حبايبي اعضاء المنتدى هاذي اول مشاركه لي واتمنى منكم المساعده

عندي صديقه وهي بنت عمي وكانت اقرب الناس مني وصديقتي من عمري عشر سنوات وكنا اكثر من خوات
ومن صفاتها انها تكره الرجال وترفض مبدأ الزواج وتحب العزله عن الناس وترتاح لي اكثر من اي احد
من سنه تقريبا خطبني ولد عمي وهو على خلق ودين انا وافقت
طبعا يوم اسمعت بنت عمي بالخبر تضايقت حيل وبدل ماتبارك لي اجرحتني بكلامها وقالت مانقيتي إلاهذا توافقين عليه حتى عرسك مابي احظره وقلت لها يرضيك إذا رفضته قالت طبعا يرضيني
واهو ولد عمها وتعرفه زين مايصير تقول عنه هالكلام
مع انها كانت تبدي فرحتها لكل وحده تنخطب وتسارع بزف التبريكات اشمعنى انا صار معاي العكس
وتغيرت اخلاقها معاي صارت تكلمني بجفاف وكاني مرتكبه جريمه انا انصدمت فيها حيل ماحس انها الانسانه اللي عرفتها
حتى اوصلت فيها المواصيل انها تشككني فيه وتقولي انه ضايفها عالماسنجر وانا تاكدت ان كلامها كذب
احيانا احسها حليوه معاي واحيانا العكس
وهالفتره قامت تتقرب وتتصل ولا كان شي صار وانا حسستها ان الوضع عادي وصرت ماحب افتح معاها هالموضوع مهما كان ماانسى الصداقه اللي دامت سنين وكان الكل يحسدنا عليها
بس شي اكيد ان مكانتها بقلبي تغيرت
وانا محتاره استمر بصداقتي معاها ولا اقطعها ونصير بنات عم وبس
وعلى فكره انا مابعد املك مادري شبيصير فيها بعد مااملك
احيانا احس اني محتاجه لها لانها صديقتي الوحيده اللي ارتاح لها ارتاح لما اكلمها واشكي لها بس الحين اذا كلمتها اضايق اكثر
مادري شلون اتصرف

وعذروني على الإطاله