أعرض عليكم مشكلتي وأبي نصيحتكم لا تتركوني !
السلام عليكم
بقولكم مشكلتي وأتمنى أجد عندكم الحل المناسب
والله ما عرضتها الا بعد ما تعبت من الهم والتفكير والحزن والبكاء
خاصة إني وحيدة ومنعزلة ومدري لمن أشكي وأحس إني خايفة أقول لأحد قريب مني
ويفهمني غلط ..!
جات بالي أشياء كثيرة لذلك أحتفظت بهالشي بنفسي وما علمت فيه أحد
وأول مرة أتكلم فيه ، بس لأني ارتحت لهالمنتدى واستخرت اني اعرض مشكلتي فيه
توكلت على الله
ما أطول عليكم
المشكلة هي
أنا الحمد لله فتاة مستقيمة ومحافظة وحافظة القرآن وهذا من فضل ربي علي
الحمد لله علاقتي طيبة مع اللي حولي وأجد قبول ومحبة منهم
لكن من داخلي أنا محطمة وحزينة ومهمومة وكارهة حياتي لكني بفضل الله اسيطر على هالمشاعر واستغفر ربس وراضية بفضاءه وحكمته الحمد لله على كل حال
يوم كنت صغيرة كنت أحلم مثل أي بنت يكون لي زوج وعيال أربيهم على الخير والصلاح
وهذي امنيتي زوج صالح أعينه على الخير ويعينني وأسرة محافظة مستقيمة
كبرت وكبرت أحلامي لكنها تحطمت بلحظة أهمال وعدم مسؤلية
تعرضت لتحرش جنسي من أحد أقاربي
كنت صغيرة لكن ما أذكر متى بالضبط يمكن رابع ابتدائي
أقسم لكم بالله ما أدري وش كان يصير لي ما أفهم والله ما أفهم
أحسه شيء غلط وموب زين بس ماني فاهمة وش اللي صار لي
وصلت المتوسط بديت أفهم وعرفت وش اللي صار
كرهت عمري وحياتي وكنت انسانه محطمة وضايعة بس ما كان احد يدري
والحمد لله من فضل ربي ما تغير مستواي بالدراسة وكنت متفوقة ولله الحمد
كبرت وأحلامي ضاعت وتحطمت كنت ابكي وانهار ومحد يدري عني
الله يعلم إني عفيفة وما مشيت لدرب خطأ ، لكن ابتلاء أسأل الله انه يفرج عني
ويجبر مصابي ويعوضني خير
مدري وش اسوي غير اني اشكي لربي وادعي
ولما يجي طاري الزواج اتمنى من كل قلبي لكن بداخلي خوف عظيم
كملت دراستي وتخرجت من الجامعة بتفوق وختمت القرآن ، لكن ما زال همي يهد حيلي
ومدري وش اسوي حاولت انسى واعيش حياتي لكن اي شيء يصير لي لو مشكلة بسيطة كنت اتأثر
وانهار وابكي لين انام بدون محد يدري ولا يحس سواء من اهلي او صديقاتي
الحين تقدم لي واحد وانا خايفة مدري وش اسوي خاصة انه سمع عني كثير وشكله متمسك بي
لاني مستقيمة وحافظة للقرآن
مدري ارفض الزواج
اوافق واصدم نفسي واصدمه
أنا حقيقة مدري انا صار لي شيء والا لا لاني كنت صغيرة وما افهم بس خايفة والله خايفة
وماني واثقة اشكي لاحد او اقوله
فكرت بخواتي بس خايفة مدري كيف اقولهم
فكرت اروح طبيبة واكشف بدون محد يدري بس خايفة انصدم وش بقول للطبيبة
انا محتارة وتايهة جدا جدا
عطوني حل الله يجزاكم خير
ارشدوني والله اني بكرب وبحال ما يعلمها الا الله
واعذروني على الاسلوب مدري كيف اكتب والله دموعي على خدي خاصة ان مشكلتي حرجة مرة والله اني مستحية وانا اكتبها
بس الله اعلم بالحال
سامحوني .
التعديل الأخير تم بواسطة آمال فتاة ; 13-07-2007 الساعة 05:10 AM
13-07-2007, 05:00 AM
ضوابط المشاركة
العرض الشجري