ماشاء الله
الحمد لله حمدا كثيرا

__________________

الله يسعدكم دنيا وآخرة على مشاركتكم فرحتي..والله يتقبل منكم دعواتكم الطيبة..

جتني زوجة ابني بعد صلاة الفجر وأنا أجهز الفطور لأبوهم. سلمت علي وسألتني: خالتي سامحتيني؟
قلت لها طبعا.. قالت من قلبك ولا باقي شي؟
قلت لها والله من قلبي..لكن الصدق أنا مو واثقة فيك تسوين مشكلة جديدة ثقتي فيك صفر..

قالت لا خالتي خلاص إذا إنت مسامحة من قلب مايصير هالكلام..

قلت لها الثقة أنت تبنينها مع الأيام..

سألتها وش اللي غيرك ؟؟
قالت أمي وأبوي مو راضين عني.. وكل مرة أزورهم يسألوني صالحتي أم فلان أقول لهم لا ..يزيدون يهاوشوني..

أبوي أعطاني عيد الفطر آخر فرصة أصالحك فيها..وأنا ماصالحتك..بعدها أمي وأبوي قالولي ماتدخلين بيتنا إذا ماصالحتي أم زوجك..

والصدق خالتي أنا لاحظت فرق بحياتي من غير رضاكم.. إنت وعمي وأمي وأبوي الخير والبركة..
والله ياخالتي أنا حسيت مافي بركة ببيتي من زعلكم علي.. حتى زوجي بعدما رجعني تغير علي ماصار مثل أول..

أنا كنت عايشة بدوامة وتفكير وحسيت إني فعلا كبرت السالفة وهي ماتسوى..وقالت كلام كثير.

قلت من اليوم ورايح حطي عقلك براسك وانتبهي لبيتك وحافظي على زوجك ترا مو كل مرة تسلم الجرة..

وقلت لها ترا أهم شي عندي بالحياة عيالي مايتفرقون ويعيشون إخوة قلوبهم على بعض،، ولأجل ما يتفرقون أنا مستعدة أسوي أي شي..

ونبهتها إنتو الكبار كل ماكنتوا متماسكين كانوا عيالكم متماسكين..وإذا إنتوا اتنافرتوا واتباعدتوا عيالكم بيكونوا نفس الشي..

وحطيت قدام عيونها بعض المواقف اللي تصير قدامي مع زوجها أو سلفاتها وتعاند وتمشي اللي براسها ..
قلت لها إنت ماتفهمين من الحياة غير إنك إنت الصح..؟
قالت إن شاء الله بتغير وأصرت أدخل عندها أتقهوى المغرب لأني رفضت أنزل أتغدى..

هذا اللي جالس يصير...والله يهدي النفوس ويصلح الحال ويطرد شياطين الإنس والجن من البيوت.

صباح الخير
مكلومة ودي أقول لك شي بس رح أزعلك
وأنت عايشه فرحه ما أحب أنغص عليك
عموماً :- الله يفرح قلبك بلمة عيالك حواليك

__________________
.
هناك من يتذمر لأن للورد شوكاً، و هناك من يتفاءل لأن مع الورد شوك.

صباحك ورد أختي شوك
بالعكس قولي أنا حابة أسمع تعليقاتكم وردودكم عشان أستفيد..
ما راح يزعلني شي أبدا..

إذا تذكريني
أنا اللي كان فيني فضول وسألتك لما تكلمتي عن خلافك عن سبب المشكلة
ولما سألتك كان في بالي شي أبي أتأكد منه
ولما كتبتي موضوعك هذا ، وقرأت ردي تأكد احساسي اللي كنت حاسه فيه أول مرة لما حكيتي
ما أعرفك ولا تعرفيني
واللي أقوله ممكن خطأ ، وممكن يفيدك
بس هو شي حسيته وقرأته بين السطور
وودي ودي لو اللي بالمنتدى يمسكون شوك وينتقدونها لمصلحتها مو ( لإفراغ حقدهم عليها) لأن صدق رح أستفيد وأتغير ، خاصة إن كل منا في شخصيته جانب معتم ما يشوفه هو
المهم:-
لاحظت في شخصيتك شيئين ممكن يسببون لك مشاكل ، وتخلي ردة الفعل زي زوجة ولدك بالضبط
أولها أحس إنك من الناس اللي إذا ما وقفتها عند حدها تتمادى ، وهذا اللي سوته زوجة ولدك معاك
حتى وإن كان ما قلتيه هو إبداء رأي لكن كان فحواه رسالة لولدك ما أبي زوجتك تتوظف لمصلحتك
والصراحة يا خالة مالك حق تعطينها كاش بالوجه بهالطريقة
هالأمر شخصي بينهم وإذا تحسين رأيك مختلف وبيخرب العلاقة لا تقولينه ، خاصة إنه في أمر مو ضروري ولا يفسد الحياة الزوجية
الثاني:- أنت قوية وتجادلين وتكثرين نصايح وتوجيه ، وترى ماحد يتحمل خاصة من أم الزوج اللي حريصة إني أطلع قدامها بمظهر الكمال.
شوفي كلامك لها لما رجعت لك كله نصايح وتوجيه
خفي شوي يا مكلومة ، أدري إن كل هذا من حبك لعيالك وعرفت نوعيتك زييييين أنت من اللي يظل محاوط عياله مهما كبرو.
ومرة ثانية صباحك راحة ورضا من الرحمن.

__________________
.
هناك من يتذمر لأن للورد شوكاً، و هناك من يتفاءل لأن مع الورد شوك.

اختي مكلومه .. مع الاعتذار لك ياليت تغيرين لقبك بالمنتدى
غيريه باسم فيه تفاؤل او اي اسم بعيد عن الآلآم والجروح
التفاؤل زين

مبروك الصلح
من كثر المشاكل اللي هنا ماني متذكر مشكلة ابنك
فيه احد عنده رابط للمشكلة ؟

ان شاء الصلح دوم بس عندي راي ويمكن يكون خطأ لا تعطين نصايح طول الوقت والله يجعل عيالك بارين دوم

__________________

مكلومة

انا مع رايي شوك 100٪

ما كان له داعي زيادة العتب و النصائح من جديد
خلاص اتركيها تعيش حياتها بكيفها

و لا تكثروا الاحتكاك ما بينكم

انا مدري عن موضوعك السابق
لذلك لن افتي فيما لا اعلم
ومبروك الصلح والله يهدي النفوس

لكن بشكل عام حسيتك قويه " وهذا مدح وليس ذم "

لكن اعطي عيالك فرصه يعيشون حياتهم زي ما يبون
لا تحسسينهم "بحساسيتك علهم وتدخلاتك " ان وجودك في حياتهم ثقيل


خليك نسمه تلطف حياتهم ؛ وليس اعصار يقلب حياتهم

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )