يوميات اليوم الخامس ..
قالت لي ابصحيك الصباح للدوام قلت لها ان شاء الله .. صحيت وتجهزت وانا بالسيارة اتصلت علي وصباح الخير يلاقوم دوام ..هههههه قلت لها ماعليش غلطانه انتي الي صباح الخير تريني بالسيارة ورايح الدوام الحين ..!
المهم قالت لي عن بنتي الصغيرة وانها تعبانه شوي ومعها نزلة برد ومرض فيروسي ..
ورحنا للدوام والدوام لله تعالى .. وتونا رجعنا قبل ساعه تقريبا وكلمتها لقيتها مع البنت بالمستشفى لان البنت تعبانه شوي مثل باقي الاطفال لما يتغير عليهم الجو وفيها حرارة واستفراغ وعطوها محاليل وادوية وراجعين للبيت ..!
وانا الحين انتظر الموية تغلي عشان كاسة الشاي والله يعين ..!
محتار وش اسوي معها اجيبهم خلاص ولا اخليها هناك ماودي اضغط عليها ولاودي اتركها وتقول ليش ماتجي
ولو قلت لها وش رايك بتقول بكيفك ..!
ودي انها تنبسط مع امها واخوتها ويغيرون جو شوي من جو البيت وكمان ودي بقربهم جنبي وبين نارين ..!!

اسمعني عاد
تراك بموضوعك ذا تزيد على نفسك
لأنك كلما تكتب تتألم وتتذكر
حاول تتلهى بشي
انس يا اخي شوي
ترا الحريم يحبون اللي يسج عنهم شوي
شف لك شغلة تفرج قنوات مفيدة مثل ديسكفري او بي بي سي بلانت
دور لك اصدقاء او تعال صادقني انت والله جزت لي كم رقمك ؟ ههههه
انشغل انشغل شوي
نصيحة سمعتها من اخوي اللي اصغر مني من سنوات وثبتت في قلبي : لا تعلق حياتك في احد ابدا . صدقت يخوي القهر انك اصغر مني خخخ

ههههه حياك الله .. لي الشرف طال عمرك ..
بس ياخي انت تخوف اخاف تخربني وبعدين انسى زوجتي وخاصة انك تقول لها عند اهلها ثلاث شهور وكل ويك اند عند امها .. انا مايخارج معي هالكلام ابدا وش الي ثلاث شهور وكل ويكند..!
والله يالغالي ان عندي شغلات كثيرة بس هالموضوع ماخذه انا ترويح وتسليه عن النفس فقط عشان لااطفش بلحالي مع ان عندي شغلات كثيرة والله ..بس حتى لو انشغلت ماراح تنسى زوجتك واطفالك..
ياخي انت قلبك حجر ههههههه ياشرير

والله اني رومانسي واحب اكون حبووووب مع المرأة
مو الغلط الثلاث الشهور الغلط اني عودتها من تزوجنا كل ويكند . ما اخفيك حاولت تجلس مرة وحدة وثااارت علي انا بصراحة ما تهنيت بزواجي ابدااا .. يعني تجلس غصب مالها طعم كذا
السبت لو اتأخر زعلت اقولك احس اني دوامها من السبت سابقا الى الأربعاء
انت كيف نظامك ؟

وش الي عودتها كل ويكاند عند امها ؟
طيب وانت والاطفال مالكم حق تاخذون ويك انك مع بعض ؟ تخرجون مع بعض ؟ تتمشون مع بعض ؟
لو حتى تجلسون مع بعض بالبيت ..
ولا خذ امها معها كل ويكاند لين تطفش امها وبتسيبكم ..
وضعك غريب والله ..
لو كل فترة والثانية اوكي بس كل اسبوع عند امها ليش؟؟
زوجتي تزور اهلها واخوانها عادي بين فترة والثانية لكن ماتصل اسبوعيا حتى اهلي مازورهم اسبوعيا
لازم بين فترة والثانية اسابيع او شهور مو كل اسبوع بيصير روتين وملل
وبعدين ليش تثور عليك وش السبب.. زوجتك وجالسة معك في بيتك وانت متزوج عشان كل ويكاند تروح لاهلها ..!

^
.ياليت زوجي يحدد لي ايام لروحة اهلي ..بالعكس عادي عنده لو اجلس كل الايام عند اهلي ينبسط يبي يعيش حريته مع انه والله مامنعه دايم طلعات
وياخ amg بالعكس انا اؤيد انك تبين لزوجتك انك مشتاق لها وتتمنى جيتها للبيت بس من غير ماتفرض عليها علشان ترجع مبسوطة ومتشتاقه ..
الله يديم عليكم الالفه والمودة ويحفظ لكم احبابكم

صراحة انا اشوف هالموضوع شخصي ويختلف من شخص لاخر ولكن والله اعتقد ان الزوج والزوجة مالهم
الابيتهم ولو زار اهله اوزارت اهلها .. ومن طلع من داره قل مقداره .. ويامرحبا بمن زار وخفف ..!

انا عندي مشكلة واحدة في زوجتي تقهرني وبصراحة ردك ياريماس ذكرني في هالمشكلة وهي الاعتمادية علي في كل شي حتى في الامور الخاصة تبيني اخذ عنها اي قرار وهذا يزعجني احيانل لاني ابي اسمع منها قرارها وتفكيرها عشان كذا حتى في رجعتها للبيت راح تقول على كيفك انت وانا نفسي هي تاخذ القرار اما تجلس او تقول برجع .. شيء جميل يكون للزوجة قرار منفصل وتاخذ راي زوجها لكن انه يصير كل شيء على الزوج مشكلة .. اللهم امين وشكرا لك

انا زي زوجتك وانت زي زوجي من هالناحية ..
بس هالطبع اللي فيه يقهرني وينرفزني ..ينتظرني ادق عليه واقوله تعال مرنا صرت اقوله بنام عند اهلي اتحرى الرجل يتلحلح ويقول لا بجي اخذك
بس مستحيل يقول كذا
اذا سالته تبي اجي البيت يقول بكيفك
استغفر الله يرفع الضغط ..ابيه يقول لا انا مشتاق لك وماصبر عنك بس ماعندك احد

اشوف الموضوع يعتمد على شخصية الزوجة لو اعرف انها بتكون صريحة معي ومابتجاملني بسالها دايركت واخذ الجواب النهائي لكن المشكلة لو كانت غامضة واجاباتها كلها بكيفك وزي ماتحب وزي ماتبي
هنا الرجل بيكون في حيرة ويجلس يفكر مايبي يظلمها بقراراته وكمان مايبي ياخذ عنها القرار لذلك يطلب منها اتخاذ القرار .. وجهة نظري عسى ان تكون صحيحة ..!

ماشاءالله عليكم
الله يديم الموده

حلو انك تشتاق لها وتبين لها هذا الشيء راح تفرح وتقلل زيارات

انا عني لو مرتاحه ببيتي و زوجي حبوب ويجلس معي ما اروح لاهلي كثير كل شهرين ثلاثه اروح يومين نجلس مع بعض ونرجع

لكن الشكوى لله
مايجلس بالبيت ابدا
ومافي اي انسجام بيننا

واحس الرجال الي وده بالفكه من زوجته بالأغلب يكون خاين ويبغى ياخذ راحته

الله ييجمع بين قلوب كل زوج وزوجه ويبعد عنهم الخيانات و النفور و المشاكل