ..


انا و اهل زوجي من نفس العيلة لكن من بعيد .. و بيننا صلة ارحام من اكثر من جهة ..
يعني قريب زوج اختي متزوج أختهم .. قريب زوجة اخوي متزوج أختهم التانية و ولد خالة زوجي متزوج وحدة تقرب لنا
فأبو زوجي يحس انه اولادي هم احفاده من لحمه و دمه

سلفاتي لا ..
من جنسيات عربية مختلفة .. و هذا الي يخلي اهل زوجي يستقووا عليهم ..

.
.

هما بس ام و ابو زوجي الي طبايعهم مختلفة عن عائلتهم
و امي الله يرحمها ما تعرف حماتي ..

لكن كانت تعرف أقاربهم و لما كانت تسال عن حماتي كانوا يقولوا ( ملتزمة و ما تخرج من بيتها )
فماحد يعرف الطبائع هذه .. غير الي يعيش معاهم ..

.
.

اخوي تعاملت معاهم بأصلي ..

لو رجعوا غلطوا علي .. راح يشوفوا مني وجه تاني
عشان كذا راح آكون بعيدة عنهم ..

انا احب التجمعات العائلية و ما ابغى احرم اولادي منها ..
لكن هما غصب يخلوا الواحد كذا يعاملهم

اقصد مبوزة داخلياً

مش عايشة اللحظة

__________________

لاني اعرف انهم يبحثوا لي عن الزلة و يبحثوا لأولادي عن اي زلة
لدرجة احس برج المراقبة علي من كل جهة ..

على كل حركة و تصرف .. يراقبوا

و مو بس هما ..

حتى سلفاتي فيهم ( لقافة ) .. بالرغم من طيبة وحدة فيهم
يعني لو زوجي ما جاء بيت اهله .. ملاقيف يسألوا حماتي ( ليش فلان ما جاء !؟ )

و يسألوني عن تفاصيل حياتي و انا ما اعطيهم مرات المجال
اعطيهم المعلومة الي ابغى اعطيهم هي

حتى لو متجمعين مرات ..
يقوموا يحكوا عن مواقف زوجي مع اخوه و يضحكوا
او فلان ( قصدهم زوجي ) يحب ياكل الطبخة حقتي
انا ابتسم و ما ارد .. لاني عارفة انهم كذابين
و ما يحكوا غير عن زوجي .. و يطالعوا فيا .. و انا عادي أطنش او ابتسم ابتسامة مجاملة

كنت اصدق بداية الزواج أكاذيبهم

استغرب لاني ما اعمل مثلهم و لا ليا دخل في اخوان زوجي
اخوه جاء .. اخوه ما جاء .. اخوه زار اهله .. مالي دخل

كلها كم سنة وتصبحي انتي مكان هذه الأم وزوجك مكان هذا الاب

ويتجمعو عندكم عيالكم وزوجاتهم الثلاثة

والسلايف راح يغيرو من سلفتهم زوجة الوسطاني لأنها مقرّبه عند حماتهم

يمكن ايه ويمكن لا

انتي جربتي الان تكوني مكان السلفة المغلوبة على امرها

احملي معاكي هذه المشاعر وهذه الخبرة كي تراعيها عندما يأتي اليوم الذي تصبحي فيه في موقع ام زوجك

__________________

أخوي اعتذر عن التأخير .. وسط الأسبوع ..
مضغوطة جدا

لكن أخوي بخصوص سلفتي ، ترى أمي الله يرحمها - تبهدلت كثير من أهل أبوي الله يرحمه -
و أهل أبوي شخصيتهم اقوى من أهل زوجي .. مع اختلاف الطبايع

يعني اهل ابوي عندهم الكرم ، عزة النفس ، و شوفة النفس .. إلخ
و لما يزعلوا .. ما يرضوا بسهولة .. فأمي الله يرحمها تعبت معاهم ..

و عشان كذا ، أنا أراعي سلفتي .. و أراعي حريم أخواني ..
و أرفض اني اضيع عمري في محاولة الحصول على رضاء اهل زوجي ..

لإني شفت امي الله يرحمها ..
ماحد قدر تعبها و لا تضحياتها و لا خدمتها لأهل أبوي ..

عام كامل تقريبا ..

اخوي و استاذنا لما نتزوج ..

رجعت من جديد .. و يعلم الله قد ايش استفدت من نصائحك هنا .. و أعطيتني قوة اكثر للتغلب على افكاري في محاولة استرضاء من لا يرضى ..

.
.

المستجدات :

- خلاص العشاء هو نقطة ضعف حماتي .. مثل ما ذكرت .. لكن تأثير موقت و يخليها تطمع للمزيد اكثر .. و بطلت الصراحة في الأخير و تتصل مرات و تقول لي ليش ما تجي و تجيبي عشاء معاكي !؟ و لما اروح تسألني متى ترجعوا لا تتأخروا .. و حتى ما تسالني اولادي و أحفادها و لا تشتاق لهم ..

المختصر .. مادية جدا لدرجة مثل ماً وصفها زوجي بيوم من الأيام بالمزح و قالي ( امي لو تعطيها فلوس تبيعني و ما همها ) .. و فعلا هي كذا ..

.
.

- انا الحمدلله خلاص ما صرت اهتم .. رضي الي رضي و ما يرضى إليّ ما يرضى بكيفه و مع نفسه ..

- و لما حاولت ارجع طيبة مثل زمان .. رجعت هي كمان لحركاتها السابقة من رمي للكلام و التقليل من الشأن .. و اصلا ما يعزموني انا و سلفاتي في مناسباتهم العائلية ابدا .. زواج او خطوبة او مناسبة عند اخوات زوجي او خالات زوجي او أخواله ما ينادونا و لا يعبرونا ..

انا كمان صرت ما اهتم و لا اعبر الي ما يعبرني .. و اصلا نسيت اني من العيلة هذه 😅

.
.

الموقف الأخير الي حصل ..

جلست هي و بناتها يحرضوا زوجي انه لازم يسمع كلامهم و نصائحهم له و لا يندم بعدين و انه الله يهديه متى يسمع كلامهم

يقولوا له ليش رايح مع مرتك للبعثة ؟؟؟؟ و بنتها تجاوب باستغراب و تقول لامها مجنون اخونا مو بعقله

و الام تقوله راح تندم وقت ما ينفع الندم .. و يقولوا له مرتك ترجع دكتورة و ضامنة مستقبلها و مستقبل اولادها ( لاحظ اولادها تقول ماتقول اولادك او أحفادي ) .. و ترجع و ترفسك !!!!!!!!!

.
.

ماعرف ايش رأيك ؟

انا الصراحة من يومها ( من شهرين تقريبا او شهر و نص ) ما رفعت السماعة و لا كلمتها و لا زرتها

عشان ما احب اقابل انسان منافق و لا اقدر انافقها .. و قلت أحط حد للمسخرة هذه و طيبتي ما جابت معاهم نتيجة و انا كافية شري عنهم و هما شايفين بعينهم كيف زوجي تغير و الحمدلله كثير للافضل و معترفين بداخلهم انه بسبب صبري و تحملي

ما هموني خلاص
لكن احتاج رأيكم اخوي ..

اخته الصغيرة و طبعا في سن زواج خلاص مو طفلة يعني

تكلمني و تقولي لو رحتي هناك شوفي لي الجهاز هذا و اشتري لي مثله ،، او ترسل لي و تسالني انتي تداومي و لا لا ؟

ما صرت مثل زمان اعطيهم نشرة اخبارية عني لو سالوني عن شي

خلاص كلمة و رد غطاها

أرد عليها
( لا ما أداوم .. ليش تسالي ! )

او ردودي كلها ( ان شاءالله )
( باذن الله )
( اها ... طيب )

بسسسسسس كذا

و امه من يوم عرفت انه جاني قبول و جلست تعبي راس زوجي .. هو رد عليهم و قالهم مرتي ترجع و ترفع راسي و راس اولادي .. و ماعرف ايش تكلموا

لكن من هذاك اليوم مافي اي تواصل بيني و بينها

و مع العلم انها كانت حاطة عينها على أجهزتي و تبغاني اعطيها لها و تقول لي لما ترجعي من دراستك تكوني منتفة و أعطيكي وقتها فلوس كذا و كذا

و هي كذابة ما راح تعطيني و لا ريال
و قلت لها ما ابغى أبيع أجهزتي

و يستنوا متى اسافر و ياخدوا اغراضي .. لكن طلبت من زوجي رجاء ماحد منهم يتدخل في بيتي و اغراضي .. احرقها أرميها مالهم دخل

طبعا مقررة ااجر الشقة باذن الله ..

ادري لو تركتها فاضية .. بيحتلوا الشقة لنفسهم.. و عشان كذا اخباري ما توصل لهم ابدا

زمان كانت اخبار زوجي توصل لهم مني لما يسألوني .. اجاوب على طول .. دحين زوجي مبسوط مني و يقول لي ( اخيراً تعلمتي كيف تردي عليهم )

ما يبغاني ادخل معاهم بمشاكل و نفس الوقت ما يبغاني اعطيهم سبب للتدخل في حياتنا .. و هو شكله عارفهم

حتى كان يرفض اني اروح و اخد شي معايا .. يقول لي تروحي و يدك فاضية .. يبغوكي كذا الله يحيهم ما يبغوكي كذا خلاص لا تروحي ..

مع العلم انه ابدا ما يرد عليهم و لا يتضارب معاهم الحمدلله .. و هذا أسلوبه التطنيش فقط

بس انا انقهرت من الموقف الأخير .. حاولت اطنش و انسى
لكن لماً افتكر انقهر ..

قلت خلاص قبل السفر اروح مع زوجي اسلم عليهم ببرود و امشي

مع العلم انه ابو زوجي مو عارف عن حركات مرته و بناته و كلامهم مع زوجي عني و امس كان يسال ابو زوجي عني و يسال زوجي ايش عملت و كذا